కెనడా ప్రధాని పదవికి జస్టిన్ ట్రూడో రాజీనామా.. భారత్‌తో గొడవే కొంప ముంచిందా

కెనడా రాజకీయాల్లో తీవ్ర పరిణామాలు చోటుచేసుకున్నాయి. కెనడా ప్రధానమంత్రి పదవికి, లిబరల్ పార్టీ అధ్యక్ష పదవికి రాజీనామా చేయనున్నట్లు జస్టిన్ ట్రూడో వెల్లడించారు. పార్టీకి, ప్రధాని పదవికి కొత్త వ్యక్తిని ఎన్నుకునే వరకు తాను ఆ పదవిలో కొనసాగుతానని.. ఆ తర్వాత బాధ్యతల నుంచి తప్పుకుంటానని చెప్పారు. జస్టిన్ ట్రూడో వ్యవహార శైలి పట్ల గత కొంతకాలంగా కెనడాలోనే తీవ్ర వ్యతిరేకత వ్యక్తం అవుతోంది. ఇక భారత్‌తో కయ్యానికి కాలుదువ్విన జస్టిన్ ట్రూడో తీరుపై సొంత పార్టీలోనే తీవ్ర అసమ్మతి నెలకొంది. ప్రధానమంత్రి పదవి నుంచి దిగిపోవాలని లిబరల్ పార్టీకి చెందిన నేతలే కొంతకాలంగా డిమాండ్ చేస్తున్నారు. దీంతో ఎట్టకేలకు తాజాగా పదవికి రాజీనామా చేస్తున్నట్లు జస్టిన్ ట్రూడో ప్రకటన చేశారు.

లిబరల్ పార్టీ నాయకత్వానికి, కెనడా ప్రధానమంత్రి పదవికి రాజీనామా చేయనున్న విషయాన్ని ఇప్పటికే పార్టీకి, గవర్నర్‌కు తెలియజేస్తున్నట్లు తెలిపారు. పార్టీ కొత్త నాయకత్వాన్ని ఎన్నుకున్న వెంటనే రాజీనామా చేస్తానని వెల్లడించారు. కొత్త ప్రధానమంత్రి ఎంపిక ప్రక్రియను కొనసాగించేందుకు మార్చి 24వ తేదీ వరకు పార్లమెంటును వాయిదా వేస్తున్నట్లు జస్టిన్‌ ట్రూడో ప్రకటించారు.

కెనడా దేశ ఉప ప్రధానమంత్రి.. ఆర్థిక శాఖ మంత్రి క్రిస్టియా ఫ్రీలాండ్‌ ఇప్పటికే రాజీనామా చేశారు. జస్టిన్‌ ట్రూడో కేబినెట్‌లో అత్యంత శక్తిమంతురాలిగా గుర్తింపు పొందిన ఆమె.. ప్రధానమంత్రి జస్టిన్ ట్రూడో ప్రజాదరణ కోల్పోతున్నారని తీవ్ర ఆరోపణలు చేశారు. ఇలా దాదాపు దశాబ్ద కాలం కెనడా ప్రధానమంత్రిగా ఉన్న జస్టిన్‌ ట్రూడో.. రాజకీయ ప్రస్తుతం తీవ్ర అనిశ్చితిని ఎదుర్కొంటున్నారు. ఇక జస్టిన్ ట్రూడో ప్రధాని పదవికి రాజీనామా చేయాల్సిందేనని సొంత పార్టీ ఎంపీలే డిమాండ్‌ పెరిగిన నేపథ్యంలో ఈ పరిణామం చోటు చేసుకుంది.

ఖలిస్థానీ ఉగ్రవాది హర్దీప్ సింగ్ నిజ్జర్ హత్య కేసులో భారత ఏజెంట్ల ప్రమేయం ఉందని గతేడాది కెనడా పార్లమెంటులో జస్టిన్ ట్రూడో చేసిన నిరాధార ఆరోపణలు తీవ్ర దుమారం రేపిన విషయం తెలిసిందే. ఆ తర్వాత భారత్ కెనడా మధ్య దౌత్య పరంగా తీవ్ర ఘర్షణ వాతావరణం నెలకొంది. దీనిపై భారత్ కూడా తీవ్రంగా పరిగణించింది. ఈ వ్యవహారం తీవ్రంగా మారడంతో కెనడాలోనే జస్టిన్ ట్రూడోపై తీవ్ర వ్యతిరేకత వ్యక్తం అయింది. చివరికి అది ఆయన పదవికే ఎసరు పెట్టింది.