బెంగళూరు టెకీ సూసైడ్ కేసులో ట్విస్ట్.. నానమ్మకు మనవడిని అప్పగించేందుకు సుప్రీం నిరాకరణ

భార్య, అత్తింటి వారి వేధింపులు తట్టుకోలేక.. లేఖ రాసి.. వీడియో రికార్డ్ చేసి ఆత్మహత్య చేసుకున్న బెంగళూరు సాఫ్ట్‌వేర్ ఇంజినీర్ అతుల్ సుభాష్ వ్యవహారం దేశవ్యాప్తంగా తీవ్ర సంచలనం సృష్టించిన విషయం తెలిసిందే. ఈ ఘటన తర్వాత ఇలాంటి వ్యవహారాలు చాలానే బయటికి వస్తున్నాయి. ఈ క్రమంలోనే అతుల్ సుభాష్ కేసు ప్రస్తుతం విచారణ జరుగుతూనే ఉంది. మరోవైపు.. అతుల్ సుభాష్ కుమారుడు ప్రస్తుతం తల్లి వద్ద ఉండగా.. అతడిని తమకు అప్పగించాలని అతుల్ సుభాష్ తల్లి సుప్రీంకోర్టును ఆశ్రయించింది. అయితే ఆమెకు అక్కడ ఎదురుదెబ్బ తగిలింది. మనవడిని ఆమెకు ఇచ్చేందుకు సుప్రీంకోర్టు అంగీకరించలేదు.

అతుల్‌ సుభాష్ చనిపోయినా.. అతడి కుమారుడిని తమ కస్టడీకి అప్పగించాలని కోరుతూ అతుల్ సుభాష్ తల్లి సుప్రీంకోర్టును ఆశ్రయించింది. ఆమె పిటిషన్‌పై తాజాగా విచారణ జరిపిన సుప్రీంకోర్టు అందుకు నిరాకరించింది. ఈ సందర్భంగా కీలక వ్యాఖ్యలు చేసిన సుప్రీంకోర్టు.. ఆ చిన్నారి తల్లి ప్రస్తుతం బతికే ఉందని తెలిపింది. ప్రస్తుతం ఆ చిన్న బిడ్డకు నానమ్మ అపరిచిత వ్యక్తేనని.. ఈ విషయం చెప్పడం కాస్త బాధగానే ఉందని కోర్టు అభిప్రాయపడింది. కావాలనుకుంటే ఆ చిన్నారి వద్దకు వెళ్లి చూసిరండి అంటూ ఆ బాలుడి నానమ్మకు సూచించింది. అయితే ఆ బాలుడి కస్టడీ కావాలనుకుంటే మాత్రం అదంతా వేరే ప్రక్రియ అని సుప్రీంకోర్టు స్పష్టం చేసింది.

అయితే ఈ కేసులో నేరం రుజువు అయ్యేవరకు అతుల్ సుభాష్ భార్య నికితా సింఘానియాను దోషిగా పేర్కొనవద్దని సుప్రీంకోర్టు సూచించింది. అయితే ఆ బాలుడు ఎక్కడ ఉన్నాడో గుర్తించేందుకు దాఖలు చేసిన పిటిషన్‌పై విచారణను మాత్రం సుప్రీంకోర్టు జనవరి 20వ తేదీకి వాయిదా వేసింది. ప్రస్తుతం ఆ చిన్నారి తల్లి కస్టడీలోనే ఉన్నాడని నికితా సింఘానియా తరఫు లాయర్ కోర్టుకు వెల్లడించారు.

మరోవైపు.. హర్యానాలో ఫరిదాబాద్‌ బోర్డింగ్ స్కూల్‌లో తన కుమారుడు చదువుతున్నాడని.. అతుల్ సుభాష్ భార్య నికితా సింఘానియా పోలీసులకు చెప్పినట్లు సమాచారం. తన బంధువు సుశీల్‌ సింఘానియా కస్టడీలో ఉన్నాడని ఆమె చెప్పగా.. ఆ బాలుడు ఎక్కడ ఉన్నాడో తనకు తెలియదని సుశీల్ సింఘానియా చెప్పడం మరిన్ని అనుమానాలకు తావిస్తోంది.

భార్య, అత్తమామల వేధింపులు తట్టుకోలేని అతుల్‌ సుభాష్.. బెంగళూరులో కొన్నిరోజుల క్రితం ఆత్మహత్య చేసుకోవడం తీవ్ర కలకలం రేపింది. అయితే దానికి ముందు ఏకంగా 40 పేజీల లేఖ రాసి.. వీడియో రికార్డ్ చేసి మరీ సూసైడ్ చేసుకున్నట్లు పోలీస్‌ అధికారులు వెల్లడించారు. ఉత్తర్‌ప్రదేశ్‌కు చెందిన అతుల్ సుభాష్.. ఐటీ డైరెక్టర్‌గా పని చేస్తూ బెంగళూరులోని మారతహళ్లి ప్రాంతంలోని మంజునాథ లేఅవుట్లో నివసించేవారు. భార్యతో తాను మానసిక క్షోభకు గురయ్యాయని.. దానికి సంబంధించిన ఆత్మహత్య లేఖను సుప్రీంకోర్టు, హైకోర్టు జడ్జిలు, తన ఆఫీస్, సిబ్బంది, కుటుంబసభ్యులకు ఈ-మెయిల్‌ ద్వారా పంపించి ఆత్మహత్య చేసుకున్నాడు.