ఈపీఎఫ్ఓ గుడ్‌న్యూస్.. కొత్త వ్యవస్థ వచ్చేసింది.. ఇక ఏటీఎం నుంచి పీఎఫ్ విత్‌డ్రా, ఎక్కడి నుంచైనా పెన్షన్

ఉద్యోగుల భవిష్య నిధి సంస్థ కొత్త సంవత్సరంలో కీలక ప్రకటన చేసింది. ముందుగా చెప్పినట్లుగానే కేంద్రీకృత పింఛన్ చెల్లింపుల వ్యవస్థను ఎట్టకేలకు తీసుకొచ్చింది. తాజాగా దీనిని దేశంలోని తమ అన్ని ప్రాంతీయ కార్యాలయాల్లోనూ విస్తరించినట్లు తెలిపింది కార్మిక మంత్రిత్వ శాఖ. దీని వల్ల 68 లక్షల మంది పెన్షనర్లకు ప్రయోజనకరమని వెల్లడించింది. తాజా నిర్ణయంతో ఇక ఈపీఎస్ పెన్షనర్లు.. దేశంలోని ఏ ప్రాంతం నుంచైనా.. ఏ బ్యాంక్ నుంచి అయినా పింఛన్ తీసుకునేందుకు వీలు ఉంటుంది. ఇప్పుడు పెన్షన్ పంపిణీ వ్యవస్థలో డీసెంట్రలైజ్డ్ సిస్టమ్ ఉంది. దీంతో ఈపీఎఫ్ఓ ప్రాంతీయ కార్యాలయాలు.. కేవలం 3-4 బ్యాంకులతో మాత్రం ఒప్పందం కలిగి ఉన్నాయి.

ఈ క్రమంలో పెన్షన్ ప్రారంభ సమయంలో.. పెన్షన్‌దారులు ధ్రువీకరణ కోసం సదరు బ్యాంకుకు వెళ్లాల్సి ఉంటుంది. కొత్తగా తెచ్చిన సెంట్రలైజ్డ్ సిస్టమ్‌తో బ్రాంచ్‌ను సంప్రదించాల్సిన అవసరం తప్పింది. ఇంకా.. పింఛన్ విడుదలైన వెంటనే ఆ మొత్తం నేరుగా అకౌంట్లో జమవుతుంది.

ఈ వ్యవస్థ వల్ల పెన్షనర్లు.. దేశంలోని ఏ ప్రాంతానికి మారినా కూడా ఇబ్బంది ఉండదు. దేశంలోని ఏ బ్యాంక్ నుంచైనా.. ఏ బ్రాంచ్ నుంచి అయినా పెన్షన్ పొందే వీలుంటుందని కేంద్ర కార్మిక శాఖ వెల్లడించింది. ఈ కొత్త వ్యవస్థను అక్టోబర్ నెలలో పైలట్ ప్రాజెక్టుగా ప్రారంభించగా.. నవంబర్ నెలలో రెండో దశ పైలట్ ప్రాజెక్ట్ చేపట్టారు. జనవరి నుంచి పూర్తి స్థాయిలో అందుబాటులోకి తెచ్చారు.

ఇంకా కొత్త వ్యవస్థ ఇప్పటికే ఈపీఎఫ్ఓ ప్రాంతీయ కార్యాలయాల్లోకి రాగా.. త్వరలోనే ఈపీఎఫ్ నుంచి డబ్బుల్ని విత్‌డ్రా చేసుకోవాలనుకునే వారికి కూడా అదిరిపోయే శుభవార్త అందనుంది. కొంత కాలంలోనే ఏటీఎంల నుంచి పీఎఫ్ విత్‌డ్రా చేసుకునే ఛాన్స్ ఉండనుంది. ఈ ఏడాది జూన్‌లోగా ఈపీఎఫ్ఓ కటింగ్ ఎడ్జ్ సాఫ్ట్‌వేర్ వ్యవస్థను తీసుకురానుందని.. ఇది ఈపీఎఫ్ఓ 3.0 కింద పనిచేస్తుందని కేంద్ర కార్మిక శాఖ మంత్రి మాన్‌సుఖ్ మాండవీయ తెలిపారు. ఈపీఎఫ్ఓ 3.0 కింద తమ చందాదారులకు ఈపీఎఫ్ఓ.. ఏటీఎం కార్డుల్ని కూడా అందిస్తుందని వెల్లడించారు.

ఈ కార్డుతోనే ఏటీఎంల నుంచి పీఎఫ్ నగదు తీసుకునే అవకాశం ఉంటుంది. ప్రస్తుతం ఆన్‌లైన్‌లో అయితే ఈపీఎఫ్ క్లెయిమ్ సెటిల్మెంట్ కోసం వారం నుంచి 10 రోజుల వరకు పడుతుంది. క్లెయిమ్ సెటిల్ అయ్యాక.. నేరుగా లబ్ధిదారుల బ్యాంక్ అకౌంట్లోనే డబ్బులు పడతాయని చెప్పొచ్చు. ఇప్పుడు కొత్త వ్యవస్థ అమల్లోకి వస్తే.. నేరుగా పీఎఫ్ డబ్బుల్ని ఏటీఎం నుంచే తీసుకోవచ్చన్నమాట.