మళ్లీ నిరాశపర్చిన రోహిత్, కోహ్లీ.. మెల్‌బోర్న్‌ టెస్టులో కష్టాల్లో భారత్..!

బోర్డర్‌ గవాస్కర్ ట్రోఫీని విజయంతో ఆరంభించిన భారత్‌కు.. ఆ టెస్టులో మినహా మరే మ్యాచ్‌లోనూ కలిసి రావడం లేదు. రెండో టెస్టులో పది వికెట్లు తేడాతో ఓడిన భారత్.. వర్షం ఆదుకోవడంతో మూడో టెస్టును డ్రా చేసుకుంది. ఇక నాలుగో టెస్టులోనూ రెండో రోజు ఆట ముగిసే సమయానికి కష్టాల్లో పడింది. ఈ మ్యాచ్‌ తొలి ఇన్నింగ్స్‌లో ఆస్ట్రేలియాను 474 పరుగులకు ఆలౌట్ చేసింది భారత్. ఆ తర్వాత రెండో రోజు ఆట ముగిసే సమయానికి 164/5తో నిలిచింది. భారత్‌ ఇంకా 310 పరుగులు వెనకబడి ఉంది.

ఓవర్‌నైట్ స్కోరు 311/6తో రెండోరోజు ఆట ప్రారంభించిన ఆస్ట్రేలియా.. ధాటిగా బ్యాటింగ్ చేసింది. స్టీవ్ స్మిత్‌ (140) ఈ సిరీస్‌లో వరుసగా రెండో శతకం కొట్టాడు. కెప్టెన్ ప్యాట్ కమిన్స్ (49)కూడా రాణించడంతో ఆ జట్టు 474 పరుగులకు ఆలౌట్ అయింది. భారత బౌలర్లలో జస్‌ప్రీత్ బుమ్రా అత్యధికంగా 4 వికెట్లు పడగొట్టాడు. రవీంద్ర జడేజా 3, ఆకాశ్‌ దీప్‌ 2, వాషింగ్టన్ సుందర్‌ 1 వికెట్ తీశారు.

పొజిషన్ మారిన ఆటతీరు మార్చుకోని రోహిత్‌:

అనంతరం భారత్‌ తొలి ఇన్నింగ్స్‌లో బ్యాటింగ్ ప్రారంభించింది. ఈ సిరీస్‌లో గత రెండు మ్యాచుల్లో ఆరో స్థానంలో బ్యాటింగ్‌కు వచ్చిన కెప్టెన్ రోహిత్ శర్మ.. ఈ సారి మాత్రం తనకు అచ్చొచ్చిన ఓపెనింగ్‌ స్థానంలో బ్యాటింగ్‌కు వచ్చాడు. బ్యాటింగ్ స్థానం మారిందే తప్ప రోహిత్ ఆట తీరు మాత్రం ఏమాత్రం మారలేదు. రోహిత్ (3) మరోసారి సింగిల్‌ డిజిట్‌కే పెవిలియన్ చేరాడు. కేఎల్ రాహుల్ (24) కాసేపు నిలిచినా.. త్వరగానే పెవిలియన్ చేరాడు.

ఆదుకున్న జైశ్వాల్-కోహ్లీ:

51 పరుగులకే రెండు వికెట్లు కోల్పోయిన దశలో జైశ్వాల్‌, కోహ్లీలు ఇన్నింగ్స్‌ను చక్కదిద్దే ప్రయత్నం చేశారు. ఓ పక్క జైశ్వాల్‌ ధాటిగా బ్యాటింగ్ చేస్తుండగా.. కోహ్లీ ఆచితూచి బ్యాటింగ్ చేశాడు. దీంతో స్కోరు బోర్డు వంద పరుగుల మార్కును దాటింది. వీరిద్దరి భాగస్వామ్యం కూడా వంద పరుగులు దాటింది. అయితే జైశ్వాల్‌ (82) రనౌట్‌ కావడం జట్టు గమనాన్నే మార్చేసింది.

జైశ్వాల్ ఔట్‌ అయ్యేటప్పటికి భారత్ స్కోరు 153/3గా ఉంది. కానీ ఆ తర్వాత కాసేపటికే భారత్.. విరాట్ కోహ్లీ (36), ఆకాశ్ దీప్ (0)లు కూడా పెవిలియన్ చేరారు. దీంతో ఆరు పరుగుల వ్యవధిలోనే మూడు వికెట్లు కోల్పోయి 159/5తో నిలిచి కష్టాల్లో పడింది. ఈ దశలో రిషభ్‌ పంత్‌ (6), రవీంద్ర జడేజా (4)లు మరో వికెట్ పడకుండా జాగ్రత్త పడ్డారు. రెండో రోజు ఆటలో 46 ఓవర్లు బ్యాటింగ్ చేసిన టీమిండియా.. 5 వికెట్ల నష్టానికి 164 పరుగులు చేసింది. ఇంకా 310 పరుగులు వెనకబడి ఉంది.