దేశంలోకి చైనా కొత్త వైరస్.. కుప్పకూలిన మార్కెట్లు.. సెన్సెక్స్ 1200 డౌన్

చైనాలో వేగంగా విస్తరిస్తోన్న కొత్త వైరస్ హ్యూమన్ మెటానిమోవైరస్ (HMPV) భారత్‌లోకి ఎంట్రీ ఇచ్చింది. దేశంలో రెండు హెచ్ఎంపీవీ కేసులు గుర్తించినట్లు కేంద్ర ప్రభుత్వం అధికారిక ప్రకటన చేసింది. కర్ణాటక రాజధాని బెంగళూరులో ఇద్దరు చిన్నారులకు ఈ వైరస్ సోకినట్లు పేర్కొంది. కరోనా మహమ్మారిలా ఈ వైరస్ సైతం విజృంభిస్తే తీవ్ర పరిణామాలు ఉంటాయని స్టాక్ మార్కెట్ ఇన్వెస్టర్లలో ఆందోళన నెలకొంది. దీంతో తమ పెట్టుబడులను ఉపసంహరించుకునే పనిలో పడ్డారు. ఒక్కసారిగా విక్రయాలకు దిగడంతో ఇవాళ సోమవారం జనవరి 6వ తేదీన బాంబే స్టాక్ఎక్స్చేంజ్ సూచీ సెన్సెక్స్ ఏకంగా 1200 పాయింట్ల మేర నష్టపోయింది. నిఫ్టీ 50 సూచీ దాదాపు 1.4 శాతం నష్టపోయింది.

మిడ్ క్యాప్, స్మాల్ క్యాప్ స్టాక్స్‌తో పాటుగా ఇతర రంగాల్లోనూ అమ్మకాల ఒత్తిడి కనిపించింది. సెన్సెక్స్ 1200 మేర కోల్పోయి ఇంట్రాడే కనిష్ఠ స్థాయి 77,960ని తాకింది. ఇక నిఫ్టీ 23,600 దిగివకు పడిపోయింది. మెటల్, పీఎస్‌యూ బ్యాంకులు, రియల్ ఎస్టేట్, ఆయిల్, గ్యాస్, ఫైనాన్షియల్ సర్వీసెస్ కంపెనీల్లో భారీగా అమ్మకాలు జరిగాయి. యూనియన్ బ్యాంక్ ఆఫ్ ఇండియా షేర్లు ఏకంగా 7 శాతం మేర పడిపోయాయి. బ్యాంక్ ఆఫ్ బరోడా, హెచ్‌పీసీఎల్, పీపీసీఎల్, టాటా స్టీల్, అదానీ ఎనర్జీ సొల్యూషన్స్, పీఎన్‌బీ వంటి కంపెనీల షేర్లు 4- 5 శాతం మేర నష్టాల్లోకి జారుకున్నాయి. హెవీ వెయిట్ షేర్ల విషయానికి వస్తే హెచ్‌డీఎఫ్‌సీ బ్యాంక్, రిలయన్స్ ఇండస్ట్రీస్, కోటక్ మహీంద్రా బ్యాంక్ వంటివి నష్టాల్లోనే ట్రేడవుతున్నాయి.

స్టాక్ మార్కెట్ల పతనానికి కారణం..

స్టాక్ మార్కెట్ ఇన్వెస్టర్లు ప్రధానంగా క్యూ3 ఫలితాల్లో మంచి లాభాలు ప్రకటించే కంపెనీల కోసం చూస్తున్నట్లు తెలుస్తోంది. ఈ వారంలోనే పలు కంపెనీలు క్యూ3 ఫలితాలు ప్రకటించన్నాయి. అలాగే అమెరికా అధ్యక్షుడిగా డొనాల్డ్ ట్రంప్ ఎన్నికైన తర్వాత జరుగుతున్న పరిణామాలు, అంతర్జాతీయ భౌగోళిక అంశాలను క్షుణ్నంగా పరిశీలిస్తున్నారు. అయితే, భారత్‌లోకి చైనా కొత్త వైరస్ హెచ్ఎంపీవీ ఎంట్రీ ఇచ్చిందన్న వార్త స్టాక్ మార్కెట్ ఇన్వెస్టర్లను షాక్‌కి గురించి చేసిందని మార్కెట్ విశ్లేషకులు చెబుతున్నారు. కర్ణాటకలోని ఇద్దరు చిన్నారులకు హెచ్ఎంపీవీ వైరస్ సోకినట్లు గుర్తించిన్టలు యూనియన్ హెల్త్ మినిస్ట్రీ ప్రకటించిన తర్వాత స్టాక్ మార్కెట్లపై ప్రభావం కనిపించింది. మదుపరులు అప్రమత్తంగా వ్యవహరిస్తున్నారు. తమ పెట్టుబడులను వెనక్కి తీసుకునేందుకు మొగ్గు చూపడంతో సూచీలు కుప్పకూలాయి. కరోనా మహమ్మారి విజృంభించిన సమయంలో స్టాక్ మార్కెట్లు భారీగా పడిపోయిన సంగతి తెలిసిందే. దీంతో మళ్లీ అదే పరిస్థితులు వస్తాయేమోననే భయాలు ఉంటాయి.