వేల కోట్ల సంపాదన.. ఇప్పుడేం చేయాలో అర్ధం కావట్లే.. యువ వ్యాపారవేత్త ఆవేదన!

‘ఆనందంగా జీవించడమే.. అసలైన ఆస్తి.. సంపదలో సంతోషం లేదు.. అవును పెద్దల చెప్పే ఈ మాటలు అక్షరాల నిజం. రకరకాల వ్యాపారాలతో అంతులేని సంపదను పోగేసుకోవడం.. ఆస్తుల విలువ పెంచుకోవడం.. దాదాపుగా అందరి ఆలోచన ఇదే. కావాల్సినంత సంపాదించి, నచ్చినట్టుగా బతకాలని ప్రతి ఒక్కరూ అనుకుంటారు. ఆ లక్ష్యాన్ని కొందరు వేగంగా చేరుకుంటే... ఇంకొందరు ఈ ప్రయత్నంలోనే చివరి దశకు చేరుకుంటారు. కానీ ఓ యువ వ్యాపారవేత్తకు మాత్రం విచిత్రమైన అనుభవం ఎదురయ్యింది. చిన్న వయసులోనే వేల కోట్ల రూపాయాలు సంపాదించిన అతడికి.. ఇప్పుడిక ఏం చేయాలో అర్ధం కావడం లేదని వాపోతున్నాడు. అతడే భారత సంతతికి చెందిన యువ వ్యాపారి వినయ్ హిరేమత్.

టెక్‌ సంస్థ లూమ్‌ను స్థాపించిన హిరేమత్.. దానిని విజయవంతమైన కంపెనీగా మలిచారు. ఈ క్రమంలో గతేడాది దానిని అట్లాసియన్ అనే సంస్థకు విక్రయించగా. 975 మిలియన్ డాలర్లు (అంటే భారత కరెన్సీలో రూ.8 వేలకుపైగా కోట్లు) వచ్చాయి. కేవలం 35 ఏళ్లలోపే ఇంత సంపాదించిన హిరేమత్. మరో కొత్త సంస్థ స్థాపించడం గురించి ఆలోచిస్తాడని, కుటుంబంతో హాయిగా గడుపుతూ ఉంటారని అనుకుంటాం. కానీ, ఆయన రెండు రోజుల కిందట సోషల్ మీడియాలో పెట్టిన పోస్టు మాత్రం ప్రతిఒక్కరినీ షాక్‌కు గురిచేస్తోంది.

‘‘నేను ధనవంతుడినయ్యా.... జీవితంలో ఏం చేయాలో నాకు ఇప్పుడు తెలియడం లేదు. కంపెనీని విక్రయించిన తర్వాత.. నేను మళ్లీ పని చేయాల్సిన అవసరం లేకుండా పూర్తిగా సంబంధం లేని స్థితికి చేరుకున్నాను.. ఒకవైపు అంతా అన్వేషణలా ఉంది.. కానీ స్ఫూర్తిదాయకంగా కాదు. సంపాదన లేదా హోదా కోసం నాకు ఇంకా ఎలాంటి కోరికలు లేవు.. కావాల్సినంత ఆర్థిక స్వేచ్ఛ ఉన్నా ఓ సందిగ్ధంలో ఉన్నాను. జీవితంపై సానుకూలంగా లేను. ఎవరి సానుభూతి కోసమో నేను ఈ పోస్ట్ పెట్టడం లేదు.. అసలు ఏ ఉద్దేశంతోనే పెట్టానో కూడా నాకు తెలియదు’’ అంటూ బ్లాగ్‌లో హిరేమత్ రాసుకొచ్చారు.

సంస్థను విక్రయించిన తర్వాత తన గర్ల్‌ఫ్రెండ్‌తో కలిసి వినయ్ అనేక ప్రాంతాల్లో పర్యటించారు. కానీ, అభద్రతాభావం వల్ల ఆమెకు బ్రేకప్ చెప్పేశాడు. ‘ఈ పోస్టు ఆమె చదువుతున్నట్టయితే.. తనకు క్షమాపణ చెప్పాలనుకుంటున్నాను... నీకు నచ్చినట్టుగా నేను ఉండలేకపోయాను.. కానీ, రెండేళ్ల పాటు నువ్వు అందించిన అవిభాజ్యమైన ప్రేమకు, జ్ఞాపకాలకు కృతజ్ఞతలు’ అని తెలిపారు.

తన కంపెనీ కొనుగోలు చేసిన అట్లాసియన్.. తనకు 60 మిలియన్ డాలర్ల ప్యాకేజీతో ఉద్యోగాన్ని ఆఫర్ చేసిందని, కానీ, దాన్ని తాను తిరస్కరించానని తెలిపారు. రోబోటిక్ సంస్థను స్థాపించాలని చేసిన ప్రయత్నం కూడా ఫలించలేదని చెప్పారు. అంతేకాదు, ప్రపంచ కుబేరుడు ఎలాన్‌ మస్క్‌, వివేక్ రామస్వామి వంటి దిగ్గజాలతో పని చేయాలన్న ప్రయత్నమూ ముందుకుసాగలేదని వాపోయాడు. ఎలాంటి అనుభవం లేకుండా హిమాలయాలను అధిరోహించడానికి వెళ్లి అనారోగ్యానికి గురయ్యాడు. ప్రస్తుతం హవాయీ ద్వీపంలో ఉన్న అతడు.. ఫిజిక్స్ నేర్చుకునే పనిలో ఉన్నాడు. కాగా, ప్రస్తుతం వినయ్ హిరేమత్ పెట్టిన పోస్టు మాత్రం సోషల్ మీడియాలో చర్చనీయాంశంగా మారింది.