తెలుగు రాష్ట్రాల్లో బ్యాంకులకు వరుస సెలవులు.. సంక్రాంతి హాలీడే ఏ రోజంటే?

ఈ వారం బ్యాంకులో మీకు పని ఉందా? ఏదైనా ముఖ్యమైన ఆర్థిక లావాదేవీ నిర్వహించాలా? అయితే మీరు కచ్చితంగా ఈ వారం బ్యాంక్ సెలవుల గురించి తెలుసుకోవాలి. జనవరి 11వ తేదీ నుంచి బ్యాంకులకు వరుస సెలవులు ఉన్నాయి. బ్యాంకు హాలీడేస్ గురించి తెలుసుకోకుండా నేరుగా బ్యాంకుకు వెళ్లి మూసి ఉంటే ఇబ్బందులు పడాల్సి వస్తుంది. వచ్చే వారంలో సంక్రాంతి పండగ ఉంది. సంక్రాంతి పర్వదినం రోజున బ్యాంకులకు హాలీడే ఉంటుంది. బ్యాంకులు మూసి ఉంటే చెక్ బుక్, పాస్ బుక్ వంటి చాలా రకాల బ్యాంకింగ్ సేవలు ఆగిపోతాయి. మరి తెలుగు రాష్ట్రాల్లో ఎప్పుడెప్పుడు బ్యాంకు సెలవులు ఉన్నాయో తెలుసుకుందాం.

రిజర్వ్ బ్యాంక్ ప్రకారం 2025, జనవరిలో బ్యాంకు సెలవులు ఇలా..

జనవరి 11, 2025 రోజున శనివారం: రెండో శనివారం కాబట్టి బ్యాంకులకు దేశ వ్యాప్తంగా సాధారణ సెలవు ఉంటుంది.

జనవరి 12, 2025 రోజున ఆదివారం: దేశవ్యాప్తంగా బ్యాంకులకు ఆదివారం సాధారణ సెలవు ఉంటుంది.

జనవరి 14, 2025 మంగళవారం రోజున మకర సంక్రాంతి సందర్భంగా ఆంధ్రప్రదేశ్, తెలంగాణ రాష్ట్రాల్లో బ్యాంకులకు సెలవు ఇచ్చారు. అలాగే తమిళనాడు, అరుణాచల్ ప్రదేశ్, గుజరాత్, కర్ణాటక, ఒడిశా, కేరళా, పంజాబ్, సిక్కిం, అస్సోం, ఉత్తర్ ప్రదేశ్ వంటి రాష్ట్రాల్లోనూ బ్యాంకులకు సెలవు ఉంటుంది.

జనవరి 15, 2025 బుధవారం రోజున తిరువళ్లువర్ దినోత్సవం, మాఘ బిహు పూజల నేపథ్యంలో తమిళనాడులోని చెన్నైలో బ్యాంకులు మూసి ఉంటాయి.

జనవరి 16, 2025 గురువారం రోజున ఉజ్జవర్ తిరునాల్ సందర్భంగా తమిళనాడులో బ్యాంకులు మూసి ఉంటాయి.

జనవరి 19, 2025 రోజున ఆదివారం కావడంతో బ్యాంకులకు సెలవు ఉంటుంది.

జనవరి 23, 2025 గురువారం రోజున నేతాజీ సుభాష్ చంద్రబోస్ జయంతి సందర్భంగా కోల్‌కతా, భూవనేశ్వర్ వంటి ప్రాంతాల్లో సెలవు

జనవరి 15, 2025 శనివారం, జనవరి 26, 2025 ఆదివారం కావడంతో బ్యాంకులకు సాధారణ సెలవులు ఉంటాయి.

ఈ సంక్రాంతికి ముందు తెలుగు రాష్ట్రాల్లో జనవరి 11, 12 తేదీల్లో సాధారణ సెలవు ఉంటుంది. జనవరి 14వ తేదీన మకర సంక్రాంతి సెలవు ఉంటుంది. ఈ నేపథ్యంలో రెండు రాష్ట్రాల ప్రజలు సెలవును తెలుసుకుని బ్యాంకు పనులను పూర్తి చేసుకోవడం మంచిది. మరోవైపు.. బ్యాంకులు మూసి ఉన్నప్పటికీ డిజిటల్ బ్యాంకింగ్ సేవలు అందుబాటులో ఉంటాయి. యూపీఐ, మొబైల్ బ్యాంకింగ్, ఇంటర్నెట్ బ్యాంకింగ్ వంటి సేవలు కొనసాగుతాయి. నేరుగా బ్యాంకుకు వెళ్లి పూర్తి చేసే పనులు ఉంటే మాత్రం సెలవు రోజులను తెలుసుకుని పూర్తి చేసుకోండి.