క్రిస్మస్ వేళ ఉక్రెయిన్‌పై విరుచుకుపడ్డ రష్యా.. 70 క్షిపణులు, 100 డ్రోన్లతో దాడి!

క్రిస్మస్ పండుగ వేళ రష్యా ఉక్రెయిన్‌పై ఒక్కసారిగా విరుచుకు పడింది. ముఖ్యంగా ఖర్కీవ్ లక్ష్యంగా చేసుకుని పెద్ద ఎత్తున దాడులకు పాల్పడింది. మొత్తం 70 క్షిపణులతో పాటు 100 డ్రోన్లతో దాడులు చేసింది. ఈ దాడుల కారణంగా అనేక భవనాలు కుప్పకూలిపోగా.. ఒకరు ప్రాణాలు కోల్పోయారు. అలాగే మరో ముగ్గురు తీవ్రంగా గాయపడ్డారు. అయితే రష్యా చేసిన ఈ దాడుల వల్ల పెద్ద మొత్తంలో ఆస్తి నష్టం జరిగినట్లు తెలుస్తోంది. ఈక్రమంలోనే ఎంత మొత్తంలో నష్టం జరిగిందో అంచనా వేస్తున్నామని అధికారులు చెప్పారు. ఆ పూర్తి వివరాలు ఏంటో మనం ఇప్పుడు తెలుసుకుందాం.

డిసెంబర్ 25వ తేదీ ఉదయం రోజు రష్యా ఉక్రెయిన్‌పైకి 70 క్షిపణులతో పాటు 100 డ్రోన్లను పంపి దాడి చేసింది. ఈ విషయాన్ని నగర మేయర్ ఇగోర్ టెరెకోవ్ వెల్లడిచారు. ఖర్కీవ్ లక్ష్యంగా చేసుకున్న ఈ దాడుల వల్ల పెద్ద మొత్తంలో ఆస్తి నష్టం జరిగిందని చెప్పుకొచ్చారు. అంతేకాకుండా ఈ ఘటనలో ఒకరు ప్రాణాలు కోల్పోగా ముగ్గురు గాయపడినట్లు వివరించారు. అయితే ఎంత మొత్తంలో ఆస్తి నష్టం జరిగిందనే దాన్ని అంచనా వేస్తున్నట్లు చెప్పుకొచ్చారు.

ఈక్రమంలోనే ఉక్రెయిన్ అధ్యక్షుడు జెలెన్స్కీ స్పందించారు. క్రిస్మస్ పండుగ పూట రష్యా అధ్యక్షుడు వ్లాదిమిర్ పుతిన్ తమ దేశంపై దాడులు చేశారని ఆరోపించారు. ఉద్దేశ పూర్వకంగానే రష్యా ఈ దాడులకు పాల్పడుతుందని చెప్పుకొచ్చారు. ఏరోజు, ఎప్పుడు, ఎలా చేయాలో ముందుగానే ప్లాన్ చేసుకుని మరీ దాడులు చేస్తున్నారని వివరించారు. ఇంతకంటే అమానుషం ఇంకేమైనా ఉంటుందా అంటూ ప్రశ్నించారు.

మరోవైపు ఉక్రెయిన్ కూడా ప్రతిదాడికి పాల్పడుతుందని రష్యా అధికారులు వివరిస్తున్నారు. ఈరోజు కూడా అనేక డ్రోన్లు పంపి దాడి చేసేందుకు ప్రయత్నించిందని... అయితే 59 డ్రోన్లను కూల్చేసి దాడులను ఆపగలిమానంటూ రష్యా రక్షణ శాఖ వెల్లడించింది. ఇప్పటికీ ఉక్రెయిన్ తమపై దాడులు చేస్తూనే వస్తుందని వివరించారు.

ఇటీవలే ఉక్రెయిన్‌తో యుద్ధం ఆపేందుకు సిద్ధంగా ఉన్నామని రష్యా అధ్యక్షుడు వ్లాదిమిర్ పుతిన్ ప్రకటించారు. దాడులు ఆపేందుకు ఎవరితోనైనా మాట్లాడేందుకు సిద్ధమన్న ఆయన ఉక్రెయిన్ అధ్యక్షుడు జెలెన్స్కీతో మాత్రం మాట్లడబోనని వివరించారు. ఇదంతా ఇలా ఉండగా ఇటీవలే ఎన్నికల్లో విజయం సాధించి మరికొన్ని రోజుల్లో అమెరికా అధ్యక్ష పదవి ఎక్కబోతున్న డొనాల్డ్ ట్రంప్... రష్యా-ఉక్రెయిన్ యుద్ధానికి తాను ముగింపు పలుకుతానని చెప్పారు.

ఇక అప్పటి నుంచి పుతిన్ సేనలు ఉక్రెయిన్‌పై దాడిని మరింత పెంచాయి. అమెరికాకు కొత్త అధ్యక్షుడు వచ్చే లోపే ఉక్రెయిన్‌లో సాధ్యమైనంత ప్రాంతాన్ని చేజిక్కించుకోవాలని రష్యా చూస్తున్నట్లు సమాచారం. ఆ సందర్భంగానే దాడులు పెంచిందని.. అలా ఈ ఒక్క సంవత్సరంలోనే ఉక్రెయిన్ కు చెందిన 190 ప్రాంతాలను ఆక్రమించుకున్నట్లు రష్యా ప్రకటించింది.