రూ. 50 లక్షల వరకు పర్సనల్ లోన్.. ఎస్‌బీఐ, హెచ్‌డీఎఫ్‌సీ, ఐసీఐసీఐ సహా దేంట్లో వడ్డీ రేట్లు ఎలా

మీరు పర్సనల్ లోన్ తీసుకోవాలని అనుకుంటున్నారా? ముందుగా వడ్డీ రేట్ల గురించే తెలుసుకోవాల్సి ఉంటుంది. వ్యక్తిగత రుణాలపై ఏం తనఖా పెట్టము కాబట్టి ఇక్కడ వడ్డీ రేట్లు సాధారణంగానే ఎక్కువగా ఉంటాయి. ఒక్కో బ్యాంకులో వడ్డీ రేట్లు ఒక్కోలా ఉంటాయని చెప్పొచ్చు. ఇంకా మీరు తీసుకునే నగదు మొత్తం.. లోన్ కాలవ్యవధి.. మీ సిబిల్ స్కోరు ఇలా చాలా అంశాలు లోన్ అర్హతను నిర్దేశిస్తుంటాయి. వడ్డీ రేట్లు కూడా దీనిపైనే ఆధారపడి ఉంటాయి. ముఖ్యంగా మీకు స్థిరాదాయం ఉన్నట్లయితే ఈజీగా లోన్ వచ్చే అవకాశం ఉంటుంది. ఇక్కడ వడ్డీ రేట్లు కూడా కాస్త తగ్గించే అవకాశం ఉంటుంది. మంచి క్రెడిట్ హిస్టరీ ఉండాలి. అంటే గతంలో తీసుకున్న లోన్లు, ఈఎంఐలు నిర్దేశిత సమయానికి చెల్లించినట్లు చూయించాలి. మీకు రుణ దాతతో మంచి సంబంధం ఉండాలి.

ఇప్పుడు డిసెంబర్ నెలలో ప్రముఖ బ్యాంకుల్లో పర్సనల్ లోన్లకు సంబంధించి వడ్డీ రేట్లు ఎలా ఉన్నాయనేది తెలుసుకుందాం. హెచ్‌డీఎఫ్‌సీ బ్యాంకులో వ్యక్తిగత రుణాలపై వడ్డీ రేట్లు 10.75 శాతం నుంచి గరిష్టంగా 24 శాతం వరకు ఉన్నాయి. ప్రాసెసింగ్ ఫీజు రూ. 4999 ప్లస్ జీఎస్టీగా ఉంటుంది. గరిష్టంగా రూ. 40 లక్షల వరకు లోన్ వస్తుంది. టెన్యూర్ ఏడాది నుంచి ఐదేళ్ల వరకు పెట్టుకోవచ్చు. ఐసీఐసీఐ బ్యాంకులో రూ. 50 లక్షల వరకు లోన్ తీసుకోవచ్చు. 1-6 సంవత్సరాల వరకు టెన్యూర్ పెట్టుకోవచ్చు. లోన్ మొత్తం అమౌంట్‌లో 2 శాతం వరకు ప్రాసెసింగ్ ఫీజు ఉంటుంది. ఇక్కడ వడ్డీ రేట్లు 10.85 శాతం నుంచి 16.25 శాతంగా ఉన్నాయి.

యాక్సిస్ బ్యాంకులో పర్సనల్ లోన్స్‌పై వడ్డీ రేట్లు 11.25 శాతం నుంచి 22 శాతంగా ఉంది. రూ. 40 లక్షల వరకు లోన్ వస్తుంది. 12 నెలల నుంచి 84 నెలల వరకు వ్యవధి పెట్టుకోవచ్చు. ఇక్కడ కూడా ప్రాసెసింగ్ ఫీజు 2 శాతంగా ఉంది. ఎస్బీఐలో ప్రారంభ వడ్డీ రేట్లు 11.45 శాతం నుంచి ఉన్నాయి. గరిష్టంగా 14.60 శాతంగా ఉంది. ప్రాసెసింగ్ ఫీజు లోన్ మొత్తం అమౌంట్‌లో 1.50 శాతంగా ఉంది. రూ. 30 లక్షల వరకు లోన్ పొందొచ్చు. ఆరేళ్ల వరకు టెన్యూర్ పెట్టుకోవచ్చు. బ్యాంక్ ఆఫ్ బరోడాలో 11.40 శాతం నుంచి 18.75 శాతం వరకు పర్సనల్ లోన్ ఇంట్రెస్ట్ రేట్లు ఉన్నాయి. గరిష్టంగా రూ. 20 లక్షల వరకు రుణం తీసుకోవచ్చు. తిరిగి ఐదేళ్ల వరకు చెల్లించొచ్చు.