డబ్బు కోసం కొడుకు, కోడలిపై పెట్రోల్ పోసి నిప్పెట్టాడు

అవసరాలకు డబ్బులు అడిగితే ఇవ్వలేదని.. కొడుకు, కోడలిపై ఓ వ్యక్తి పెట్రోలు పోసి తగులబెట్టాడు. సంచలనం సృష్టించిన ఈ ఘటన ఒడిశాలోని కటక్ సమీపంలో శనివారం రాత్రి చోటుచేసుకుంది. బారంగ పోలీస్ స్టేషన్ పరిధి బర్సింఘా గ్రామానికి చెందిన గోవర్ధన్‌ రౌత్‌ (65) ఇటీవల తన ఏకైక కుమారుడు దీనబంధు రౌత్‌ (40)కు సుస్మిత పూజ (32) అనే యువతితో వివాహం చేశాడు. తన అవసరాలకు డబ్బులు కావాలని కుమారుడితో గోవర్ధన్ గొడవ శనివారం రాత్రి పెట్టుకొన్నాడు. ఉదయం ఇస్తానని కుమారుడు చెప్పినా వినిపించుకోకుండా ఇప్పుడే కావాలని పట్టుబట్టాడు.

చివరకు అతడు ఇవ్వడం లేదని ఆగ్రహంతో రగిలిపోయాడు. తన వెంట తెచ్చుకున్న పెట్రోల్‌‌ను కొడుకు, కోడలి ఒంటిపై కుమ్మరించి నిప్పంటించాడు. మంటల్లో చిక్కుకున్న దీనబంధు, పూజలు పెరటిలోకి వెళ్లి నీళ్ల పోసుకుని మంటలను ఆర్పుకునే ప్రయత్నం చేశారు. ఈ సమయంలో ఇరుగుపొరుగు వారు వచ్చి మంటలు ఆర్పి ఇద్దరినీ చికిత్స కోసం కటక్‌ ఎస్సీబీ వైద్య కళాశాల ఆసుపత్రికి తీసుకెళ్లారు. పరిస్థితి విషమంగా ఉండటంతో మెరుగైన వైద్యం కోసం ఓ ప్రయివేట్ ఆసుపత్రికి తరలించారు. తీవ్ర గాయాలతో చికిత్స పొందుతూ పూజ ఆదివారం మృతి చెందింది. ప్రస్తుతం దీనబంధు పరిస్థితి విషమంగా ఉంది.

ఈ ఘటనపై కేసు నమోదుచేసిన పోలీసులు.. గోవర్ధన్‌ను అరెస్ట్‌ చేసి దర్యాప్తు చేస్తున్నారు. స్థానికులు ప్రకారం.. వారికి ఓ దుకాణం ఉందని, దానిని అద్దెకు ఇచ్చారని చెప్పారు. షాపు అద్దె విషయంలోనే తండ్రీకొడుకుల మధ్య గొడవ జరిగినట్టు తెలిపారు. ఈ క్రమంలో ముందు కుమారుడిపై పెట్రోల్ పోసి నిప్పంటించడంతో అతడు బయటకు పరుగులు తీశాడు. భర్తను కాపాడేందుకు సుస్మిత ప్రయత్నిస్తే.. ఆమెపై పెట్రోల్ పోశాడు.

కటక్ డీసీపీ జగ్‌మోహన్ మీనా మాట్లాడుతూ.. దీనబందు, సుస్మితలు రాత్రి భోజనం చేస్తుండగా నిందితుడు పెట్రోల్ పోసిన నిప్పంటించారన్నారు. ఈ ఘటనలో ఆమెకు 90 శాతం కాలినగాయాలు, అతడికి 70 శాతం గాయాలైనట్టు తెలిపారు. ప్రస్తుతం దీనబందు పరిస్థితి విషమంగా ఉందన్నారు. గోవర్దన్ తల్లి మాట్లాడుతూ... మేమంతా భోజనం చేస్తున్న సమయంలో హఠాత్తుగా వచ్చి పెట్రోల్ పోసి, నిప్పంటించాడని తెలిపారు. ఎందుకిలా చేస్తున్నాడో అర్ధం కాలేదని, కొద్ది రోజుల నుంచి తండ్రీకొడుకుల మధ్య డబ్బుల కోసం గొడవ జరుగుతోందని నిజమేనని చెప్పారు.