పవన్, అనిత గారూ.. క్షమించి వదిలేయండి.. వేడుకున్న శ్రీరెడ్డి

సినీ నటి శ్రీరెడ్డి వైసీపీ మద్దతుదారులనేదీ అందరికీ తెలిసిన విషయమే. సోషల్ మీడియా వేదికగా వైసీపీకి, వైఎస్ జగన్‌ను అనుకూలంగా శ్రీరెడ్డి పోస్టులు, వీడియోలు పెడుతుంటారు. ఈ క్రమంలోనే టీడీపీ నేతలపైనా, ఆ పార్టీపైనా తనదైన శైలిలో విమర్శలు గుప్పిస్తుంటారు శ్రీరెడ్డి. అయితే తాజాగా శ్రీరెడ్డి. అధికార పార్టీ నేతలకు సారీ చెప్పారు. సీఎం చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రులు నారా లోకేష్, వంగలపూడి అనితలకు శ్రీరెడ్డి క్షమాపణలు చెప్పారు. ఈ మేరకు ఓ వీడియో విడుదల చేశారు. ఇకపై మీ కుటుంబ సభ్యుల గురించి సోషల్ మీడియాలో తప్పుగా మాట్లాడనంటూ చెప్పుకొచ్చిన శ్రీరెడ్డి.. తమ కార్యకర్తలను దయచేసి వదిలిపెట్టాలని విజ్ఞప్తి చేస్తున్నాంటూ వీడియో విడుదల చేశారు.

" పిచ్చుకలపై బ్రహ్మాస్త్రాలు వేయడం కరెక్ట్ కాదు. శరణు అన్నవారిని కూడా అరెస్ట్ చేయడం సరైంది కాదు. ఫైట్ చేయాలనుకుంటే హీరోతో పోరాటం చేయాలి కానీ.. సైడ్ క్యారెక్టర్లతో కాదు. స్థానికంగా ఉన్న కార్యకర్తలను పట్టుకుని చిత్రహింసలు పెడుతున్నారు. పైనున్న వాళ్లు బాగానే సంపాందించుకుంటున్నారు. కింద ఉన్న కార్యకర్తలు గుర్తింపు కోసం దూకుడుగా మాట్లాడుతారు. రాజకీయంగా ఎదగాలనే కక్కుర్తితోనే మేము పనిచేస్తున్నాం. రాష్ట్రంలో ఇన్ని హత్యలు జరుగుతున్నా పట్టించుకోవడం లేదు. మీ సోషల్ మీడియాలో అసభ్యకరమైన పోస్టులను పట్టించుకోవడం లేదు. వారిని అరెస్ట్ చేయడం లేదు. ఇదేమైనా రాజనీతా? రాజనీతిలో మహిళలు, చిన్నారులను, శరణు అన్నవారిని వదిలేస్తారు. కానీ ఇలానా?"

"మీ అందరికీ పిల్లలు ఉన్నారు. మా ఇళ్లల్లోనూ పిల్లలున్నారు. పవన్ కళ్యాణ్ గారూ, లోకేష్ గారూ అధికారాన్ని ఉపయోగించి మంచి పనులు చేయండి. పెద్దవాళ్లతో పోరాటం చేయాల్సింది పోయి.. సోషల్ మీడియా కార్యకర్తలతో ఏంటండి. నారా లోకేష్, పవన్ కళ్యాణ్ గారి కుటుంబసభ్యులకు నా క్షమాపణలు. అనిత గారికి క్షమాపణలు. నా కుటుంబాన్ని దృష్టిలో పెట్టుకుని, నా భవిష్యత్తును దృష్టిలో ఉంచుకుని.. ఎలాంటి ఇబ్బందులు రాకుండా ఉండేందుకు, నా సోషల్ మీడియాలో మీ గురించి, మీ కుటుంబసభ్యుల గురించి ఎలాంటి తప్పుడు పోస్టులు రావని చెప్తున్నా. అలాగే యుద్ధాన్ని కార్యకర్తలతో కాకుండా, నేతలతో చేయాలని వేడుకుంటున్నా. కార్యకర్తల కుటుంబాలను ఇబ్బంది పెట్టొద్దని, వారిని క్షమించాయని వేడుకుంటున్నా." అంటూ శ్రీరెడ్డి వీడియో విడుదల చేశారు.