టెస్టులకు రవీంద్ర జడేజా రిటైర్మెంట్..! హింట్ ఇచ్చేశాడుగా..

టీమిండియా స్టార్ ఆల్ రౌండర్ రవీంద్ర జడేజా టెస్టులకు గుడ్‌బై చెప్పనున్నాడా? సిడ్నీలో ఆడిన టెస్టే చివరిదా? అంటే అవుననే సమాధానం వినిపిస్తోంది. సోషల్ మీడియాలో అతడు పెట్టిన పోస్టే అందుకు కారణం. ఈ మేరకు రవీంద్ర జడేజా.. సిడ్నీలో చివరగా ఆడిన టెస్టు మ్యాచ్‌లో ధరించిన జెర్సీ ఫొటోను ఇన్‌స్టాగ్రామ్‌లో అభిమానులతో పంచుకున్నాడు. ఈ ఫొటో ప్రస్తుతం నెట్టింట వైరల్‌గా మారింది. దీంతో అతడు టెస్టులకు గుడ్‌బై చెప్పనున్నాడనే ప్రచారం ఊపందుకుంది.

కాగా ఇటీవల ముగిసిన బోర్డర్ గవాస్కర్ ట్రోఫీలో రవీంద్ర జడేజా మోస్తరు ప్రదర్శన చేశాడు. ఒకప్పటితో పోలిస్తే.. బౌలింగ్‌లో వైవిధ్యంగా బంతులేయలేకపోతున్నాడు. ఆస్ట్రేలియా పర్యటనలో జడ్డూ మూడు మ్యాచులు ఆడాడు. అందులో బౌలింగ్‌లో కేవలం 4 వికెట్లు మాత్రమే పడగొట్టాడు. ఇక బ్యాటింగ్‌లో 27 సగటుతో.. 135 రన్స్ స్కోరు చేశాడు. అయితే ఇటీవల టెస్టుల్లో జడ్డూ ప్రదర్శన అంతంతమాత్రంగానే ఉంది. స్వదేశంలో న్యూజిలాండ్‌తో జరిగిన టెస్టు సిరీస్‌లో ఆతడు విఫలమయ్యాడు. దీంతో జడ్డూ టెస్టు ఫార్మాట్‌ నుంచి తప్పుకోనున్నాడనే ప్రచారం జోరుగా జరుగుతోంది.

టీ20 ప్రపంచకప్ 2024లో టైటిల్ గెలిచిన జట్టులో జడ్డూ సభ్యుడిగా ఉన్నాడు. అయితే ఫైనల్ తర్వాత.. రోహిత్ శర్మ, విరాట్ కోహ్లీతో పాటు.. జడ్డూ కూడా టీ20 ఫార్మాట్‌కు గుడ్‌బై చెప్పేశాడు. కేవలం వన్డే, టెస్టు ఫార్మాట్ మాత్రమే ఆడతానని ప్రకటించాడు. అయితే ఇటీవల టెస్టుల్లో అతడి ప్రదర్శన ఏమంత గొప్పగా లేదు. దానికి తోడు జడేజా ఇన్‌స్టాగ్రామ్ పోస్టు కూడా.. ఈ ఊహాగానాలకు మరింత బలం చేకూరుస్తోంది. టెస్టు ఫార్మాట్‌కు అతడు వీడ్కోలు పలకడం ఖాయమనే వాదనలు వినిపిస్తున్నాయి.

ఇక రవీంద్ర జడేజాను వన్డే మ్యాచుల కోసం బీసీసీఐ పరిగణలోకి తీసుకుంటుందా లేదా.. అన్నది తేలాల్సి ఉంది. త్వరలో ఇంగ్లాండ్‌తో వన్డే సిరీస్, ఆ తర్వాత వన్డే ఫార్మాట్‌ల ఛాంపియన్స్ ట్రోఫీ జరగనుంది. వీటికోసం ఎంపిక చేసే భారత జట్టులో జడ్డూకు చోటు ఉంటుందా లేదా అన్నది తేలాల్సి ఉంది. దుబాయ్ వేదికగా ఛాంపియన్స్ ట్రోఫీ జరగనుంది. అక్కడ స్పిన్నర్లు ప్రభావం చూపే అవకాశం ఎక్కువగా ఉంటుంది. దీంతో ఈ టోర్నీకి జడ్డూను కచ్చితంగా ఎంపిక చేస్తారనే ప్రచారం జరుగుతోంది. దీనిపై క్లారిటీ రావాలంటే.. మరికొన్ని రోజులు ఆగాల్సిందే.