వడ్డీ రేట్లు తగ్గించిన హెచ్‌డీఎఫ్‌సీ.. ఇప్పుడు రూ.20 లక్షల హోమ్ లోన్‌కు..ఈఎంఐ ఎంత కట్టాలి

దేశీయ అతిపెద్ద ప్రైవేట్ రంగ బ్యాంక్ హెచ్‌డీఎఫ్‌సీ కొత్త ఏడాది తొలివారంలోనే శుభవార్త అందించింది. రుణాలు తీసుకునే వారికి ఊరట కల్పించింది. మార్జినల్ కాస్ట్ ఆఫ్ ఫండ్స్ బేస్ట్ లెండింగ్ రేట్లు తగ్గిస్తున్నట్లు ప్రకటించింది. దీన్నే రుణ ఆధారిత వడ్డీ రేటుగా చెప్తారు. ఎంపిక చేసిన టెన్యూర్లపై 5 బేసిస్ పాయింట్ల వడ్డీ రేటు తగ్గించింది. దీంతో ఫ్లోటింగ్ రేటు వడ్డీతో రుణాలు తీసుకున్న వారికి ఊరట లభించనుంది. లోన్ ఈఎంఐ తగ్గుతుంది. లేటెస్ట్ వడ్డీ రేట్లు ఎలా ఉన్నాయంటే..

ఎంసీఎల్ఆర్ వడ్డీ రేట్ల సవరణ తర్వాత ఇప్పుడు హెచ్‌డీఎఫ్‌సీలో ఎంసీఎల్ఆర్ రేటు 9.15 శాతం నుంచి 9.45 శాతం మధ్య ఉంది. ఈ కొత్త రేట్లను జనవరి 7, 2025 నుంచే అమలులోకి తీసుకొచ్చినట్లు తెలిపింది. ఓవర్‌నైట్ ఎంసీఎల్ఆర్ రేటును 5 బేసిస్ పాయింట్లు తగ్గించడంతో 9.20 శాతం నుంచి 9.15 శాతానికి తగ్గింది. నెల రోజుల ఎంసీఎల్ఆర్ రేటు స్థిరంగా 9.20 శాతంగా ఉంది. 3 నెలల ఎంసీఎల్ఆర్ రేటు సైతం 9.30 శాతం వద్దే స్థిరంగా కొనసాగించింది. 6 నెలల ఎంసీఎల్ఆర్, ఏడాది ఎంసీఎల్ఆర్ రేట్లను 5 బేసిస్ పాయింట్లు తగ్గించడంతో ఇప్పుడు 9.40 శాతంగా ఉంది. రెండేళ్ల ఎంసీఎల్ఆర్ రేటు 9.45 శాతం వద్ద స్థిరంగా కొనసాగుతోంది. మూడేళ్ల ఎంసీఎల్ఆర్ రేటును 5 బేసిస్ పాయింట్లు తగ్గించడంతో 9.45 శాతానికి దిగివచ్చింది. సాధారణంగా ఏడాది, రెండేళ్ల ఎంసీఎల్ఎర్ రేటు వివిధ రుణాలకు ముడి పడి ఉంటుంది.

రూ.20 లక్షల హోమ్‌లోన్ తీసుకుంటే ఈఎంఐ ఎంత?

హెచ్‌డీఎఫ్‌సీ బ్యాంకులో ప్రస్తుతం ఉద్యోగుల, స్వయం ఉపాధి పొందుతున్న వారికి స్పెషల్ హోమ్ లోన్ వడ్డీ రేట్లు 8.75 శాతం నుంచి 9.65 శాతం మధ్య ఉన్నాయి. ఇక స్టాండర్డ్ హోమ్ లోన్ వడ్డీ రేట్లు 9.40 శాతం నుంచి 9.95 శాతంగా ఉన్నాయి. రుణ వడ్డీ రేట్ల నిర్ణయాన్ని చాలా అంశాలు ప్రభావితం చేస్తాయి. రుణ గ్రహీత క్రెడిట్ స్కోర్, బ్యాంకులో సత్సంబంధాలు, రుణం తిరిగి చెల్లించే సామర్థ్యం, ఎంచుకునే టెన్యూర్ వంటివి ఉంటాయి.

750 పైన క్రెడిట్ స్కోర్ కలిగి ఉండి మంచి వేతనం అందుకుటున్న ఓ ఉద్యోగి రూ.20 లక్షల హోమ్ లోన్ తీసుకున్నారు అనుకుందాం. 10 సంవత్సరాల టెన్యూర్ ఎంచుకున్నట్లయితే బ్యాంకు వడ్డీ రేటు 9 శాతంగా నిర్ణయించింది అనుకుందాం. అప్పుడు నెల వారీ ఈఎంఐ అనేది రూ.25,335 వరకు పడుతుంది. అదే వడ్డీ రేటు 9.50 శాతంగా ఉందని అనుకుంటే 10 సంవత్సరాలకు ఈఎంఐ రూ.25,880 వరకు పడుతుంది. అదే 9 శాతం వడ్డీతోనే లోన్ టెన్యూర్ 15 సంవత్సరాలు ఎంచుకున్నారు అనుకుందాం. అప్పుడు నెల వారీ ఈఎంఐ అనేది రూ.20,285గా ఉంటుంది. అంటే టెన్యూర్ మారినా, వడ్డీ రేటు మారిన ఈఎంఐ అనేది మారుతుంది. తమ ఆర్థిక సామర్థ్యం, లక్ష్యాల ఆధారంగా వీటిని ఎంచుకోవాలి.