కశ్మీర్‌లో ఆగని ఉగ్రదాడులు.. విలేజ్ డిఫెన్స్ గార్డుల్ని అపహరించి దారుణ హత్య

జమ్మూ కశ్మీర్‌లో ఉగ్రవాదుల దారుణాలు కొనసాగుతున్నాయి. తాజాగా, కిష్టావర్‌లో ఇద్దరు విలేజ్ డిఫెన్స్ గార్డులను అపహరించి, దారుణంగా హత్య చేశారు. ఆదివారం శ్రీనగర్ మార్కెట్‌లో జరిగిన గ్రనేడ్ దాడిలో 12 మంది గాయపడిన విషయం తెలిసిందే. ఈ ఘటన జరిగిన నాలుగు రోజుల వ్యవధిలోనే తాజా దాడి చోటుచేసుకోవడం గమనార్హం. గురువారం కిష్టావర్ అధ్వారీ‌లోని ముంజ్లా ధర్ అటవీ ప్రాంతంలో నజీర్ అహ్మద్, కులదీప్ కుమార్ అనే గ్రామ రక్షణ దళ సభ్యులను ఉగ్రవాదులు అపహరించి, కాల్చి చంపారని అధికారులు తెలిపారు. ఆ ప్రాంతంలో ఉగ్రవాదుల కోసం భారీ ఎత్తున గాలింపు చేపట్టినట్టు వెల్లడించారు.

కులదీప్ కుమార్ సోదరుడు పృథ్వీ మాట్లాడుతూ.. ‘నా సోదరుడు, అహ్మద్‌లను ఉగ్రవాదులు కిడ్నాప్ చేసి దారుణంగా కాల్చి చంపారని మాకు సమాచారం వచ్చింది.. విలేజ్ డిఫెన్స్ గార్డులుగా పనిచేస్తున్నవారు ఎప్పటిలాగే పశువులను మేపడానికి అటవీ ప్రాంతానికి వెళ్లారు’ అని చెప్పారు. కాగా, ఈ హత్యలను తామే చేసిన జైషే మహమ్మద్ అనుబంధం ఉగ్రవాద సంస్థ కశ్మీరీ టైగర్స్ ప్రకటించింది. వారి మృతదేహాలకు సంబంధించిన ఫోటోలను షేర్ చేసింది.

ఈ హత్యలను జమ్మూ కశ్మీర్ లెఫ్టినెంట్ గవర్నర్ మనోజ్ సిన్హా, ముఖ్యమంత్రి ఒమర్ అబ్దుల్లా సహా కాంగ్రెస్, బీజేపీ నాయకులు ఖండించారు. ‘కిష్టావర్‌లో గ్రామ రక్షక దళ సభ్యులపై ఉగ్రవాదుల హేయమైన దాడిని తీవ్రంగా ఖండిస్తున్నాం.. పిరికిపందల దాడిలో కుమారులను కోల్పోయిన అమరుల కుటుంబాలకు నా ప్రగాఢ సానుభూతి తెలుపుతున్నాను.. ఈ దారుణానికి తప్పక ప్రతీకారం తీర్చుకుని.. ఉగ్రవాద సంస్థలను నామరూపాల్లేకుండా చేస్తాం’ అని మనోజ్ సిన్హా ట్వీట్ చేశారు.

నేషనల్ కాన్సెరెన్స్ పార్టీ చీఫ్ ఫరూక్ అబ్దుల్లా, సీఎం ఒమర్ అబ్దులా ఈ హత్యలను తీవ్రంగా ఖండించారు. ‘ఇటువంటి అనాగరిక హింసాత్మక చర్యలు జమ్మూ కశ్మీర్‌లో దీర్ఘకాలిక శాంతిని సాధించడంలో గణనీయమైన అవరోధంగా ఉన్నాయి. బాధిత కుటుంబాలకు మా ప్రగాఢ సానుభూతి.. ఈ దుఃఖ సమయంలో వారికి ఆ భగవంతుడు శక్తి నివ్వాలని ప్రార్ధిస్తున్నాం’ అని ఎక్స్‌లో పోస్ట్ చేశారు.

మరోవైపు, గురువారం ఉత్తర కశ్మీర్‌లోని సోపోర్‌లో ఉగ్రవాదులు, సైన్యం మధ్య ఎదురుకాల్పులు మొదలయ్యాయి. ఆ ప్రాంతంలో ఉగ్రవాదులున్నారనే సమాచారంతో భద్రతా బలగాలు అక్కడకు చేరుకుని తనిఖీలు చేపట్టారు. ఈ క్రమంలో ఉగ్రవాదులు కాల్పులు జరపడంతో సైన్యం ఎదురుకాల్పులు ప్రారంభించింది. ఇద్దరు లేదా ముగ్గురు ఉగ్రవాదులు అక్కడ నక్కినట్టు సైనిక వర్గాలు తెలిపాయి. శ్రీనగర్ పేలుళ్ల ఘటన తర్వాత.. వీలైనంత త్వరగా పెరుగుతున్న ఉగ్రవా దాడులను నియంత్రించాలని భద్రతా బలగాలకు సీఎం ఫరూక్ అబ్దుల్లా విజ్ఞ‌ప్తి చేశారు.