మహిళలేమైనా కుందేళ్లా.. మోహన్ భగవత్‌ ముగ్గురు పిల్లల వ్యాఖ్యలపై రేణుకా చౌదరి ఫైర్

దేశంలో జనాభా తగ్గిపోతుండటం పట్ల తీవ్ర ఆందోళన వ్యక్తం చేసిన రాష్ట్రీయ స్వయం సేవక్ సంఘ్ చీఫ్ మోహన్ భగవత్.. ప్రతీ జంట ముగ్గురు పిల్లలకు జన్మనివ్వాలని పిలుపునివ్వడంపై కాంగ్రెస్ ఫైర్ బ్రాండ్ రేణుకా చౌదరి.. తీవ్రంగా స్పందించారు. ముగ్గురు పిల్లలను కనడానికి మహిళలేమైనా కుందేళ్లా అంటూ నిలదీశారు. ఈ సందర్భంగా దేశంలో ఉన్న నిరుద్యోగ సమస్యను గుర్తు చేసిన రేణుకా చౌదరి.. ఉద్యోగాలు లేకుండా ఖాళీగా తిరుగుతున్నవారికి తమ కుమార్తెలను ఇచ్చి పెళ్లి చేసేందుకు ఎవరూ సిద్ధంగా లేరని ఆమె ఒక జాతీయ వార్తా ఛానల్‌కు ఇచ్చిన ఇంటర్వ్యూలో రేణుకా చౌదరి వెల్లడించారు.

ఉద్యోగాలు లేని యువకులకు.. తమ అమ్మాయిని ఇచ్చి పెళ్లి చేసేందుకు ఎవరూ ఇష్టపడరని ఈ సందర్భంగా రేణుకా చౌదరి విమర్శలు గుప్పించారు. దీంతో దేశంలో నిరుద్యోగ యువకులు పెళ్లిళ్లు లేకుండా బ్రహ్మచారులుగా మిగిలిపోతున్నారని పేర్కొన్నారు. ఉద్యోగాలు లేనప్పుడు భార్యను ఎలా పోషించగలరని రేణుకా చౌదరి ప్రశ్నించారు. వృద్ధులైన తల్లిదండ్రులే తమ కుమారులను చూసుకోవడంతోపాటు పనులు కూడా చేస్తున్నారని.. ఇక ఎక్కువ మంది పిల్లల్ని కనాలని మోహన్‌ భగవత్‌ చెబుతున్నారని విమర్శించారు. వరుసగా పిల్లలను కనడానికి మహిళలేమైనా కుందేళ్లా అలా చెప్పేవాళ్లు ఎంతమంది పిల్లల్ని పెంచగలరని.. వారి అనుభవమేంటో తెలుసు అని రేణుకా చౌదరి ఘాటు వ్యాఖ్యలు చేశారు.

ఈ సందర్భంగా దేశంలో పెరుగుతున్న ఆహార ధరలు, ఆహార కల్తీ, ప్రయాణ ఖర్చులను రేణుకా చౌదరి ప్రస్తావించారు. ఒక కుటుంబంలో ఎవరైనా అనారోగ్యం పాలై ఆస్పత్రిలో చేరితే చికిత్సకు అయ్యే ఖర్చు భారీగా ఉంటోందని.. దాన్ని భరించలేకపోతున్నారని ఆమె గుర్తు చేశారు. ఇది ఇలా ఉంటే జనాభాలో క్షీణత కొనసాగితే సమాజం దానంతట అదే నశించిపోతుందని ఇటీవల ఆరెస్సెస్‌ అధినేత మోహన్‌ భగవత్‌ హెచ్చరించారు. మహారాష్ట్రలోని నాగ్‌పుర్‌లో ఇటీవల నిర్వహించిన ఓ కార్యక్రమంలో పాల్గొన్న ఆయన.. కుటుంబ ప్రాధాన్యం గురించి చెప్పారు. ఈ నేపథ్యంలోనే జనాభా క్షీణతను తగ్గించేందుకు ప్రతి జంట ముగ్గురు పిల్లలకు జన్మనివ్వాలని ఆయన పిలుపునిచ్చారు. ఈ వ్యాఖ్యలను ఖండిస్తూ.. రేణుకా చౌదరి తాజాగా మండిపడ్డారు.