గుడ్‌న్యూస్ చెప్పిన పవన్ కళ్యాణ్.. త్వరలో అకౌంట్లలోకి రూ.750 కోట్లు

ఆంధ్రప్రదేశ్ పంచాయతీ రాజ్ ఛాంబర్, సర్పంచ్‌ల సంఘాల ప్రతినిధులతో డిప్యూటీ సీఎం, పంచాయతీ రాజ్ శాఖ మంత్రి పవన్ కళ్యాణ్ ఇవాళ (గురువారం) సమావేశం అయ్యారు. ఈ సందర్భంగా పంచాయతీరాజ్‌ శాఖ నిధులపై వారందరికీ శుభవార్త తెలిపారు. త్వరలోనే పంచాయతీల ఖాతాలకు నిధులు విడుదల చేయనున్నట్లు వెల్లడించారు. పంచాయతీల కోసం రూ.750 కోట్లు.. 15వ ఆర్ధిక సంఘం నిధుల కింద విడుదల కాబోతున్నాయని వివరించారు. ఈ క్రమంలోనే గతంలో అధికారంలో ఉన్న ప్రభుత్వం లాగా.. తమ ప్రభుత్వంలో పంచాయతీల నిధులను దారి మళ్లించే పరిస్థితి లేదని తేల్చి చెప్పారు.

15వ ఆర్థిక సంఘం నిధుల్లో భాగంగా ఏ పంచాయతీకి కేటాయించిన నిధులను ఆ పంచాయతీని అభివృద్ధి చేసేందుకు ఉపయోగించాలని పవన్ కళ్యాణ్.. ఈ సందర్భంగా సూచించారు. వైఎస్ జగన్ మోహన్ రెడ్డి నేతృత్వంలోని వైసీపీ హయాంలో పంచాయతీల నిధులను మళ్లించినట్లు.. కూటమి ప్రభుత్వం అలా చేయదని స్పష్టం చేశారు. గ్రామీణ వ్యవస్థ బలోపేతానికి తెలుగుదేశం జనసేన బీజేపీ కూటమి ప్రభుత్వం పెద్ద పీట వేస్తుందని వెల్లడించారు. వెదురు, బయో డీజిల్ మొక్కల పెంపకంతో గ్రామ పంచాయతీల ఆదాయం పెరుగుతుందని పవన్ కళ్యాణ్ వివరించారు.

ఇక రాష్ట్రవ్యాప్తంగా ఇంటింటికీ 24 గంటల పాటు తాగు నీటిని సరఫరా చేసేందుకు కేంద్ర ప్రభుత్వం తీసుకువచ్చిన జల్ జీవన్ మిషన్ పనులు జరుగుతున్నాయని డిప్యూటీ సీఎం వెల్లడించారు. పల్లె పండుగ పనుల నాణ్యతను సర్పంచులే పర్యవేక్షించుకోవాలని ఈ సందర్భంగా ఆదేశాలు జారీ చేశారు. కూటమి సర్కార్ మొండి ప్రభుత్వం కాదని.. సమస్యలను సానుకూలంగా వినే ప్రభుత్వం అని పవన్ కళ్యాణ్ తెలిపారు. పంచాయతీల సమస్యలను తెలుసుకునేందుకు ప్రతి నెలా సమావేశం నిర్వహిస్తామని ఈ సందర్భంగా వారందరికీ పవన్ కళ్యాణ్ హామీ ఇచ్చారు.

సర్పంచ్‌లు ఇచ్చిన 16 డిమాండ్లలో కీలకమైన వాటిని గుర్తించి వాటిని పూర్తి చేసినట్లు పవన్ తెలిపారు. కేరళలో పనిచేస్తున్న ఐఏఎస్ అధికారి కృష్ణతేజను డిప్యూటేషన్ మీద ఆంధ్రప్రదేశ్‌కు తీసుకువచ్చామని.. ఆయన సహకారం వల్లే ప్రస్తుతం గ్రామాల అభివృద్ధికి ప్రణాళికలు సిద్ధం చేసి వాటిని అమలు చేస్తున్నామని వివరించారు. తన పేషీలో ప్రజలకు మేలు చేద్దామనే ఆకాంక్ష ఉన్న అధికారులు ఉండటం తన అదృష్టమని పవన్ కళ్యాణ్ చెప్పారు. ఎంపీ ల్యాడ్స్ నిధుల ద్వారా కమ్యూనిటీ హాల్స్ నిర్మాణాలు పూర్తి చేస్తామని హామీ ఇచ్చారు. 2014 నుంచి 2019 వరకు చేసిన పనులకు.. గత ప్రభుత్వం నిధులు విడుదల చేయలేదని.. వాటిని విడుదల చేసేందుకు కేబినెట్‌లో చర్చించినట్లు చెప్పారు.

పంచాయతీలకు నిధులు ఎక్కువ కావాలని.. అవి స్వయం పోషక పంచాయతీలుగా ఎదగాలని పవన్ కళ్యాణ్ ఆకాంక్షించారు. ఆయా అంశాలను ముఖ్యమంత్రి, ఆర్థిక శాఖ దృష్టికి తాను తీసుకువెళ్తానని వారికి పవన్ చెప్పారు. ప్రధానమంత్రి నరేంద్ర మోదీ కూడా గ్రామీణాభివృద్ధికి ఎంతో ప్రాధాన్యం ఇస్తున్నారని ఈ సందర్భంగా తెలిపారు. పంచాయతీ రాజ్ వ్యవస్థను పూర్తిగా బలోపేతం చేసేలా సీఎం చంద్రబాబు నాయకత్వంలో తాము పని చేస్తున్నట్లు పవన్ కళ్యాణ్ వివరించారు.