విద్యార్థుల కోసం ఎల్ఐసీ కొత్త పథకం.. స్కాలర్‌షిప్‌కు అర్హులెవరు..

ఆర్థికంగా వెనుకబడిన కుటుంబాలకు చెందిన విద్యార్థుల్ని ప్రోత్సహించేందుకు లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) సరికొత్త స్కాలర్‌షిప్ పథకం తీసుకొచ్చింది. గోల్డెన్‌జూబ్లీ స్కాలర్‌షిప్ స్కీం- 2024 పేరిట ఈ పథకం తీసుకురాగా.. దీని కింద ప్రతిభ ఉన్న విద్యార్థులకు నగదు ప్రోత్సాహకం అందిస్తుంది. ఎల్ఐసీ ఈ విషయాన్ని స్వయంగా ఎక్స్ (ట్విట్టర్) వేదికగా వెల్లడించింది. దీంట్లోనే.. అర్హత, అర్హులు.. దరఖాస్తు తేదీలు వంటి పూర్తి వివరాల్ని అందుబాటులో ఉంచింది.

2021-22, 2022-23 అదే విధంగా 2023-24 విద్యా సంవత్సరాల్లో పదవ తరగతి లేదా ఇంటర్మీడియెట్ లేదా డిప్లొమా లేదా తత్సమాన విద్యను పూర్తి చేసుకున్న వాళ్లు ఈ స్కాలర్‌ షిప్ పొందేందుకు అర్హులు. వీరు గుర్తింపు పొందిన ఏదైనా విద్యా సంస్థ నుంచి కనీసం 60 శాతం మార్కులైనా సాధించి ఉండాలి. లేదా దీనికి సమానమైన CGPA గ్రేడ్ కలిగి ఉండాలి. 2024-25లో ఉన్నత విద్య చదవాలని అనుకొనే బాల బాలికలకు జనరల్ స్కాలర్‌షిప్స్ అందించనుంది.

మెడిసిన్, గ్రాడ్యుయేషన్, ఇంజినీరింగ్, ఏదైనా విభాగంలో డిప్లొమా చేయాలనుకుంటున్నా.. గుర్తింపు పొందిన విద్యా సంస్థల్లో వొకేషన్ కోర్సులు చేయాలన్నా.. లేదా ఐటీఐ చదవాలన్నా ఈ నగదు భరోసా కల్పిస్తారని చెప్పొచ్చు. ఇందులో స్పెషల్ గర్ల్ చైల్డ్ స్కాలర్‌షిప్ పథకం కింద దరఖాస్తు చేసుకోవాలనుకునే విద్యార్థినులకు రెండు సంవత్సరాల పాటు స్కాలర్ షిప్స్ అందిస్తారు.

10వ తరగతి పూర్తి చేసుకొని.. ఇంటర్మీడియెట్ లేదా 10+2 లేదా ఇతర ఏదైనా విభాగంలో డిప్లొమా కోర్స్ పూర్తి చేయాలనుకున్న వారు ఈ స్పెషల్ స్కాలర్‌షిప్ కోసం దరఖాస్తు చేసుకోవచ్చు. ఎల్ఐసీ అధికారిక వెబ్‌సైట్.. www.licindia.in ద్వారా ఆన్‌లైన్‌లోనే ఈ స్కీం కోసం దరఖాస్తు చేసుకోవచ్చు. ఎల్ఐసీ స్కాలర్ షిప్ డెడ్‌లైన్ 2024, డిసెంబర్ 22తో ముగియనుంది. ఇక దరఖాస్తు ప్రక్రియ డిసెంబర్ 8 (ఆదివారం) నుంచే ప్రారంభం కానుంది. ఇక కుటుంబ అర్హత సహా స్కాలర్ షిప్ ఎంత మొత్తం వరకు వస్తుంది.. ఇలా పూర్తి వివరాలు ఇంకా తెలియాల్సి ఉంది. పూర్తి వివరాల కోసం ఎల్ఐసీ అఫీషియల్ వెబ్‌సైట్ సందర్శించండి.