పాత, కొత్త పన్ను విధానం.. ఎవరికి ఎప్పుడు ఏది బెస్ట్.. మరో 3 నెలలే ఉంది

ఆర్థిక ప్రణాళికలో ఆదాయపు పన్ను అత్యంత కీలకం అని చెప్పొచ్చు. దీంట్లో ఏ చిన్న పొరపాటు చేసినా.. దీర్ఘకాలంలో దాని ఫలితం ప్రతికూలంగా పడుతుందని చెప్పొచ్చు. ముఖ్యంగా పన్ను చెల్లింపుదారులు.. పన్ను ఆదా పెట్టుబడుల కోసం ఎక్కువగా చూస్తుంటారు. 2024-25 ఆర్థిక సంవత్సరం మరో 3 నెలలే ఉంది. 2025 ఏప్రిల్ 1 నుంచి కొత్త ఆర్థిక సంవత్సరం అమల్లోకి వస్తుంది. అయితే పన్నును ఆదా చేసుకునేందుకు.. ఈ 3 నెలలే సమయం ఉంది. ఇప్పటి నుంచే పన్ను ఆదా పథకాల్ని ఎంచుకోవాలి. అయితే.. టాక్స్ ఆదా చేసుకునేందుకు.. పథకాల్ని ఎంచుకునేటప్పుడు మన లక్ష్య సాధనలో అవి ఎంత వరకు ఉపయోగపడతాయని చూడాలి.

>> ప్రస్తుతం దేశంలో రెండు రకాల పన్ను విధానాలు ఉన్నాయి. అయితే పాత పన్ను విధానంలోనే పన్ను మినహాయింపు ప్రయోజనాలు ఉన్నాయి. పెట్టుబడులపై ఎలాంటి మినహాయింపులు అవసరం లేదనుకుంటే.. కొత్త పన్ను విధానాన్ని ఎంచుకోవడం మంచిది. ఆదాయాన్ని బట్టి.. నిర్ణీత పన్ను శ్లాబుల్లో టాక్స్ చెల్లిస్తే సరిపోతుంది.

పాత పన్ను విధానంలో సుకన్య సమృద్ధి యోజన, పబ్లిక్ ప్రావిడెంట్ ఫండ్ వంటి కొన్ని పథకాల్లో పెట్టుబడులపై ఆదాయపు పన్ను చట్టం సెక్షన్ 80c కింద టాక్స్ తగ్గించుకోవచ్చు. ఇంకా ఇంటి రుణంపై చెల్లించిన వడ్డీ కూడా ఉంటుంది. ఇది కొత్త పన్ను విధానంలో మాత్రం ఉండదు. దీంట్లో బెనిఫిట్ అంటే స్టాండర్డ్ డిడక్షన్ మాత్రమే ఉంటుంది. ప్రస్తుతం కొత్త పన్ను విధానంలో రూ. 75 వేల స్టాండర్డ్ డిడక్షన్ ఉంది. పాత పన్ను విధానంలో ఇది కాస్త తక్కువ ఉంటుంది.

ఇక కొత్త పన్ను విధానంలో రూ. 7.50 లక్షల్లోపు ఆదాయం ఉంటే.. ఎలాంటి టాక్స్ చెల్లించనవసరం లేదు. ఇక్కడ మినహాయింపులతో ఎలాంటి పని లేదు. అంతకుమించి ఆదాయం ఉంటేనే లెక్కలు వేసుకోవాలి ఏది బెస్ట్ అని. పన్ను వర్తించే ఆదాయం లెక్క తీస్తున్నప్పుడు.. మీకు వస్తున్న మొత్తం ఆదాయాల్ని చూడాలి. జీతం కాకుండా.. రెంట్, బ్యాంక్ లేదా పోస్టాఫీస్ నుంచి వడ్డీలు, మూలధన రాబడి, వ్యాపారాల్లో ఆదాయం వంటి మార్గాల్లో ఆదాయం ఉంటే వీటిని ఒకచోట రాసుకోండి. ఇంకా.. పన్ను ఆదా పథకాల్లో ఎంత పొదుపు చేశారో.. దీనికి ఎంత అవకాశం ఉందన్నది చూసుకోండి. దీంతో పన్ను తగ్గించుకునేందుకు స్పష్టత వస్తుంది. ఇంకా టాక్స్ తగ్గించుకునేందుకు ఎంత మదుపు చేయాలనేది తెలుస్తుంది.

>> ఎక్కువ మంది పన్ను ఆదా కోసం ఆఖర్లో బీమా పాలసీ వైపు మొగ్గు చూపుతుంటారు. ఇక్కడ బీమా ప్రీమియంపై సెక్షన్ 80c కింద మినహాయింపు వస్తుంది. జీవిత బీమా లక్ష్యం మాత్రం పన్ను ఆదానే కాదు. అది ఆదనపు ప్రయోజనం అందిస్తుంది. బీమా కోసం టర్మ్ ప్లాన్ సరిపోవచ్చు. ఇంకొంత మొత్తం.. ఇతర పథకాల్లో పెడితే మంచి బెనిఫిట్ పొందొచ్చు.

>> మన ఆర్థిక లక్ష్యాల సాధనకు తోడ్పాటునందించే పన్ను ఆదా పథకాల్లో మదుపు చేయాలి. వీటిల్లో రిస్క్ ఎంత ఉంటుందనేది చూసుకోవాలి. ఇక్కడ రిస్క్ వద్దనుకుంటే.. పీపీఎఫ్, నేషనల్ సేవింగ్స్ సర్టిఫికెట్, ఎఫ్‌డీ వంటి గ్యారెంటీ రిటర్న్స్ ఇచ్చే పథకాల్ని ఎంచుకోవాలి. కొంత రిస్క్ తీస్కున్నా పర్లేదనుకుంటే.. ఈక్విటీ లింక్డ్ సేవింగ్స్ స్కీమ్స్, సిప్‌ పెట్టుబడులు పెట్టొచ్చు.

పన్ను ఆదా కోసం సెక్షన్ 80C కింద.. ELSS, EPF, PPF, హోం లోన్ అసలు, లైఫ్ ఇన్సూరెన్స్ ప్రీమియం, పిల్లల ట్యూషన్ ఫీజులు వంటి ఎన్నో పెట్టుబడి పథకాలు వర్తిస్తాయి. మొత్తంగా ఏడాదిలో రూ. 1.50 లక్షల వరకు మినహాయింపుల్ని క్లెయిమ్ చేసుకోవచ్చు. NPS లో గరిష్టంగా రూ. 2 లక్షల వరకు పన్ను తగ్గించుకోవచ్చు. చివరగా.. మీరు ఈ పెట్టుబడుల్ని 2025, మార్చి 31 లోగా పూర్తి చేయాల్సి ఉంటుంది.