నెట్స్‌లో చెమటోడ్చుతున్న భారత ప్లేయర్లు.. మూడో టెస్టు కోసం ముమ్మర ప్రాక్టీస్

ఆడిలైడ్ వేదికగా జరిగిన పింక్ బాల్ టెస్టులో పది వికెట్ల తేడాతో భారత్ ఓడిపోయిన విషయం తెలిసిందే. దీంతో సిరీస్ 1-1తో సమమైంది. బ్యాటర్లు పేలవ ప్రదర్శన చేయడంతో టీమిండియా ఓటమి పాలైంది. అయితే రెండు ఇన్నింగ్స్‌లలోనూ భారత బ్యాటర్లు స్కోరును కనీసం 200 పరుగుల మార్కు దాటించలేకపోయారు. దీంతో భారత బ్యాటర్ల ఆటతీరుపై విమర్శలు వచ్చాయి. ఇలా అయితే కష్టమని.. ఆటతీరు మెరుగుపర్చుకోవాలని మాజీలు సూచించారు.

ఇక రెండో టెస్టులో ఓడిపోయిన భారత్.. మూడో టెస్టులో కమ్ బ్యాక్ ఇవ్వడమే లక్ష్యంగా కఠోర సాధన చేస్తోంది. ముఖ్యంగా టీమిండియా బ్యాటర్లు మంగళవారం ప్రాక్టీస్‌కే పరిమితమయ్యారు. నెట్స్‌లో చమటోడ్చుతూ ఫామ్ అందుకునే ప్రయత్నం చేశారు. పేస్ బౌలర్ల బౌలింగ్‌లో ఆటగాళ్లు కఠోర సాధన చేశారు.

యశస్వి జైశ్వాల్, విరాట కోహ్లీ, రోహిత్ శర్మ, శుభ్‌మన్ గిల్, రిషభ్ పంత్‌లు స్పిన్, పేస్ బౌలింగ్‌లో ప్రాక్టీస్ చేశారు. కేఎల్ రాహుల్ కూడా నెట్స్‌లో చమటోడ్చాడు. అటు రవీంద్ర జడేజా, రవిచంద్రన్ అశ్విన్ సహా.. మిగతా బౌలర్లు బంతులేశారు. ఆకాశ్ దీప్, యశ్ దయాళ్, ముకేశ్ కుమార్‌లు మన బ్యాటర్లకు బంతులు సంధించారు. ఇందుకు సంబంధించిన వీడియోను బీసీసీఐ షేర్ చేసింది.

కాగా ఈ సిరీస్‌లో తొలి టెస్టులో భారత్ 295 పరుగుల తేడాతో ఘన విజయం సాధించింది. అయితే అనూహ్యంగా.. రెండో టెస్టులో చతికలపడింది. దీంతో రెండు మ్యాచ్‌లు ముగిసే సరికి సిరీస్ 1-1తో సమమైంది. భారత జట్టు వరుసగా మూడోసారి ప్రపంచ టెస్టు ఛాంపియన్ షిప్ ఫైనల్ చేరాలంటే బోర్డర్ గవాస్కర్ ట్రోఫీ కీలకం. ఈ టోర్నీలో మిగిలిన మూడు మ్యాచుల్లో అన్నింట్లో గెలవడం లేదా 2-0తో సిరీస్‌ను దక్కించుకోవడమే టీమిండియా ముందున్న లక్ష్యాలు. ఇందులో ఏది జరిగినా.. టీమిండియా డబ్ల్యూటీసీ ఫైనల్ అవకాశాలు మెరుగ్గా ఉంటాయి. అలా కాని పక్షంలో ఫైనల్ ఛాన్స్ చేజారినట్లే. శ్రీలంకతో టెస్టు సిరీస్‌ను 2-0తో గెలిచిన దక్షిణాఫ్రికా.. పాయింట్ల పట్టికలో అగ్రస్థానానికి చేరింది. మరొక్క మ్యాచులో గెలిస్తే ఆ జట్టు ఫైనల్ చేరినట్లే. డిసెంబర్ 14 నుంచి మూడో టెస్టు ప్రారంభం కానుంది.