నితీష్ సూపర్ సెంచరీ.. ఆసీస్ గడ్డపై అదరగొట్టిన తెలుగోడు

తెలుగు క్రికెటర్‌ నితీశ్‌ రెడ్డి తొలి టెస్టు సెంచరీ కొట్టాడు. బోర్డర్‌ గవాస్కర్ ట్రోఫీతో టెస్టు క్రికెట్‌లోకి అడుగుపెట్టిన 21 ఏళ్ల నితీశ్‌.. బాక్సింగ్‌ డే టెస్టులో మూడంకెల మార్కును అందుకున్నాడు. జట్టు పీకల్లోతు కష్టాల్లో ఉన్న బ్యాటింగ్‌కు వచ్చిన నితీశ్‌ రెడ్డి.. సాధికారికంగా ఆడి 171 బంతుల్లో తొలి అంతర్జాతీయ సెంచరీని నమోదు చేశాడు. వాషింగ్టన్‌ సుందర్‌తో కలిసి 8వ వికెట్‌కు సెంచరీ భాగస్వామ్యాన్ని నిర్మించి.. జట్టును ఆదుకున్నాడు.

మూడో రోజు ఆటలో రిషభ్ పంత్ ఔట్ అయ్యాక.. 191/6 ఉన్నప్పుడు క్రీజులోకి వచ్చాడు నితీశ్ రెడ్డి. ఈ సిరీస్‌లో 41, 38 నాటౌట్, 42, 42, 16 పరుగులు చేసిన నితీశ్.. ఈసారి మాత్రం పట్టుదలతో బ్యాటింగ్ చేశాడు. 8వ స్థానంలో బ్యాటింగ్‌కు వచ్చి 81 బంతుల్లోనే హాఫ్‌ సెంచరీ చేశాడు. మిచెల్ స్టార్క్ వేసిన 83వ ఓవర్‌లో ఫోర్ కొట్టి హాఫ్‌ సెంచరీ చేసి.. పుష్ప ట్రేడ్ మార్క్ సెలెబ్రేషన్.. 'నీ యవ్వ తగ్గేదేలే'అంటూ బ్యాట్‌తో ఫోజిచ్చాడు.

ఆ తర్వాత కూడా అదే జోరు కొనసాగించిన ఈ ప్లేయర్.. 171 బంతుల్లో సెంచరీ మార్కును చేరుకున్నాడు. దీంతో భారత్ తరఫున తన తొలి సెంచరీని నమోదు చేశాడు. అనంతరం తనదైన శైలిలో సెలబ్రేట్‌ చేసుకున్నాడు. స్టేడియంలో మ్యాచ్‌ను చూసిన.. నితీశ్‌ రెడ్డి తండ్రి భావోద్వేగానికి గురయ్యాడు.

కాగా ఈ టెస్టు సిరీస్‌లో విరాట్ కోహ్లీ, రోహిత్ శర్మ లాంటి స్టార్‌ ప్లేయర్‌లు కూడా పరుగులు చేసేందుకు ఇబ్బంది పడ్డారు. కనీసం క్రీజులో కూడా ఎక్కువ సేపు నిలబడలేకపోయారు. కానీ 21 ఏళ్ల నితీశ్‌ రెడ్డి మాత్రం మెరుగైన ప్రదర్శన చేశాడు. ఈ ఇన్నింగ్స్‌తో కలిపి.. ఈ టెస్టు సిరీస్‌లో నాలుగు సార్లు భారత్‌ తరఫున అత్యధిక స్కోరు చేసిన ప్లేయర్‌గా నిలిచాడు. తొలి టెస్టు తొలి ఇన్నింగ్స్‌, రెండో టెస్టు తొలి ఇన్నింగ్స్‌, రెండో టెస్టు రెండో ఇన్నింగ్స్‌లోనూ టాప్‌ స్కోర్‌గా నిలిచాడు. తాజాగా నాలుగో టెస్టు తొలి ఇన్నింగ్స్‌లోనూ సెంచరీతో టాప్ స్కోరర్‌గా నిలిచాడు.

ఇక ఓవర్ నైట్ స్కోరు 164/5తో మూడో రోజు ఆట ప్రారంభించిన టీమిండియా.. నాలుగో రోజు ఆట ముగిసే సమయానికి 358/9తో నిలిచింది. వర్షం కారణంగా అంపైర్లు మూడోరోజు ఆటను త్వరగానే ముగించారు. మొత్తంగా మూడో రోజు ఆటలో భారత్‌ 4 వికెట్లు కోల్పోయి.. 194 పరుగులు స్కోరు చేసింది. క్రీజులో నితీశ్‌ కుమార్‌ రెడ్డి (105), మహమ్మద్ సిరాజ్ (2)లు ఉన్నారు. భారత్ ఇంకా 116 పరుగులు వెనకబడి ఉంది. ఈరోజు వర్షం కారణంగా నష్టపోయిన ఓవర్లను కవర్‌ చేసేందుకు నాలుగో రోజు అరగంట ముందుగానే మ్యాచ్‌ ప్రారంభం కానుంది.