వారికి పింఛన్ దేశంలో ఎక్కడైనా, ఏ బ్యాంకు నుంచైనా..

 ఎంప్లాయీస్ పెన్షన్ స్కీమ్- 1995 కింద ఈపీఎస్ పెన్షనర్లకు ప్రధాని నరేంద్ర మోదీ నేతృత్వంలోని కేంద్ర ప్రభుత్వం గుడ్‌న్యూస్ చెప్పింది. ఈ పెన్షనర్ల కోసం సెంట్రలైజ్డ్ పెన్షన్ పేమెంట్ సిస్టమ్ తీసుకొచ్చేందుకు ఈపీఎస్ తెచ్చిన ప్రతిపాదనకు ఉద్యోగుల భవిష్య నిధి సంస్థ ఆమోదం లభించినట్లు కేంద్ర కార్మిక, ఉపాధి శాఖ మంత్రిత్వ శాఖ ఒక ప్రకటనలో తెలిపింది. దీని ద్వారా ఇకపై ఈపీఎస్ పెన్షనర్లు.. దేశంలోని ఎక్కడి నుంచైనా పెన్షన్ అందుకునే వెసులుబాటు కల్పిస్తుంది. అంటే.. ప్రాంతం, బ్యాంక్, బ్రాంచ్‌తో పనిలేకుండా.. ఎక్కడైనా తీసుకోవచ్చన్నమాట. తాజా నిర్ణయంతో.. 78 లక్షల మందికిపైగా పెన్షనర్లకు లబ్ధి చేకూరనున్నట్లు తెలుస్తోంది.

ఇక ఈ నిర్ణయం 2025, జనవరి 1 నుంచి అమల్లోకి, అందుబాటులోకి రానుందని తెలిపారు కేంద్ర కార్మిక శాఖ మంత్రి మన్‌సుఖ్ మాండవీయ. ఈపీఎఫ్‌ఓను ఆధునికీకరించడంలో సెంట్రలైజ్డ్ పేమెంట్ వ్యవస్థ అనేది ఒక కీలక మైలురాయి అని చెప్పారు మన్‌సుఖ్. దీనితో పెన్షనర్లు ఎన్నో ఏళ్లుగా వినిపిస్తున్న డిమాండ్‌కు పరిష్కారం లభిస్తుందని ఆయన అన్నారు.

తాజా నిర్ణయంతో.. పెన్షనర్లు అంతా.. తాము దేశంలో ఉన్న ఏ ప్రాంతం నుంచి అయినా.. ఏ బ్యాంకుకు చెందిన ఏ బ్రాంచ్ నుంచి అయినా పింఛన్ అందుకోవచ్చని మాండవీయ వివరించారు. ఇక మీదట.. పెన్షనర్లు ప్రాంతాలు మారినా కానీ.. పెన్షన్ పేమెంట్ ఆర్డర్ బదిలీ చేసుకోవాల్సిన అవసరం కూడా ఉండదని.. ఏదైనా బ్యాంక్ లేదా బ్రాంచ్‌ను కూడా మార్చుకోవాల్సిన అవసరం లేకుండా ఇకపై వెసులుబాటు కలగనుందని స్పష్టం చేశారు.

>> ఇక ప్రస్తుతం ఉన్న పెన్షన్ పంపిణీ వ్యవస్థలో.. CPPS సమూల మార్పులకు శ్రీకారం చుట్టనుంది. ప్రస్తుతం EPFO జోనల్ లేదా రీజనల్ ఆఫీసులు కేవలం 3-4 బ్యాంకులతో మాత్రమే ఒప్పందాల్ని కలిగి ఉన్నాయి. పెన్షన్ ప్రారంభంలో.. పింఛన్ దారులు వెరిఫికేషన్ కోసం సదరు బ్యాంకులకు వెళ్లాల్సి ఉంటుంది. ఇప్పుడు సెంట్రలైజ్డ్ విధానంతో.. బ్యాంకు బ్రాంచ్‌కు వెళ్లాల్సిన అవసరం కూడా ఉండదు. ఇంకా.. పెన్షన్ విడుదల అయిన వెంటనే.. ఆ మొత్తం కూడా అకౌంట్లో జమవుతుంది. కొత్త వ్యవస్థతో.. పింఛన్ పంపిణీ చేసేందుకు అయ్యే ఖర్చు కూడా తగ్గనున్నట్లు భావిస్తోంది ఈపీఎఫ్ఓ. నెక్ట్స్ ఫేజ్‌లో ఆధార్ ఆధారిత పేమెంట్ సిస్టమ్ కూడా తీసుకురానున్నట్లు మన్‌సుఖ్ చెప్పుకొచ్చారు.