జూబ్లీహిల్స్‌, బంజారాహిల్స్ కాదు.. హైదరాబాద్‌లో ఈ ప్రాంతానికి డిమాండ్.. ఫ్లాట్ రూ.10 కోట్లు.

ఔటర్ రింగ్ రోడ్డు దాటి హైదరాబాద్ నగరం విస్తరిస్తోంది. ఇల్లు, భూములు కొనుగోళ్లు భారీగా జరుగుతున్నాయి. ఓఆర్ఆర్ దాటి ఇళ్ల నిర్మాణాలూ జరుగుతూ కొత్త కొత్త కాలనీలు ఏర్పడుతున్నాయి. ఇలాంటి పరిస్థితుల్లోనూ సెంట్రల్ హైదరాబాద్‌కు ఉన్న డిమాండ్ ఏ మాత్రం చెక్కుచెదరలేదని చెప్పాలి. ఎందుకంటే నవంబర్ 2024లో జరిగిన ఇళ్ల రిజిస్ట్రేషన్లలో అత్యధిక ఖరీదైన ఇళ్లు ఈ ప్రాంతంలోనే ఉన్నాయి. ఖరీదైన ఇండ్లు, ఫ్లాట్లు అనగానే ముందుగా గుర్తొచ్చేంది జూబ్లీహిల్స్, బంజారాహిల్స్ ప్రాంతాలు.

అయితే, వాటిని వెనక్కి నెట్టి మరో ప్రాంతం అత్యధిక ధరలు పలుకుతోంది. అదే సోమాజిగూడ. ఇక్కడ విల్లాల ఖరీదు పదుల కోట్ల రూపాయలపైన పలుకుతున్నాయి. అపార్ట‌మెంట్లలో ఫ్లాట్ల ధరలు సైతం భారీగా ఉన్నాయి. సోమాజిగూడలో నవంబర్‌లో జరిగిన రిజిస్ట్రేషన్లలో ఓ ఫ్లాట్ ఏకంగా రూ. 10.22 కోట్లు పలికింది. ఇక బంజారాహిల్స్‌లో రెండు ఫ్లాట్లు రూ. 7.47 కోట్ల చొప్పున పలికాయి. ఇక జూబ్లీహిల్స్‌లో ఓ ఫ్లాట్ రూ. 7.04 కోట్ల విలువతో రిజిస్ట్రేషన్ జరిగింది. అత్యధిక ధర కలిగిన 5 ఫ్లాట్లు కూడా 3 వేలు అంతకంటే ఎక్కువ విస్తీర్ణం కలిగి ఉన్నాయి.

 మరోవైపు.. విక్రయాలు స్తబ్దుగా ఉన్నప్పటికీ చదరపు అడుగు సగటు ధరల్లో పెరుగుదల నమోదవుతున్నట్లు నైట్ ఫ్రాంక్ ఇండియా రిపోర్ట్ తెలిపింది. హైదరాబాద్‌లో సగటు చదరపు అడుగు ధర రూ. 4,966గా ఉంది. గత ఏడాది 2023, నవంబర్‌తో పోలిస్తే ధరలు 10 శాతం పెరిగాయి. రిజిస్ట్రేషన్లలో హైదరాబాద్ వాటా 17 శాతంగా ఉంది. ఇక మేడ్చల్ మల్కాజిగిరి జిల్లాలో సగటు చదరపు అడుగు ధర రూ. 3,563గా ఉంది. అనధికారికంగా ఈ ధర మరింత ఎక్కువే ఉంటుంది. మొత్తం నగర రిజిస్ట్రేషన్లలో మేడ్చల్ జిల్లా 42 శాతంతో తొలి స్థానంలో నిలిచింది. ఇక రంగారెడ్డి జిల్లాలో సగటు చదరపు అడుగు ధర రూ. 4,213 గా ఉంది. రిజిస్ట్రేషన్లలో 41 శాతంతో రెండో స్థానంలో ఉంది.

మొత్తం 3 జిల్లాల్లో కలిపి రిజిస్ట్రేషన్ల విలువ రూ. 50 లక్షల లోపు ఉన్న ఇళ్లు 58 సాతంగా ఉన్నాయి. రూ. 50 లక్షల నుంచి రూ. 1 కోటి మధ్య స్థిరాస్తుల రిజిస్ట్రేషన్ల వాటా 28 శాతంగా ఉండగా.. రూ. 1 కోటి ఆ పైన ధర ఉండే ఇళ్ల రిజిస్ట్రేషన్లు 14 శాతంగా ఉంది. గత ఏడాదితో పోలిస్తే ఇది 2 శాతం మేర పెరిగింది.