మ్యూచువల్ ఫండ్లతో బంపర్ రిటర్న్స్.. 10 వేల సిప్‌తో ఇలా చేతికి రూ. 65 లక్షలు

మ్యూచువల్ ఫండ్లలో చాలా మంది ఇన్వెస్ట్ చేస్తుంటారు. ఇక్కడ కాంపౌండింగ్ ఇంట్రెస్ట్ ఇందుకు ప్రధాన కారణంగా చెప్పొచ్చు. కాంపౌండింగ్ అంటే వడ్డీపై వడ్డీ వస్తుందన్న సంగతి తెలిసిందే. దీనినే చక్రవడ్డీ అంటారు. ప్రారంభ సంవత్సరాల్లో గొప్ప రిటర్న్స్ లేకున్నా.. కాలం గడుస్తున్న కొద్దీ మంచి లాభాలు అందుకునే అవకాశం ఉంటుంది. ఇప్పుడు ఇలాగే ఇన్వెస్టర్ల సంపదపై కొన్నేళ్లలోనే అద్భుతమైన రాబడి అందించిన ఒక మ్యూచువల్ ఫండ్ పథకం గురించి మనం ఇప్పుడు తెలుసుకుందాం. ఇదే యాక్సిస్ ఈఎల్ఎస్ఎస్ టాక్స్ సేవర్ ఫండ్. ఇది కొన్నేళ్లలో ఇందులో ఇన్వెస్ట్ చేస్తున్న వారికి మంచి రాబడి అందిస్తూ వచ్చింది. ఈ పథకం గురించిన వివరాల్ని మనం ఇప్పుడు తెలుసుకుందాం.

ఈ స్కీమ్ ప్రారంభమైనప్పటి నుంచి చూస్తే.. వార్షిక ప్రాతిపదికన సగటున 16.06 శాతం రిటర్న్స్ అందించింది. ఇక గత పదేళ్ల కాలంలో చూసినట్లయితే ఇది 12.74 శాతం చొప్పున రిటర్న్స్ అందించిందని చెప్పొచ్చు. దీనికి బెంచ్‌మార్క్‌గా నిఫ్టీ 500 ఇండెక్స్‌ను చూస్తారు. ఈ క్రమంలో ఇది 14.13 శాతం చొప్పున గత ఐదేళ్లలో రిటర్న్స్ ఇచ్చింది. ఇప్పుడు యాక్సిస్ ఈఎల్ఎస్ఎస్ ఫండ్ డిసెంబర్ 29తో.. 15 సంవత్సరాలు పూర్తి చేసుకుంది.

ఇది ఓపెన్ ఎండెడ్ ఈక్విటీ లింక్డ్ సేవింగ్స్ స్కీమ్. దీంట్లో లాకిన్ పీరియడ్ మూడేళ్లు ఉంటుంది. ఇంకా టాక్స్ సేవర్ ఫండ్స్ కాబట్టి.. ఆర్థిక సంవత్సరంలో ఇందులో గరిష్టంగా రూ. 1.50 లక్షల వరకు పన్ను ఆదా చేసుకునేందుకు అవకాశం ఉంటుంది. 2024 నవంబర్ వరకు డేటా ప్రకారం చూసినట్లయితే.. అసెట్స్ మేనేజ్‌మెంట్స్ ప్రకారం యాక్సిస్ ఈఎల్ఎస్ఎస్ మ్యూచువల్ ఫండ్ అతిపెద్ద వాటిల్లో ఒకటిగా ఉంది. దీని నికర ఆస్తుల విలువ రూ. 36,373 కోట్లుగా ఉంది. ఈ స్కీమ్ ప్రారంభమైన సమయంలో ప్రతి నెలా రూ. 10 వేల చొప్పున సిప్ చేసిన వారికి వార్షిక ప్రాతిపదికన 15.58 శాతం రిటర్న్స్ చొప్పున ఇప్పుడు చేతికి రూ. 64.84 లక్షలు వచ్చాయని చెప్పొచ్చు.

షార్ట్ టర్మ్ అంటే.. నెలకు రూ. 10 వేల సిప్ చేసిన వారికి గత పదేళ్లలో చూస్తే వార్షిక ప్రాతిపదికన 13.49 శాతం రిటర్న్స్ లెక్కన రూ. 24.25 లక్షలు వచ్చేది. ఇక సిప్ రూపంలో కాకుండా.. ఏకకాలంలో రూ. లక్ష ఈ మ్యూచువల్ ఫండ్‌ పథకంలో స్కీమ్ ప్రారంభంలో ఇన్వెస్ట్ చేసినట్లయితే సగటున 16.05 శాతం రిటర్న్స్ లెక్కన చేతికి రూ. 9.34 లక్షలు వచ్చాయి. రూ. లక్ష పెట్టుబడిపై గత పదేళ్లలో చూస్తే రూ. 3.28 లక్షలు అందాయి.

ఇందులో చేరాలంటే కనీస పెట్టుబడి రూ. 500 ఉంటే సరిపోతుంది. ఆ తర్వాత ఎంతైనా ఇన్వెస్ట్ చేయొచ్చు. నెలవారీ సిప్ రూ. 500 చొప్పున చేయొచ్చు. కనీసం 6 నెలలైనా ఇన్వెస్ట్ చేయాల్సి ఉంటుంది. ఈ ఫండ్ 80 నుంచి 100 శాతం వరకు ఈక్విటీ, ఈక్విటీ రిలేటెడ్ సెక్యూరిటీస్‌ల్లో పెట్టుబడి పెడుతుంది. 0-20 శాతం వరకు డెట్, మనీ మార్కెట్ ఇన్‌స్ట్రుమెంట్లలో పెడుతుందని చెప్పొచ్చు. శ్రేయాష్ దేవాల్కర్, ఆశిష్ నాయక్ ఈ స్కీమ్ మేనేజర్లుగా ఉన్నారు.