స్టాక్ మార్కెట్లో మరో కుంభకోణం.. కేతన్ పరేఖ్ ప్రకంపనలు.. కోట్లల్లో లాభాలు కొల్లగొట్టారు

స్టాక్ మార్కెట్ నియంత్రణ సంస్థ మరో ఫ్రంట్ రన్నింగ్ కుంభకోణాన్ని బయటపెట్టింది. ఇన్వెస్టర్లకు సుపరిచితమైన కేతన్ పరేఖ్‌ చట్టవ్యతిరేక లాభాల్ని పొందినట్లు చెప్పిన సెబీ.. అతడిపై చర్యలు తీసుకుంది. 2021 జనవరి 1 నుంచి 2023 జూన్ 30 మధ్య ట్రాన్సాక్షన్లపై విచారణ జరిపి.. ఈ అసాధారణమైన ఫ్రంట్ రన్నింగ్ స్కామ్‌లో కేతన్ పరేఖ్ పాత్ర ఉందని నిర్ధరించింది. కేతన్ రూ. 65.77 కోట్ల మేర అక్రమంగా లాభాల్ని పొందారని.. వాటిని వెనక్కి ఇవ్వాలని ఆదేశించింది. ఈ వ్యవహారంలో 22 కంపెనీలకు ఇప్పటికే షోకాజ్ నోటీసులు అందించింది. ఈ విషయమై గురువారం రోజు సెబీ మధ్యంతర ఆదేశాలు జారీ చేసింది.

సెబీ పూర్తికాల సభ్యుడు కమలేశ్ వార్ష్‌నీ జారీ చేసిన ఈ ఆదేశాల ప్రకారం.. 'రోహిత్ సల్గావ్‌కర్ (నోటిసీ నం.1), కేతన్ పరేఖ్ (నోటిసీ నం.2) ఈ కుంభకోణం మొత్తం నడిపారు. ఒక్క పెద్ద క్లయింట్‌కు చెందిన ఎన్పీఐ నుంచి ఈ ఫ్రంట్ రన్నింగ్ కార్యకలాపాల్ని నిర్వహించారు. అకోశ్ కుమార్ పొద్దార్ (నోటిసీ నం.10) ఈ కార్యకలాపాలకు మధ్యవర్తిగా ఉన్నట్లు అంగీకరించారు.' అని ఉంది.

ఇక నోటిసీ నం.2, 10 లపై ఇప్పటికే సెక్యూరిటీస్ మార్కెట్లలో పాల్గొనకుండా నిషేధం ఉంది. ఇక మీదపై నోటిసీ నం. 1,2, 10 సెక్యూరిటీల్ని కొనకూడదు, అమ్మకూడదని.. సెబీ వద్ద నమోదైన ఏ ఇంటర్మీడియటరీతో అనుబంధం కొనసాగించరాదని.. ఇవి తక్షణమే అమల్లోకి వచ్చేలా సెబీ ఆదేశాలు ఇచ్చింది.

స్కాం ఎలా జరిగిందంటే?

ఏదైనా ట్రేడ్ గురించి.. సాధారణ మదుపరుల కంటే కొందరికి మాత్రమే ముందస్తు సమాచారం ఉంటే దాన్ని ఫ్రంట్ రన్నింగ్ అంటారు. ఆ సమాచారం ఆధారంగా చేసే మోసాన్ని ఫ్రంట్ రన్నింగ్ స్కాం అంటారు. 'ఒక పెద్ద క్లయింట్‌కు చెందిన ట్రేడర్లతో రోహిత్‌కు బాగా దగ్గరి పరిచయముంది. వీరంతా తాము చేపట్టబోయే ట్రేడ్స్ సమాచారాన్ని ఆయనతో పంచుకునే వారు. ఈ సమాచారాన్ని కేతన్ పరేఖ్‌కు అందించేవారన్నమాట. దీంతోనే చట్టవ్యతిరేక లాభాల్ని ఆయన పొందారు.

కేతన్ సాధారణ వ్యక్తి కాదని.. 14 ఏళ్ల పాటు సెక్యూరిటీస్ మార్కెట్ల నుంచి ఇది వరకే (2000 సంవత్సరం) నిషేధం ఎదుర్కొన్నారని సెబీ వివరించింది. ఫ్రంట్ రన్నింగ్ ట్రేడ్స్‌ను కోల్‌కతా సంస్థల ద్వారా కేతన్ నిర్వహించారు. అంటే నియంత్రణ సంస్థ పరిధి వెలుపల ఉండి ఈ కథంతా నడిపించాడు. పెద్ద క్లయింట్‌కు చెందిన 90 శాతం వరకు ట్రేడ్స్‌ను కేతన్ ఒక్కరే చేయడం గమనార్హం.