మ్యూచువల్ ఫండ్స్‌పై లోన్లు.. ఎస్బీఐ, హెచ్‌డీఎఫ్‌సీ, ఐసీఐసీఐ బ్యాంకుల్లో వడ్డీ రేట్లు, ఈఎంఐ ఎంత?

మనకు ఎప్పుడైనా కాస్త పెద్ద మొత్తంలో డబ్బు అవసరం పడితే.. ఫ్రెండ్స్ లేదా బంధువుల్నో అడుగుతుంటాం. అక్కడా దొరక్కపోతే చాలా మంది బ్యాంక్ లోన్ల కోసం చూస్తాం. అయితే బ్యాంకుల్లో కొన్ని సార్లు లభించకపోతే.. అప్పుడు మన దగ్గర ఉన్న షేర్లు లేదా మ్యూచువల్ ఫండ్స్ యూనిట్స్ విక్రయించడం చూస్తుంటాం. అయితే ఇక్కడ వీటిని అమ్మకుండానే డబ్బులు పొందొచ్చు తెలుసా. షేర్లు లేదా మ్యూచువల్ ఫండ్స్‌పైనా లోన్లు పొందే వెసులుబాటు ఉంది. వీటిని అమ్మకుండానే లోన్లు పొందొచ్చు. ఇంకా ఇది ఓవర్ డ్రాఫ్ట్‌లానే పనిచేస్తుందని చెప్పొచ్చు. మీకు వచ్చిన డబ్బులపై మాత్రమే వడ్డీ పడుతుంది.

అయితే ఇలా అన్ని బ్యాంకులు లోన్లు ఆఫర్ చేయవు. కంప్యూటర్ ఏజ్ మేనేజ్‌మెంట్ సొల్యూషన్ ప్రైవేట్ లిమిటెడ్‌లో (CAMS) రిజిస్టర్ అయిన బ్యాంకుల్లోనే ఇలా రుణాలు పొందొచ్చు. ఇప్పుడు మనం దేశంలోని టాప్ బ్యాంకుల్లో ఇలా మ్యూచువల్ ఫండ్స్‌పై లోన్ తీసుకుంటే.. రూ. 10 లక్షలపై మూడేళ్ల వ్యవధికి వడ్డీ రేట్లు ఎలా ఉన్నాయి.. ఈఎంఐ ఎంత పడుతుందనేది తెలుసుకుందాం.

ఇక్కడ స్టాక్స్ లేదా మ్యూచువల్ ఫండ్స్ తాకట్టుపెట్టి లోన్లు పొందడం అన్నమాట. దీనినే షేర్లు లేదా సెక్యూరిటీస్‌పై రుణం అని పిలుస్తారు. ఇలా ఐసీఐసీఐ బ్యాంకులో 3 సంవత్సరాల వ్యవధికి రూ. 10 లక్షల లోన్ తీసుకుంటే వడ్డీ రేటు 11.50 శాతంగా ఉంది. నెలకు ఈఎంఐ రూ. 32,976 పడుతుంది.

యాక్సిస్ బ్యాంకులో చూస్తే వడ్డీ రేటు 11.49 శాతంగా ఉంది. మూడేళ్ల వ్యవధికి రూ. 10 లక్షల లోన్ తీసుకుంటే ఇక్కడ ఈఎంఐ రూ. 32,971 గా ఉంది. కోటక్ మహీంద్రా బ్యాంకులో వడ్డీ రేట్లు 8.50 శాతం నుంచి ప్రారంభం అవుతున్నాయి. ఇక్కడ రూ. 10 లక్షల లోన్‌పై మూడేళ్లకు చూస్తే ఈఎంఐ రూ. 31,568 పడుతుంది.

బ్యాంక్ ఆఫ్ బరోడాలో వడ్డీ రేట్లు 9.90 శాతం నుంచి మొదలవుతున్నాయి. ఇక్కడ 3 సంవత్సరాలకు చూస్తే.. రూ. 10 లక్షలపై ఈఎంఐ రూ. 32,220 గా ఉంది. స్టేట్ బ్యాంక్ ఆఫ్ ఇండియాలో వడ్డీ రేట్లు 10.05 శాతం నుంచి ప్రారంభం అవుతున్నాయి. ఈఎంఐ రూ. 32,291 గా ఉంది. అతిపెద్ద ప్రైవేట్ బ్యాంక్ అయిన హెచ్‌డీఎఫ్‌సీ బ్యాంకులో వడ్డీ రేట్లు 10.08 శాతంగా ఉన్నాయి. ఇక్కడ ఈఎంఐ రూ. 33,305 గా ఉంది. ఇక నాన్ బ్యాంకింగ్ ఫైనాన్షియల్ కంపెనీల విషయానికి వస్తే.. టాటా క్యాపిటల్, ఎస్ఎంఎఫ్‌జీ ఇండియా క్రెడిట్, ఐఐఎఫ్ఎల్ ఫైనాన్స్ వడ్డీ రేట్లు 8 నుంచి 10 శాతం నుంచి ప్రారంభమవుతున్నాయి. వీటిల్లో ఈఎంఐ వరుసగా రూ. 31336, రూ. 31800, రూ. 32267 చొప్పున పడుతున్నాయి.