వడ్డీ రేట్లు మార్చిన మరో బ్యాంక్.. 7.90 శాతం ఆఫర్.. రూ.5 లక్షలకు ఎంతొస్తుంది?

దేశీయ ప్రైవేట్ రంగ దిగ్గజ బ్యాంకుల్లో ఒకటైన ఫెడరల్ బ్యాంక్ కీలక ప్రకటన చేసింది. రూ.3 కోట్ల లోపు ఉండే రిటైల్ టర్మ్ డిపాజిట్ల వడ్డీ రేట్లను సవరిస్తున్నట్లు తెలిపింది. సవరించిన ఫిక్స్‌డ్ డిపాజిట్ల వడ్డీ రేట్లను డిసెంబర్ 16, 2024 నుంచే అమలులోకి తీసుకొస్తున్నట్లు తమ అధికారిక బ్యాంక్ వెబ్‌సైట్లో పేర్కొంది. ఫెడరల్ బ్యాంక్ వడ్డీ రేట్ల సవరణ తర్వాత సీనియర్ సిటిజన్లకు గరిష్ఠంగా 7.90 శాతం మేర వడ్డీ ఆఫర్ చేస్తోంది. మరి ఇందులో రూ.5 లక్షలు డిపాజిట్ చేసినట్లయితే జనరల్ కస్టమర్, సీనియర్ సిటిజన్లకు ఎంతొస్తుంది? అనేది తెలుసుకుందాం.

ఫెడరల్ బ్యాంక్ లేటెస్ట్ ఎఫ్‌డీ రేట్లు..

ఫెడరల్ బ్యాంకులో ప్రస్తుతం జనరల్ కస్టమర్లకు 3 శాతం నుంచి 7.40 శాతం వడ్డీ ఇస్తుండగా.. సీనియర్ సిటిజన్లకు అదనంగా మరో 50 బేసిస్ పాయింట్ల వడ్డీ కల్పిస్తోంది. 7 రోజుల నుంచి 10 ఏళ్ల టెన్యూర్లపై ఇది వర్తిస్తుంది. ఇక గరిష్ఠ వడ్డీ రేుట 7.40 శాతం అనేది 777 రోజులు, 50 నెలల మెచ్యూరిటీ టెన్యూర్ ఫిక్స్‌డ్ డిపాజిట్లపై ఇస్తోంది. దీనిపైనే సీనియర్ సిటిజన్లకు గరిష్ఠంగా 7.90 శాతం వడ్డీ అందిస్తోంది.

7 రోజుల నుంచి 29 రోజుల డిపాజిట్లపై సీనియర్ సిటిజన్లకు 3.50 శాతం వడ్డీ ఇస్తోంది. జనరల్ కస్టమర్లకు 50 బేసిస్ పాయింట్లు తక్కువగా ఉంటుంది.

30 రోజుల నుంచి 45 రోజులకు 4 శాతం, 46 రోజుల నుంచి 180 రోజులకు 6 శాతం వడ్డీ అందిస్తోంది.

181 రోజులకు 7 శాతం, 182 రోజుల నుంచి 270 రోజులకు 6.75 శాతం, 271 నుంచి ఏడాదిలోపు అయితే 7 శాతం వడ్డీ

ఏడాది టెన్యూర్ పై 7.50 శాతం, ఏడాది నుంచి 399 రోజులకు 7.75 శాతం వడ్డీ ఇస్తోంది.

400 రోజుల డిపాజిట్లపై 7.85 శాతం, 401 నుంచి రెండేళ్లలోపు అయితే 7.75 శాతం వడ్డీ ఆఫర్ చేస్తోంది.

2 ఏళ్ల నుంచి 776 రోజులకు 7.65 శాతం, 777 రోజులకు గరిష్ఠంగా 7.90 శాతం వడ్డీ ఇస్తోంది.

778 రోజుల నుంచి 3 ఏళ్లలోపు అయితే 7.65 శాతం, మూడేళ్ల నుంచి 50 నెలలలోపు అయితే 7.60 శాతం వడ్డీ

50 నెలల స్పెషల్ టెన్యూర్ పై 7.90 శాతం వడ్డీ అందిస్తోంది.

5 సంవత్సరాలకు 7.75 శాతం, ఆపైన అయితే 7.25 శాతం వడ్డీ ఇస్తోంది.

రూ.5 లక్షలకు ఎంతొస్తుంది?

ఫెడరల్ బ్యాంక్ ప్రస్తుతం 777 రోజులు, 50 నెలల టెన్యూర్లపై గరిష్ఠ వడ్డీ రేట్లు ఇస్తోంది. జనరల్ కస్టమర్లకు 7.40 శాతం, సీనియర్ సిటిజన్లకు 7.90 శాతం వడ్డీ వస్తోంది. మరి 50 నెలలపై ఒక సాధారణ కస్టమర్ రూ.5 లక్షలు జమ చేశాడు అనుకుందాం. అప్పుడు అతనికి మెచ్యూరిటీ తర్వాత చేతికి రూ.6,52,650 వరకు వస్తాయి. అదే సీనియర్ సిటిజన్ అయితే వడ్డీ రేటు 7.90 శాతం ఉంటుంది. దీంతో 50 నెలల తర్వాత చేతికి రూ.6,62,990 వరకు వస్తాయి.