ముఖ్యమంత్రి సమోసాలు తిన్న సెక్యూరిటీ.. రంగంలోకి సీఐడీ

హిమాచల్ ప్రదేశ్‌ రాజకీయాల్లో ప్రస్తుతం సమోసా వ్యవహారం హాట్ టాపిక్‌గా మారింది. దీంతో ఆ రాష్ట్రంలో ఉన్న అధికార కాంగ్రెస్, ప్రతిపక్ష బీజేపీ తీవ్ర విమర్శలు గుప్పించుకుంటున్నాయి. అయితే దీనికి కారణం.. సీఎం వస్తున్నారని తెలిసి.. అధికారులు తీసుకువచ్చిన సమోసాలను.. అక్కడ ఉన్న సెక్యూరిటీ తినడంతో.. ఈ ఘటనపై హిమాచల్ ప్రదేశ్ ప్రభుత్వం సీఐడీ విచారణకు ఆదేశించింది అంటూ బీజేపీ నేతలు ఆరోపించారు. అదేమీ లేదని కాంగ్రెస్ పార్టీ కొట్టిపారేసింది. దీనిపై సీఐడీ అధికారులు కూడా స్పందించారు. అయినప్పటికీ ఈ వ్యవహారం కొలిక్కి రాకపోవడంతో.. చివరికి ముఖ్యమంత్రి సుఖ్విందర్ సింగ్ సుఖు రంగంలోకి దిగారు. ఇంతకీ ఏం జరిగిందంటే?

గత నెల 21వ తేదీన హిమాచల్ ప్రదేశ్ ముఖ్యమంత్రి సుఖ్విందర్ సింగ్ సుఖు.. సీఐడీ కార్యాలయానికి వెళ్లారు. ఈ నేపథ్యంలోనే సీఎం రాకతో.. ఫేమస్ రెస్టారెంట్ నుంచి.. సీఐడీ అధికారులు సమోసాలు తెప్పించారు. అయితే ఆ సమోసాలను సీఐడీ కార్యాలయంలోని సెక్యూరిటీ సిబ్బంది తిన్నట్లు సమాచారం. అయితే సీఎం కోసం తీసుకువచ్చిన ఆ సమోసాలను ఎవరు తిన్నారు, అసలు అవి ఎలా మిస్‌ అయ్యాయే కనిపెట్టేందుకు సీఐడీ అధికారులు విచారణకు ఆదేశించినట్లు స్థానిక మీడియాలో కథనాలు రావడం తీవ్ర దుమారానికి కారణం అయింది.

దీంతో ప్రతిపక్షంలోని బీజేపీ తీవ్ర విమర్శలు గుప్పించింది. సమోసాల కోసం సీఐడీ విచారణ ఏంటి అని.. ఇది ఒక జోక్ అని మండిపడింది. సీఎం కోసం తెచ్చిన సమోసాలను ఇతరులు తింటే ఏమవుతుందని ప్రశ్నించింది. ఈ క్రమంలోనే స్పదించిన బీజేపీ నేత అమిత్ మాలవీయ.. "సీఎం తినాల్సిన సమోసాలను తీసుకెళ్లిందెవరు..? సీఐడీ తేల్చనుంది..?’’ అని ట్వీట్ చేశారు.

ఇక ఈ సమోసాల వ్యవహారం రాజకీయంగా హిమాచల్ ప్రదేశ్‌లో తీవర్ దుమారానికి కారణం అవుతుండటంతో స్వయంగా సీఎం సుఖ్విందర్ సింగ్ సుఖు స్పందించాల్సి వచ్చింది. సమోసాల మిస్సింగ్‌పై సీఐడీ విచారణ అంటూ జరుగుతున్న ప్రచారంలో నిజం లేదని తేల్చి చెప్పారు. అసలు అలాంటిదేమీ లేదన్న సీఎం.. సీఐడీ విచారణ జరుపుతున్న విషయం వేరని తేల్చి చెప్పారు. కానీ అది సమోసా కోసం అంటూ ప్రచారం చేస్తున్నారని సుఖ్విందర్ సింగ్ సుఖు తీవ్ర ఆగ్రహం వ్యక్తంచేశారు.

ఇదే ఘటనపై సీఐడీ అధికారులు కూడా స్పందించారు. ఇదంతా సీఐడీ అంతర్గత వ్యవహారం అని.. దాన్ని రాజకీయం చేయొద్దని తెలిపారు. సీఎం సుఖు సమోసాలు తినరు అని.. తాము ఎవరికీ నోటీసులు ఇవ్వలేదని చెప్పారు. అసలు ఏం జరిగిందో తెలుసుకోవాలని ఆదేశించినట్లు క్లారిటీ ఇచ్చారు. ఈ విషయంతో ప్రభుత్వానికి ఎలాంటి సంబంధం లేదని.. ఈ విషయం బయటికి ఎలా లీక్‌ అయిందో తెలుసుకుంటామని సీఐడీ డీజీ సంజీవ్‌ రంజన్ మీడియాకు వెల్లడించారు.