దాయాది పాక్‌ను చిత్తు చేసిన భారత్‌.. ఆసియా హాకీ టోర్నీలో సెమీస్‌లోకి అడుగు

దాయాది పాకిస్థాన్‌పై భారత్ మరోసారి పైచేయి సాధించింది. అదేంటి క్రికెట్‌ మ్యాచ్‌లు లేవు కదా అంటారా..? అవును నిజమే ఇప్పుడు క్రికెట్‌ మ్యాచ్‌లు అయితే లేవు. కానీ పాకిస్థాన్‌ను మాత్రం భారత్ మట్టికరిపించిందనేది మాత్రం నిజం. అసలు విషయం ఏమిటంటే.. చైనాలో జరుగుతున్న ఆసియా ఛాంపియన్స్ ట్రోఫీ 2024లో భారత పురుషుల హాకీ జట్టు.. పాకిస్థాన్‌ను ఓడించింది. హర్మన్‌ ప్రీత్‌ సింగ్‌ సారథ్యంలో భారత హాకీ జట్టు పాకిస్థాన్‌ను 2-1తో ఓడించింది. దీంతో ఈ టోర్నీలో వరుసగా ఐదో విజయాన్ని నమోదు చేసింది. ఈ విజయంతో భారత్‌ సెమీఫైనల్‌లోకి అడుగుపెట్టింది.

పాకిస్థాన్‌తో జరిగిన మ్యాచ్‌లో డిఫెండింగ్ ఛాంపియన్ భారత్‌కు ఆరంభంలోనే షాక్‌ తగిలింది. మ్యాచ్‌ ప్రారంభమైన కాసేపటికే అంటే 8వ నిమిషంలోనే పాకిస్థాన్‌కు చెందిన అహ్మద్ నదీమ్ గోల్‌ చేశాడు. దీంతో పాకిస్థాన్ ఆధిక్యంలోకి వెళ్లింది. అయితే ఈ ఆనందం ఎంతోసేపు నిలవలేదు. భారత కెప్టెన్‌ హర్మన్‌ప్రీత్ సింగ్‌ పాకిస్థాన్ గోల్‌ చేసిన ఐదు నిమిషాలకే గోల్‌ కొట్టాడు. దీంతో స్కోరు 1-1తో సమమైంది. ఆ తర్వాత కొన్ని నిమిషాలకే మరో గోల్‌ చేసిన హర్మన్‌ప్రీత్‌.. భారత్‌ను ఆధిక్యంలోకి నెట్టాడు. ఆ తర్వాత ఇదే లీడ్‌ను చివరివరకు కొనసాగించిన భారత్.. ఆజేయంగా సెమీఫైనల్‌ చేరింది. అంతకుముందు భారత్‌.. చైనాను 3-0తో, జపాన్‌ను 5-1తో, మలేసియాను 8-1తో, దక్షిణ కొరియాను 3-1తో ఓడించింది. సోమవారం సెమీ ఫైనల్ జరగనుంది.

ఇక మరో మ్యాచ్‌లో ఆతిథ్య జపాన్‌ను.. చైనా 2-0తో ఓడించింది. ఫలితంగా సెమీపైనల్‌ చేరింది. దీంతో జపాన్‌ టోర్నీ నుంచి నిష్క్రమించింది. ఇక ఈ టోర్నీ పాయింట్ల ప‌ట్టిక‌లో అగ్ర‌స్థానంలో ఉన్న భార‌త్‌, నాలుగో స్థానంలోని కొరియాతో సెమీఫైనల్‌ మ్యాచ్‌ జరగనుంది. సెప్టెంబ‌ర్ 16వ తేదీన‌ ఈ రెండు జట్ల మధ్య తొలి సెమీస్ జ‌రుగ‌నుంది. అదే రోజు రెండో సెమీఫైన‌ల్లో పాకిస్థాన్‌, చైనాలు తలపడతాయి. ఈ టోర్నీలో ఐదు, ఆరో స్థానం కోసం జ‌పాన్, మ‌లేషియాలు తలపడనున్నాయి.