53 శాతానికి పెరిగిన డీఏ.. ఉద్యోగులకు కేంద్రం మరో గుడ్‌న్యూస్.. ఇప్పుడు రెండు అలవెన్సులు పెంపు

కేంద్ర ప్రభుత్వ ఉద్యోగులకు మరో శుభవార్త. కరవు భత్యం పెరుగుతున్న కొద్దీ.. ఇతర ప్రయోజనాలు కూడా పెరుగుతుంటాయని చెప్పొచ్చు. ఇందులోనే ప్రధానంగా చెప్పుకోవాల్సింది అలవెన్సులు. అవును.. సాధారణంగా ప్రభుత్వం.. ప్రతి సంవత్సరం రెండు సార్లు కరవు భత్యం సవరించాల్సి ఉంటుంది. ఇక దీనిని జనవరి, జులై ఒకటో తేదీల్లోనే ప్రకటించాల్సి ఉండగా కేంద్రం కొన్నేళ్లుగా దాదాపు 3 నెలలు ఆలస్యంగానే ప్రకటిస్తూ వస్తోంది. దీనిని మార్చిలో ఒకసారి, అక్టోబర్/నవంబర్‌లో ప్రకటించి.. జనవరి 1, జులై 1 నుంచే అమల్లోకి తెస్తోంది. ఇక ఇటీవల దీపావళి సమయంలో డీఏను 50 శాతం నుంచి 53 శాతానికి పెంచింది కేంద్రం. అయినా జులై 1 నుంచే అమల్లోకి తెచ్చింది.

డీఏ 50 శాతం దాటిన నేపథ్యంలో.. ఇప్పటికే ప్రభుత్వ ఉద్యోగులకు ఇతర అదనపు బెనిఫిట్స్ అలవెన్సులు వంటివి పెంచడం వల్ల టేక్ హోమ్ శాలరీ కూడా పెరిగింది. డీఏ అనేది 50 శాతం దాటినట్లయితే.. చాలా అలవెన్సులు కూడా పెంచాల్సి ఉంటుందని 7వ వేతన సంఘం సిఫార్సు చేస్తోంది. ఇక డీఏ పెంపుతో.. దాదాపు 13 రకాల అలవెన్సుల్లో 25 శాతం పెరుగుదల జనవరి 1 నుంచే కనిపించింది.

ఇక ఇప్పుడు సెప్టెంబర్ నెలలో మరో రెండు అలవెన్సులు పెరిగాయి. ఇది నర్సింగ్ అలవెన్స్, క్లాతింగ్ (దుస్తుల అలవెన్స్). అర్హులైన ఉద్యోగులకు ఈ రెండు రకాల అలవెన్సులు పెరిగాయని చెప్పొచ్చు. కేంద్ర ఆరోగ్య, కుటుంబ సంక్షేమ మంత్రిత్వ శాఖ .. 2024, సెప్టెంబర్ 17న ఒక మెమోరాండం విడుదల చేసింది. పే స్కేల్ డీఏ 50 శాతాన్ని చేరిన ప్రతిసారీ 25 శాతం వరకు డ్రెస్ అలవెన్స్ పెరుగుతుందని వెల్లడించింది.

ఇంకా దవాఖానాలు లేదా ఆస్పత్రుల్లో పనిచేసే అందరు నర్సులకు నర్సింగ్ అలవెన్స్ చెల్లించాలని కేంద్ర కుటుంబ, ఆరోగ్య మంత్రిత్వ శాఖ చెబుతోంది. ఇక్కడ కూడా 25 శాతం వరకు అలవెన్స్ పెరగాలని సూచిస్తోంది. ఈ లెక్కన ఈ రెండు అలవెన్సులు తాజాగా పెరిగాయని కేంద్రం చెప్పింది. మరోవైపు.. ప్రతి 10 సంవత్సరాలకు ఒకసారి కొత్త వేతన సంఘం అమల్లోకి రావాల్సి ఉండగా.. ఇప్పుడు 7వ వేతన సంఘం అమల్లో ఉంది. 2026, జనవరి 1 నుంచి 8వ వేతన సంఘం అమల్లోకి వచ్చే అవకాశం ఉన్నట్లు తెలుస్తోంది. దీనిపై క్లారిటీ రావాల్సి ఉంది. 8వ వేతన సంఘం అమల్లోకి వస్తే.. దానికి తగ్గట్లుగానే జీతాలు, పెన్షన్లు, డీఏ ఇంకా పెరుగుతాయని చెప్పొచ్చు.