జియో నుంచి న్యూఇయర్ ప్లాన్.. 200 రోజుల వ్యాలిడిటీ.. రూ.2000 పైగా బెనిఫిట్స్

ప్రముఖ టెలికాం సంస్థ రిలయన్స్ జియో తమ కస్టమర్లకు సరికొత్త ప్లాన్ తీసుకొచ్చింది. కొత్త సంవత్సరం సందర్బంగా ప్రతి ఏడాది మాదిరిగానే ఈసారి కూడా న్యూ ఇయర్ వెల్‌కమ్ ఆఫర్ ప్లాన్ 2025 (Reliance Jio Welcome Plan) అందుబాటులోకి తెచ్చింది. ఈ ప్లాన్ యాక్టివేట్ చేసుకునేందుకు రూ.2025తో రీఛార్జ్ చేసుకోవాల్సి ఉంటుంది. ఈ ప్లాన్ ద్వారా లాంగ్ టర్మ్ వ్యాలిడిటీతో పాటుగా రూ. 2,150 విలువైన కూపన్ ప్రయోజనాలనూ ఇస్తోంది.

రిలయన్స్ జియో న్యూ ఇయర్ వెల్‌కమ్ ఆఫర్ ప్రీపెయిడ్ ప్లాన్ రూ.2025తో రీఛార్జ్ చేసుకుంటే 200 రోజుల వ్యాలిటిడీ లభిస్తుంది. దీని ద్వారా అపరిమిత 5జీ డేటా అందిస్తుండడం గమనార్హం. రోజుకు 2.5 జీబీ చొప్పున మొత్తం 500 జీబీ డేటా లభిస్తుంది. డేటాతో పాటుగా అన్‌లిమిటెడ్ వాయిస్ కాల్స్, ఎస్ఎంఎస్‌లు వస్తాయి. ఇవే ప్రయోజనాలతో ప్రస్తుతం అందుబాటులో ఉన్న నెలవారీ ప్లాన్లతో పోలిస్తే దాదాపు రూ. 468 ఆదా చేసుకోవచ్చని రిలయన్స్ జియో తెలిపింది. ప్రస్తుతం రూ. 349 ప్లాన్ ద్వారా ఇవే ప్రయోజనాలు ఉన్నాయి. 200 రోజులకు ఈ విలువ రూ. 2,493 అవుతుందని, న్యూ ఇయర్ వెల్‌కమ్ ఆఫర్ ద్వారా రూ.2025కే అందిస్తున్నట్లు తెలిపింది.

అంతే కాదు ఈ ప్లాన్‌తో రీఛార్జ్ చేసుకున్న వారికి రూ. 2150 విలువైన కూపన్లు లభిస్తాయి. రూ. 500 విలువైన అజియో కూపన్ రూ. 2,500 ఆపైన కొనుగోళ్లు చేసినప్పుడు వినియోగించుకోవచ్చు. స్విగ్గీలో రూ. 499 ఆపైన కొనుగోళ్లపై రూ. 150 డిస్కౌంట్ అందించే కూపన్ ఇస్తోంది. ఈజ్ మై ట్రిప్‌లో విమాన టికెట్ల బుకింగ్ ‌పై రూ. 1500 వరకు డిస్కౌంట్ పొందవచ్చని తెలిపింది. ఈ ప్లాన్ డిసెంబర్ 11, 2024 నుంచి జనవరి 11, 2025 వరకు అందుబాటులో ఉంటుందని, ఆలోపు రీఛార్జ్ చేసుకున్న వారికే ప్రయోజనాలు లభిస్తాయని తెలిపింది. మై జియో యాప్, జియో అధికారిక వెబ్‌సైట్, రిటైలర్ల ద్వారానూ రీఛార్జ్ చేసుకోవచ్చని తెలిపింది.