కిడ్నాపర్ల చెరలో చనిపోయినట్టు నటించి.. ప్రాణాలు కాపాడుకున్న యోగా టీచర్

34 ఏళ్ల యోగా టీచర్‌ను కిడ్నాప్ చేసి.. హత్య చేయడానికి ప్రయత్నించిన కేసులో.. కర్ణాటకలోని చిక్‌బళ్లాపూర్ పోలీసులు ఓ డిటెక్టివ్ ఏజెన్సీ యజమాని సతీష్ రెడ్డిని అరెస్ట్ చేశారు. ఆయనతోపాటు ఈ కేసులో మరో ముగ్గుర్ని అదుపులోకి తీసుకున్నారు. తాను చనిపోయానని భావించిన నిందితులు.. ఓ నిర్మానుష్య ప్రదేశంలో గుంతలో పడేసి వెళ్లారని.. కానీ యోగా టెక్నిక్స్ సాయంతో చనిపోయినట్లు నటించిన తాను తప్పించుకోగలిగానని బాధితురాలు తెలిపారు. ఆమెను హత్య చేయడం కోసం నిందితులు పథకం ప్రకారమే ముందుగా ఓ వాహనాన్ని దొంగిలించారని పోలీసులు తెలిపారు.

సతీశ్ రెడ్డి కొద్ది రోజులు యోగా నేర్చుకున్న తర్వాత.. అక్టోబర్ 24న రైఫిల్ షూటింగ్ నేర్పిస్తానని చెప్పి కారులో తీసుకెళ్లాడు. అప్పటికే కారులో ముగ్గురు ఉండటంతో యోగా టీచర్ మనసు కీడు శంకించి కారు ఎక్కేందుకు ఒప్పుకోలేదు. కానీ గన్‌పాయింట్‌లో తుపాకీ గురి పెట్టిన నిందితులు ఆమెను కిడ్నాప్ చేశారు.

యోగా టీచర్‌పై దాడి జరిగిన సమయంలో సతీష్ రెడ్డి భార్య బిందు కూడా అక్కడే ఉంది. తన భర్తకు యోగా టీచర్‌తో అఫైర్ ఉందనే అనుమానంతో బిందు ఆమెపై దాడి చేసింది. సతీష్ రెడ్డి, ఆయన అనుచరుల దాడిలో యోగా టీచర్ స్పృహ కోల్పోయింది. యోగా టీచర్ చనిపోయిందని భావించిన సతీష్ రెడ్డి గ్యాంగ్.. ఆమెను అటవీ ప్రాంతానికి తీసుకెళ్లారు. ఓ గుంత తవ్వి అందులో పూడ్చి పెట్టారు. యోగా టెక్నిక్‌ల సాయంతో తాను చనిపోయినట్టు నటించానని.. నిందితులు వెళ్లిపోయిన వెంటనే లేచి అక్కడి నుంచి బయటపడ్డానని బాధితురాలు చెప్పారు. నిర్మానుష్య ప్రాంతం నుంచి తాను 3 కిలోమీటర్లు నడిచి.. దిబ్బురహల్లిలోని వెంకటేశ్‌కు ఇంటికి వచ్చానని ఆమె చెప్పారు. వెంకటేశ్ కుటుంబీకులు ఆమె మంచి నీళ్లు, ఆహారం ఇచ్చి ధైర్యం చెప్పారని.. ఆ తర్వాత పోలీసులకు సమాచారం ఇచ్చిన బాధితురాలు తెలిపారు.

వెంటనే అక్కడికి చేరుకున్న పోలీసులు.. బాధితురాలిని హాస్పిటల్‌లో చేర్పించి, ఆమె స్టేట్‌మెంట్ రికార్డ్ చేశారు. యోగా టీచర్ ఫిర్యాదు మేరకు సతీష్ రెడ్డి, ఇతరులపై కిడ్నాప్, హత్యాయత్నం కేసు నమోదు చేశారు. బుధవారం సతీష్ రెడ్డి దంపతులతోపాటు ఐదుగుర్ని పోలీసులు అరెస్ట్ చేశారు. నేరం చేయడం కోసం నిందితులు కొప్పల్‌లో ఎస్‌యూవీని దొంగిలించారని కూడా పోలీసుల విచారణలో తేలింది.

యోగా టీచర్‌ను హత్య చేయడానికి ముందస్తు పథకం ప్రకారం.. ఓ కారును దొంగిలించిన నిందితుడు.. అది కూడా ఓ డిటెక్టివ్ ఏజెన్సీ నడిపే వ్యక్తి.. ఆమె చనిపోయినట్లు నటిస్తే.. అంత తేలిగ్గా ఎలా నమ్మేశారు..? గుంత తీసి కప్పి పెడితే.. అందులో నుంచి ఆమె ఎలా బయటకు వచ్చిందనే ప్రశ్నలు సహజంగానే తలెత్తుతున్నాయి. ఈ కేసును లోతుగా విచారణ జరిపితే అన్ని ప్రశ్నలకు సమాధానం దొరికే అవకాశం ఉంది.