సచివాలయంలో పవన్ కళ్యాణ్, వంగలపూడి అనిత భేటీ.. కారణం ఇదే!

ఆంధ్రప్రదేశ్‌లో గత కొన్ని రోజులుగా జరుగుతున్న ఘటనలపై ఇటీవల జనసేన అధినేత, డిప్యూటీ సీఎం పవన్ కళ్యాణ్ సంచలన వ్యాఖ్యలు చేశారు. ఇలాంటి ఘటనలు ఉపేక్షించకూడదని పేర్కొన్న పవన్.. అవసరం అయితే తానే హోం మంత్రి పదవిని చేపడతానని తేల్చి చెప్పారు. దీంతో పవన్ కళ్యాణ్ వ్యా్ఖ్యలపై సానుకూలంగా స్పందించిన హోంమంత్రి అనిత.. ఆయన చేసిన వ్యాఖ్యలకు వివరణ ఇచ్చారు. అదే సమయంలో కూటమిలో మంత్రులు చెరో మాట మాట్లాడటం.. వైసీపీకి ఆయుధంగా మారింది. దీంతో ప్రభుత్వంపై తీవ్ర విమర్శలు గుప్పించింది. ఈ నేపథ్యంలోనే తాజాగా డిప్యూటీ సీఎం పవన్ కళ్యాణ్, హోంశాఖ మంత్రి వంగలపూడి అనిత.. రాష్ట్ర సచివాలయంలో భేటీ కావడం తీవ్ర ప్రాధాన్యం సంతరించుకుంది.

సోషల్ మీడియాలో ప్రభుత్వానికి వ్యతిరేకంగా చేస్తున్న పోస్టులు.. ఇలాంటి ఘటనలపై పోలీసులు తీసుకుంటున్న చర్యలపై పవన్ కళ్యాణ్ తీవ్ర అసహనం వ్యక్తం చేశారు. ఈ క్రమంలోనే తాను హోం మంత్రి పదవిని చేపడితే రాష్ట్రంలో పరిస్థితులు వేరుగా ఉంటాయని హెచ్చరించారు. ఈ నేపథ్యంలోనే తాజాగా సెక్రటేరియట్‌లో పవన్ కళ్యాణ్, హోంమంత్రి అనిత భేటీ కావడం తీవ్ర ఆసక్తిని రేకెత్తించింది. ఈ భేటీ తర్వాత హోంమంత్రి అనిత.. ట్వీట్ చేశారు.

‘‘రాష్ట్ర సచివాలయంలో డిప్యూటీ సీఎం పవన్ కళ్యాణ్ గారితో మర్యాదపూర్వకంగా సమావేశం కావడం జరిగింది. రాష్ట్రంలో గత కొన్ని రోజులుగా జరుగుతున్న పరిణామాలు.. వాటిపై హోంశాఖ తీసుకుంటున్న చర్యలను డిప్యూటీ సీఎం పవన్ కళ్యాణ్ దృష్టికి తీసుకెళ్లడం జరిగింది. ఆంధ్రప్రదేశ్‌లో మహిళలు, చిన్నారులపై జరుగుతున్న నేరాలు, ఇతర అఘాయిత్యాల విషయంలో ప్రత్యేకంగా దృష్టి సారించాలని ఆయన సూచించారు. రాష్ట్రంలో ఆడబిడ్డలకు అన్యాయం చేసిన వారిని చట్టప్రకారం కఠినంగా శిక్షించేలా గట్టి చర్యలు తీసుకోవాలని పేర్కొన్నట్లు చెప్పారు. జన సంక్షేమం, శ్రేయస్సు కోసం ప్రతిక్షణం పరిశ్రమించే ప్రజా ప్రభుత్వం మా కూటమి ప్రభుత్వం’’ అని హోం శాఖ మంత్రి వంగలపూడి అనిత ట్విటర్‌లో రాసుకొచ్చారు.

ఈ భేటీలో భాగంగా పవన్ కళ్యాణ్‌, హోంమంత్రి అనిత.. ఫేక్ పోస్టులపై ప్రభుత్వం తీసుకుంటున్న చర్యలపై చర్చించారు. ఈ సందర్భంగా తాను కూడా ఫేక్ పోస్ట్‌లకు బాధితురాలినే అంటూ పవన్ కళ్యాణ్‌కు అనిత వివరించారు. తన కుమార్తె కన్నీరు చూసే తాను ఇటీవల కొన్ని వ్యాఖ్యలు చేశానని ఈ సందర్భంగా వంగలపూడి అనితకు పవన్ కళ్యాణ్ తెలిపారు.