క్తిమంతమైన మహిళగా నిర్మలమ్మ.. ఫోర్బ్స్ జాబితాలో చోటు.. వరుసగా ఆరోసారి

కేంద్ర ఆర్థిక శాఖ మంత్రి నిర్మలా సీతారామన్ మరోసారి అరుదైన గౌరవాన్ని దక్కించుకున్నారు. ఫోర్బ్స్ విడుదల చేసిన ప్రపంచంలోనే అత్యంత శక్తిమంతమైన మహిళల జాబితా -2024 జాబితాలో చోటు సంపాదించుకున్నారు. ఈ జాబితాలో వరుసగా ఆరోసారి నిర్మలా సీతారామన్ చోటు పొందడం గమనార్హం. భారత్ నుంచి మొత్తం ముగ్గురు మహిళలకు చోటు లభించింది. వారిలో ఆర్థిక మంత్రి నిర్మలా సీతారామన్ అగ్రస్థానంలో నిలిచారు. ఆ వివరాలు తెలుసుకుందాం.

ప్రపంచ వ్యాప్తంగా అత్యంత శక్తిమంతమైన 100 మంది మహిళల జాబితాలో నిర్మలమ్మ 28వ స్థానంలో నిలిచారు. గతేడాది 32వ స్థానంలో ఉండగా.. ఈసారి తన స్థానాన్ని మెరుగుపరుచుకున్నారు. భారత్ నుంచి హెచ్‌సీఎల్ కార్పొరేషన్ ఛైర్ పర్సన్ రోష్నీ నాడార్ మల్హోత్రా 81వ స్థానంలో నిలిచారు. గతేడాది 60వ స్థానంలో ఉన్నారు. బయోకాన్ వ్యవస్థాపకురాలు కిరణ్ మజూందార్ షా ఈ ఏడాది ఫోర్బ్స్ జాబితాలో 82వ స్థానం దక్కించుకున్నారు. గతేడాది కూడా కిరణ్ మజూందార్ ఈ జాబితాలో చోటు దక్కించుకున్న సంగతి తెలిసిందే.

ప్రపంచంలోనే అత్యంత శక్తిమంతమైన మహిళ..

ఈ జాబితాలో యూరోపియన్ కమిషన్ చీఫ్ ఉర్సులా వాన్ దెర్ లెయెన్ మరోసారి అగ్రస్థానాన్ని దక్కించుకున్నారు. ప్రపంచంలోనే అత్యంత శక్తిమంతమైన మహిళగా నిలిచారు. యూరోపియన్ సెంట్రల్ బ్యాంక్ అధిపతి క్రిస్టినా లగార్డ్, ఇటీల ప్రధాని జార్జియా మెలోని వరుసగా రెండు, మూడు స్థానాల్లో ఉన్నారు. ఇక బిల్ గేట్స్ మాజీ భార్య మిలిందా ఫ్రెంచ్ గేట్స్ 8వ స్థానాల్ ఉన్నారు. అమెజాన్ అధినేత జెఫ్ బెజోస్ మాజీ భార్య మెకంజీ స్కాట్ 9వ స్థానంలో ఉన్నారు. ప్రముఖ పాప్ గాయని టేలర్ స్విఫ్ట్ 23వ స్థానంలో నిలిచారు.

భారత్‌లో తొలి పూర్తి స్థాయి ఆర్థిక మంత్రిగా రికార్డ్ సృష్టించారు నిర్మలా సీతారామన్. రాజకీయాల్లోకి రాకముందు బ్రిటన్ అగ్రికల్చర్ ఇంజినీర్స్ అసోసియేషన్, బీబీసీ వరల్డ్ సర్వీసుల్లో కీలక బాధ్యతలు నిర్వర్తించారు. ఇక హెచ్‌సీఎల్ వ్యవస్థాపకుడు శివ్ నాడార్ కుమార్తె రోష్నీ నాడార్ మల్హోత్రా జులై 2020లో హెచ్‌సీఎల్ ఛైర్ పర్సన్‌గా బాధ్యతలు స్వీకరించారు. కంపెనీని అగ్ర పథంలో నడిపిస్తున్నట్లు ఫోర్బ్స్ తెలిపింది. 1978లో కిరణ్ మజూందర్ షా బయోకాన్‌ను నెలకొల్పారు. ఆ తర్వాత భారత్‌లో అత్యంత సంపన్న మహిళల్లో ఒకరిగా నిలిచారు.