ఆసక్తికరంగా డబ్ల్యూటీసీ ఫైనల్ రేసు.. పోటీలో 3 జట్లు.. భారత్ ముందున్న ఆప్షన్లు ఏంటి

ప్రపంచ టెస్టు ఛాంపియన్ షిప్ 2023-2025 ఫైనల్ రేసు ఆసక్తికరంగా సాగుతోంది. పాయింట్ల పట్టికలో తొలి రెండు స్థానాల్లో నిలిచిన జట్లు ఫైనల్ మ్యాచ్‌లో తలపడతాయి. అయితే న్యూజిలాండ్‌తో భారత్ సిరీస్ ఓడిపోకంటే ముందు వరకూ భారత్-ఆస్ట్రేలియాలే మరోసారి ఫైనల్ చేరతాయని అంతా అంచనా వేశారు. కానీ సొంతగడ్డపై న్యూజిలాండ్‌తో సిరీస్‌ను 0-3తో కోల్పోయిన భారత్.. అవకాశాలను సంక్లిష్టం చేసుకుంది. ఇదే సమయంలో ఆస్ట్రేలియా కూడా తొలి టెస్టులో భారత్ చేతిలో ఓడిపోవడం, దక్షిణాఫ్రికా వరుస విజయాలతో పాయింట్ల పట్టికలో భారీ మార్పులు చోటు చేసుకుంటున్నాయి.

ఇటీవల పాయింట్ల పట్టికలో రెండో స్థానానికి పడిపోయిన భారత్.. పెర్త్ టెస్టులో విజయంతో మళ్లీ అగ్రస్థానానికి చేరింది. ఇక వరుసగా నాలుగు టెస్టుల్లో గెలిచిన దక్షిణాఫ్రికా అనూహ్యంగా ఆస్ట్రేలియాను వెనక్కి నెట్టి రెండో స్థానానికి చేరింది. దీంతో ఫైనల్ రేసు ఆసక్తికరంగా మారింది. అయితే ప్రస్తుత పరిస్థితుల్లో భారత్ ఫైనల్ చేయాలంటే.. ఏం చేయాలి.. పోటీలో ఉన్న ఇతర జట్లేవి..? ఆస్ట్రేలియాతో జరుగుతున్న బోర్డర్ గవాస్కర్ ట్రోఫీని భారత్ 4-0తో ముగిస్తే.. ఇతర జట్ల ఫలితాలతో సంబంధం లేకుండా భారత్ నేరుగా ఫైనల్ బెర్తును ఖరారు చేసుకుంటుంది. భారత జట్టు ప్రశాంతంగా ఫైనల్ చేరాలంటే ఉన్న ఏకైక మార్గం ఇదే.

ఆసీస్‌తో సిరీస్‌ను 3-1తో గెలిస్తే..

ప్రస్తుతం శ్రీలంకతో జరుగుతున్న టెస్టు సిరీస్‌లో దక్షిణాఫ్రికా తొలి టెస్టులో విజయం సాధించింది. రెండో టెస్టులోనూ దక్షిణాఫ్రికానే విజయం సాధించాలి. అప్పుడే భారత్‌కు మార్గం సుగమం అవుతుంది.

ఆస్ట్రేలియాను 3-2తో ఓడిస్తే..

ఆస్ట్రేలియాతో రెండు మ్యాచ్‌ల టెస్టు సిరీస్‌లో శ్రీలంక జట్టు కనీసం ఒక్క దాన్నైనా డ్రా చేసుకోవాలి. ఈ సిరీస్ వచ్చే ఏడాది జనవరి-ఫిబ్రవరిలో జరగనుంది.

బోర్డర్ గవాస్కర్ ట్రోఫీ 2-2తో సమమైతే..

ఈ ఫలితం భారత అవకాశాలను సంక్లిష్టం చేస్తుంది. అప్పుడు శ్రీలంకతో సిరీస్‌ను దక్షిణాఫ్రికా 2-0తో గెలుచుకోవాలి. అదే సమయంలో ఆస్ట్రేలియాతో రెండు మ్యాచ్‌లు సిరీస్‌ను శ్రీలంక కనీసం 1-0తో కైవసం చేసుకోవాలి.

ఆసీస్‌తో సిరీస్‌ను 2-3తో కోల్పోతే..

ఇక భారత్ ఫైనల్ చేరడమనేది పూర్తిగా ఇతర జట్లపై ఆధారపడి ఉంటుంది. న్యూజిలాండ్- ఇంగ్లాండ్ సిరీస్ 1-1తో సమం కావాలి. దక్షిణాఫ్రికా జట్టు శ్రీలంక, పాకిస్థాన్ జట్లతో సిరీస్‌ను 1-1తో డ్రా చేసుకోవాలి. శ్రీలంక-ఆస్ట్రేలియా మధ్య జరిగే రెండు టెస్టులూ డ్రా కావాలి. ఏ జట్టు ఫలితంతో సంబంధం లేకుండా ఫైనల్ చేరాలంటే బోర్డర్ గవాస్కర్ ట్రోఫీని భారత్ 4-0తో గెలుచుకోవడం ఒక్కటే ఏకైక మార్గం.