పాత పన్ను విధానం రద్దు? కేంద్రం ఆలోచన ఇదేనా.. నిపుణులు ఏం చెబుతున్నారంటే

భారత్‌లో నిర్దిష్ట ఆదాయ పరిమితి దాటితే పన్ను చట్టంలోని పన్ను శ్లాబులకు అనుగుణంగా టాక్స్ చెల్లించాల్సి ఉంటుందన్న సంగతి తెలిసిందే. ప్రస్తుతం పాత, కొత్త అని రెండు పన్ను విధానాలు ఉన్న సంగతి తెలిసిందే. డీఫాల్ట్‌గా మాత్రం కొత్త పన్ను విధానాన్నే ఉంచగా.. అవసరమైతే పాత పన్ను విధానంలోకి మారొచ్చు. అయితే ఈ క్రమంలోనే ఇప్పుడు 2025, ఫిబ్రవరి 1న కేంద్ర బడ్జెట్‌కు ముందు ఈ పన్ను విధానంపై తెగ చర్చ నడుస్తోంది. పాత పన్ను విధానాన్ని కేంద్ర ప్రభుత్వం రద్దు చేయొచ్చన్న అనుమానం పెరుగుతోంది. ప్రస్తుతానికి కేంద్ర ప్రభుత్వ వర్గాల నుంచి దీనిపై ఎలాంటి అధికారిక ప్రకటన రానప్పటికీ.. సంకేతాలు అలానే ఉన్నాయని చెబుతున్నారు నిపుణులు. ఎప్పుడైనా దీనిపై ప్రకటన రావొచ్చన్న చర్చ నడుస్తోంది.

2020 బడ్జెట్ సమయంలోనే కేంద్ర ప్రభుత్వం.. కొత్త పన్ను విధానం లాంఛ్ చేసింది. అయితే పాత పన్ను విధానంలో పన్ను మినహాయింపులు, తగ్గింపులు ఉన్నట్లుగా కొత్త పన్ను విధానంలో లేకపోయినా టాక్స్ రేట్లు మాత్రం దానితో పోలిస్తే కాస్త తక్కువే ఉన్నాయని చెప్పొచ్చు.

అయితే పాత పన్ను విధానంలో పలు పథకాల్లో పెట్టుబడులపై, హెల్త్ ఇన్సూరెన్స్ ప్రీమియంలపై, హోం లోన్ అసలుపై ఇలా వేర్వేరు పెట్టుబడులపై ఆదాయపు పన్ను చట్టం సెక్షన్ 80c సహా ఇతర సెక్షన్ల కింద పన్ను తగ్గించుకునేందుకు చాలానే ఆప్షన్లు ఉన్నాయి. అందుకే ఇలాంటి బెనిఫిట్స్ కోరుకునేవారు.. పాత పన్ను విధానంలో కొనసాగుతున్నారు. అయితే ఆకర్షణీయ స్థాయిలో వడ్డీ రేట్లు తక్కువగా ఉన్న క్రమంలో.. ఎక్కువగా కొత్త పన్ను విధానాన్నే ఎంచుకుంటున్నారు. సెక్షన్ 80c కింద గరిష్టంగా ఒక ఆర్థిక సంవత్సరంలో రూ. 1.50 లక్షల వరకు టాక్స్ తగ్గించుకోవచ్చు. నిపుణులు మాత్రం ఇప్పుడు పాత పన్ను విధానం రద్దు ఉంటుందన్న వాదనలతో ఎక్కువగా ఏకీభవిస్తున్నారు.

'కొత్త పన్ను విధానానికి కేంద్ర ప్రభుత్వం పక్షపాతంగా వ్యవహరిస్తోంది. కొత్త పన్ను విధానం ప్రకటించిన తర్వాతి నుంచి చూస్తే.. పాత పన్ను విధానంలో ఎలాంటి మార్పులు చేయట్లేదు. ఇక్కడ మినహాయింపుల్ని పెంచట్లేదు. ఆర్థిక మంత్రి ఒక్కసారిగా పాత పన్ను విధానాన్ని పూర్తిగా రద్దు చేసినా ఆశ్చర్యపోనక్కర్లేదు' అని ముంబై బేస్డ్ టాక్స్ అండ్ ఇన్వెస్ట్‌మెంట్ ఎక్స్‌పర్ట్ బల్వంత్ జైన్ అన్నారు.

పాత పన్ను విధానాన్ని రద్దు చేయాలన్న ఆలోచన ఏదైనా కేంద్రానికి ఉంటే.. ముందుగానే దీని గురించి ప్రకటన చేస్తే.. దానికి తగ్గట్లుగా ఎక్కువగా పెట్టుబడులు పెట్టే మధ్యతరగతి వారు ఏర్పాట్లు చేసుకుంటారని చెబుతున్నారు విభావంగల్ అనుకులకర ప్రైవేట్ లిమిటెడ్ ఫౌండర్ అండ్ మేనేజింగ్ డైరెక్టర్ సిద్ధార్థ్ మౌర్య. ఇంకా.. ఒకవేళ కేంద్రం దశలవారీగా పాత పన్ను విధానం రద్దు చేయాలని చూస్తే.. అప్పుడు కొత్త పన్ను విధానంలోనూ ఏమైనా మినహాయింపులు కల్పించి మధ్యతరగతికి ప్రోత్సాహం కల్పించాలని కోరుతున్నారు ఫిన్‌కార్పిట్ కన్సల్టింగ్ అసోసియేట్ డైరెక్టర్ గౌరవ్ సింగ్ పార్మర్. మరి బడ్జెట్‌లో దీనిపై నిర్మలమ్మ ఏమైనా ప్రకటన చేస్తారో చూడాలి.