వాట్సాప్ ద్వారా 153 పౌర సేవలు.. ఎప్పటినుంచో చెప్పిన నారా లోకేష్

వాట్సాప్ ద్వారా పౌర సేవలు అందించేందుకు ఏపీ ప్రభుత్వం కార్యాచరణ మొదలుపెట్టింది. ప్రస్తుత డిజిటల్ యుగంలో డాక్యుమెంట్లు, ధ్రువపత్రాల కోసం ఆఫీసులు, కార్యాలయాల చుట్టూ తిరగాల్సిన అవసరం లేకుండా వాట్సాప్ ద్వారా పౌర సేవలు అందించాలని ఆంధ్రప్రదేశ్ ప్రభుత్వం నిర్ణయించింది. ఈ క్రమంలోనే ఎప్పటి నుంచి వాట్సాప్ ద్వారా పౌర సేవలు అందిస్తామనే విషయంలో.. ఏపీ ఐటీశాఖ మంత్రి నారా లోకేష్ క్లారిటీ ఇచ్చారు. ముఖ్యమంత్రి నారా చంద్రబాబు నాయుడు అధ్యక్షతన అమరావతిలో కలెక్టర్ల సమావేశం నిర్వహించారు. ఈ సమావేశంలో పాల్గొన్న నారా లోకేష్.. వాట్సాప్ ద్వారా 153 పౌర సేవలు అందించనున్నట్లు చెప్పారు. మరో పది రోజుల్లో ఈ సేవలు ప్రారంభించేందుకు చర్యలు తీసుకుంటున్నట్లు చెప్పారు.

మరోవైపు ఒకే వెబ్‌సైట్ ద్వారా ప్రభుత్వ సమాచారం అంతా లభించేలా కార్యాచరణ సిద్ధం చేస్తున్నట్లు మంత్రి నారా లోకేష్ చెప్పారు. జనన, మరణాల ధ్రువ పత్రాల జారీకి పాటిస్తున్న విధానంపైనా సమీక్ష చేయాల్సి ఉందని అభిప్రాయపడ్డారు. అలాగే విద్యాశాఖలో అపార్ ఐడీ జారీ సమయంలో ఎదురైన ఇబ్బందులను సరిచేస్తున్నామని చెప్పారు. ప్రపంచవ్యాప్తంగా చూసుకుంటే యూఏఈలో మాత్రమే ఒకే ప్లాట్ ఫామ్ ద్వారా పౌర సేవలు అందిస్తున్నారన్న నారా లోకేష్.. ఆ తరహా విధానాన్నే ఆంధ్రప్రదేశ్‌లోనూ తెచ్చే ప్రయత్నం చేస్తున్నట్లు చెప్పారు. ఈ క్రమంలోనే వాట్సాప్ ద్వారా పౌర సేవలు అందించేందుకు మెటాతో ఒప్పందం చేసుకున్నామని వివరించారు. మరో పది రోజుల్లో 153 సేవలు అందుబాటులోకి తెస్తామని ముఖ్యమంత్రి చంద్రబాబు దృష్టికి తీసుకువచ్చారు.

 మరోవైపు వాట్సాప్ ద్వారా పౌర సేవలు అందుబాటులోకి తెచ్చేందుకు మెటా ప్రతినిధులతో ఏపీ ప్రభుత్వం ఇటీవల ఒప్పందం చేసుకున్న సంగతి తెలిసిందే. ఢిల్లీలో జరిగిన కార్యక్రమంలో మంత్రి నారా లోకేష్ సమక్షంలో ఏపీ ప్రభుత్వ అధికారులు, మెటా ప్రతినిధులు ఒప్పందాలపై సంతకాలు చేశారు. మెటాతో ఒప్పందం నేపథ్యంలో.. కుల ధ్రువీకరణ పత్రాలు, జనన, మరణ ధ్రువపత్రాల దగ్గర నుంచి కరెంట్ బిల్లులు, ఇంటి పన్నులు, నల్లా పన్ను వంటి బిల్లుల చెల్లింపుల వరకూ అన్ని పౌరసేవలనూ వాట్సాప్ ద్వారా పొందవచ్చు. వేగంగా, సులువుగా ధ్రువపత్రాలు పొందటంతో పాటుగా.. వాటిని ట్యాంపరింగ్ చేసే అవకాశం ఉండదని ప్రభుత్వం చెప్తోంది. ఈ క్రమంలోనే 153 రకాల సేవలను మరో పదిరోజుల్లో అందుబాటులోకి తెస్తామని నారా లోకేష్ కలెక్టర్ల సమావేశంలో వెల్లడించారు.