రూ.50 లక్షల హోమ్ లోన్.. ఇలా చెల్లిస్తే.. రూ.20 లక్షలు ఆదా

సొంతింటి కల నెరవేర్చుకునేందుకు పెద్ద మొత్తంలో డబ్బు అవసరమవుతుంది. చిన్న ఫ్యామిలీ ఉండే ఇల్లు సైతం లక్షల రూపాయలు పలుకుతోంది. దీంతో బ్యాంకులు, ఫైనాన్షియల్ సంస్థల్లో రుణాలు తీసుకోవాల్సి వస్తోంది. ఇలా లోన్ తీసుకుని ఇల్లు లేదా అపార్ట్‌మెంట్ కొంటున్నవారి సంఖ్య పెరుగుతోంది. కానీ సరైన ప్లాన్ లేకుండా లోన్ తీసుకుంటే ఈఎంఐ (EMI)ల భారం పడుతుంది. చెల్లించాల్సిందానికంటే అధికంగా వడ్డీ చెల్లించాల్సి వస్తుంది. దీర్ఘకాలం పాటు లోన్ కడుతూ వెళ్తుంటే లక్షలు నష్టపోవాలి. అందుకే గృహ రుణం తిరిగి చెల్లించేందుకు ఒక ప్రణాళిక ఫాలో కావాలి. తక్కువ సమయంలో లోన్ ఎలా చెల్లించాలి? వడ్డీ ఆదా చేసుకోవడం ఎలా అనేది తెలుసుకుందాం.

 హోమ్ లోన్ తీసుకున్నప్పుడు కాల పరిమితి ఎక్కువగా ఎంచుకున్నట్లయితే అధిక వడ్డీల భారం పడుతుంది. మీరు రూ.50 లక్షల గృహ రుణం తీసుకున్నారు అనుకుందాం. బ్యాంకులు సాధారణంగా 9 శాతం లోపే వడ్డీకు రుణాలు ఇస్తాయి. మీరు 10 ఏళ్ల లోన్ తిరిగి చెల్లించే వ్యవధి ఎంచుకుంటే అప్పుడు రూ.26 లక్షల వరకు వడ్డీనే కట్టాలి. అదే మీరు 15 ఏళ్ల లోన్ కాల పరిమితి ఎంచుకుంటే రూ.41 లక్షల మేర వడ్డీలే కట్టాలి. 20 ఏళ్ల కాల పరిమితి అయితే మీ అసలు కంటే అధికంగా రూ.58 లక్షల మేర వడ్డీనే చెల్లించాల్సి వస్తుంది. దీని ప్రకారం మీరు గమనించినట్లయితే తక్కువ టైంలో లోన్ చెల్లించడం ద్వారా భారీగా ఆదా చేయవచ్చు. మీరు 10 ఏళ్లు కాల వ్యవధి ఎంచుకుంటే సగానికిపైగా వడ్డీ తగ్గించుకున్నట్లే అవుతుంది. రూ.50 లక్షల గృహ రుణాన్ని 10 ఏళ్లలోనే తిరిగి చెల్లించినట్లయితే రూ.20 లక్షలకు పైగా వడ్డీ ఆదా చేసుకుంటారు.

లోన్ కాల పరిమితి తక్కువగా ఎంచుకుంటే నెల నెలా ఈఎంఐ ఎక్కువ కట్టాల్సి ఉంటుందని గుర్తుంచుకోవాలి. ప్రతి ఏటా ఈఎంఐ 5 శాతం మేర పెంచుకుంటూ వెళ్తే 20 ఏళ్ల టెన్యూర్‌లో నుంచి 8 సంవత్సరాలు ముందుగానే రుణం తిరిగి చెల్లించేస్తారు. ప్రతి సంవత్సరం 10 శాతం చొప్పున ఈఎంఐ పెంచినట్లయితే 10 ఏళ్లలోనే మీ రుణం తీరిపోతుంది. మీ జీతం లేదా ఆదాయం పెరిగినప్పుడల్లా ఈఎంఐ పెంచుకోవడం వల్ల వడ్డీల భారం తగ్గించుకోవచ్చు. మరోవైపు.. పెద్ద మొత్తంలో రుణం తీసుకున్నప్పుడు బీమా తీసుకోవాలని బ్యాంకులు సూచిస్తాయి. అయితే ఈఎంఐ చెల్లించిన కొద్ది కవరేజీ తగ్గిపోతుంటుంది. కానీ లోన్ ఇచ్చిన బ్యాంకులో కాకుండా ఇతర సంస్థలో ఇన్సూరెన్స్ తీసుకున్నట్లయితే లోన్ చెల్లించేసినా మీకు ఇన్సూరెన్స్ కవరేజీ కొనసాగుతుంది.