నేపాల్-టిబెట్ సరిహద్దుల్లో భారీ భూకంపం.. 95 మంది మృతి.. భారత్‌లోనూ ప్రకంపనలు

నేపాల్, టిబెట్ సరిహద్దుల్లో మంగళవారం ఉదయం భారీ భూకంపం సంభవించింది. రిక్టర్ స్కేల్‌పై 7.1 తీవ్రత నమోదయ్యింది. ఈ భూకంపం ప్రభావం భారత్‌లోనూ కనిపించింది. నేపాల్ సరిహద్దు రాష్ట్రాలైన బిహార్, అసోంతో పాటు దేశ రాజధాని ఢిల్లీలోనూ ప్రకంపనలు చోటుచేసుకున్నాయి. బిహార్‌లోని భూప్రకంపనలకు ప్రజలు ఇళ్లు, అపార్ట్‌మెంట్‌ల నుంచి భయంతో బయటకు పరుగులు తీశారు. భూకంప కారణంగా ఇప్పటి వరకూ టిబెట్‌లో 95 మంది ప్రాణాలు కోల్పోయారని అధికారులు తెలిపారు. మరో 100 మందికిగాపై గాయపడినట్టు పేర్కొన్నారు. ఎవరెస్ట్ శిఖరానికి సమీపంలోనే ఈ భూకంప కేంద్రం ఉన్నట్టు శాస్త్రవేత్తలు గుర్తించారు. భారీగా ఆస్తి నష్టం కూడా సంభవించింది. దీని గురించి ఇంకా పూర్తి సమాచారం అందాల్సి ఉంది.

నేపాల్‌ రాజధాని ఖాఠ్మాండుకు తూర్పున ఉన్న లొబుచే సిటీకి ఈశాన్యంగా 93 కిలోమీటర్ల దూరంలో భూకంప కేంద్రం ఉన్నట్టు అమెరికా జియోలాజికల్ సర్వే నివేదించింది. ఖాఠ్మాండుకు తూర్పున 150 కి.మీ. దూరంలోని కుంభు హిమనీనదం, వాయువ్య ఎవరెస్ట్ బేస్ క్యాంప్‌నకు 8.5 కి.మీ. దూరంలో లుబొచే ఉంది. మంగళవారం ఉదయం 6.35 గంటలకు ఈ భూకంపం సంభవించిందని, బిహార్‌ వ్యాప్తంగా.. ఉత్తర భారత్‌లోని ఢిల్లీ, పశ్చిమ్ బెంగాల్, అసోం రాష్ట్రాలు, పలు ప్రాంతాల్లో ప్రకంపనలు నమోదయినట్టు పేర్కొంది.

నేపాల్ సరిహద్దుల్లో భూటాన్, బంగ్లాదేశ్‌లోనూ దీని ప్రభావం కనిపించినట్టు తెలిపింది. చైనా భూకంపాల పరిశోధన కేంద్రం మాత్రం 6.8 తీవ్రతగా పేర్కొంది. సముద్ర మట్టానికి 13,800 అడుగుల ఎత్తులో భూకంప కేంద్రం ఉన్నట్టు తెలిపింది.

ఇక, సోమవారం మధ్యాహ్నం అఫ్గనిస్థాన్‌లోనూ భూకంపం చోటుచేసుకుంది. ఇది రిక్టర్ స్కేల్‌పై 4.5 తీవ్రతగా నమోదయినట్టు నేషనల్ సెంటర్ ఆఫ్ సిస్మాలజీ పేర్కొంది. భూకంపం భూమికి 120 కి.మీ. లోతులో సంభవించినట్టు తెలిపింది.

భౌగోళికంగా నేపాల్ భూకంపాల ముప్పు ప్రాంతంలో ఉంది. భారత్, యురేషియా టెక్టోనిక్ ప్లేట్స్‌ ఢొకొట్టడంతో హిమాలయాలు ఏర్పడటం వల్ల తరుచుగా అక్కడ భూంకపాలు సంభవిస్తాయి. నవంబరు 2023లో అక్కడ 5.7 తీవ్రతతో భూకంపం సంభవించింది. ఈ ఘటనలో 153 మంది ప్రాణాలు కోల్పోగా.. వందల మంది గాయపడ్డారు. 2015 తర్వాత అక్కడ సంభవించిన అతిపెద్ద భూకంపం ఇదే. 2015 భూకంపంలో ఏకంగా 9 వేల మంది చనిపోగా.. 22 వేల మంది గాయపడ్డారు. భూకంప తీవ్రతకు ఇళ్లు, భవనాలు పేకమేడల్లా కుప్పకూలాయి. కాగా, ప్రస్తుతం దానికి మించి.. 7.1 తీవ్రతతో భూకంపం వచ్చింది. ప్రాణ, ఆస్తినష్టం కూడా భారీగా ఉంటుందని భావిస్తున్నారు.