బంగాళాఖాతంలో అల్పపీడనం.. ఏపీలో వచ్చే మూడ్రోజులు వానలు

ఆంధ్రప్రదేశ్‌ను వరుణుడు మరోసారి పలకరించనున్నాడు. మొన్నటి వరకూ ఏపీ వ్యాప్తంగా విస్తారంగా వర్షాలు కురిశాయి. రాయలసీమ, ఉత్తర కోస్తా జిల్లాల్లో భారీగా వానలు పడ్డాయి. వాగులూ, వంకలు పొంగిపొర్లాయి. అయితే ఇప్పుడు మరోసారి వర్షాలు కురుస్తాయని వాతావరణ శాఖ చెబుతోంది. నైరుతి బంగాళాఖాతంపై ఉపరితల ఆవర్తనం ఏర్పడినట్లు వాతావరణ శాఖ తెలిపింది. రాగల 48 గంటల్లో ఈ ఆవర్తనం అల్పపీడనంగా మారే అవకాశం ఉందని వాతావరణశాఖ అధికారులు అంచనా వేస్తున్నారు. దీని ప్రభావంతో వచ్చే మూడు రోజులు ఏపీలో పలుచోట్ల వర్షాలు కురిసే అవకాశం ఉందని వాతావరణ శాఖ అధికారులు వెల్లడించారు. ఈ అల్పపీడనం తమిళనాడు, శ్రీలంక తీరాల వైపు కదులుతుందని వాతావరణ శాఖ అధికారులు చెప్తున్నారు.

 ఆవర్తనం, అల్పపీడనం ప్రభావంతో ఏపీలో మూడు రోజుల పాటు వర్షాలు కురవనున్నాయి. ఉత్తర కోస్తా, యానాంలలో కొన్నిచోట్ల తేలికపాటి నుంచి మోస్తరు వర్షాలు కురిసే అవకాశం ఉందని వాతావరణశాఖ తెలిపింది. అలాగే దక్షిణ కోస్తా, రాయలసీమ జిల్లాల్లోనూ శనివారం కొన్నిచోట్ల వర్షం కురిసే అవకాశం ఉందని వెల్లడించింది. పదో తేదీ అంటే ఆదివారం దక్షిణ కోస్తా, రాయలసీమ జిల్లాలలో పలుచోట్ల తేలికపాటి నుంచి మోస్తరు వర్షం కురుస్తుందని వాతావరణశాఖ అధికారులు తెలిపారు, శుక్రవారం బాపట్ల, పల్నాడు, ప్రకాశం, నెల్లూరు, కర్నూలు, నంద్యాల, అన్నమయ్య, చిత్తూరు, తిరుపతి జిల్లాల్లోని కొన్ని ప్రాంతాల్లో తేలికపాటి వర్షం కురిసింది.

మరోవైపు ఆవర్తనం, అల్పపీడనం ప్రభావంతో ఏపీలో తీరం వెంబడి ఇప్పటికే గాలులు వీస్తున్నాయి. ఈ నేపథ్యంలో తీర ప్రాంత ప్రజలు, లోతట్టు ప్రాంతవాసులు అప్రమత్తంగా ఉండాలని అధికారులు సూచిస్తున్నారు. వీటి ప్రభావంతో పగటి పూట ఉష్ణోగ్రతలు తగ్గుతాయని.. అలాగే రాత్రివేళ చలిగాలులు వీస్తాయని చెప్తున్నారు.

ఇక అల్పపీడనం ప్రభావం తమిళనాడుపై ఎక్కువగా ఉండనుంది. దీంతో జాలర్లు చేపల వేటకు వెళ్లవద్దని అక్కడి ప్రభుత్వం ఇప్పటికే మత్స్యకారులను ఆదేశించింది. 19 జిల్లాలలో రెండు రోజులు భారీ వర్షాలు కురుస్తాయన్న అంచనాల నేపథ్యంలో.. చెన్నై, తిరువళ్లూర్, కాంచీపురానికి ఆరెంజ్ అలెర్ట్ జారీ చేశారు.