ఛాంపియన్స్ ట్రోఫీ జట్టు ప్రకటనకు ముహూర్తం ఫిక్స్.. మరికొన్ని గంటల్లోనే అనౌన్స్‌మెంట్‌..!

ఛాంపియన్స్ ట్రోఫీ 2025కి సమయం ఆసన్నమవుతోంది. ఫిబ్రవరి 19 నుంచి టోర్నీకి తెరలేవనుంది. ఈ నేపథ్యంటో టోర్నీలో పాల్గొనే 8 జట్లలో భారత్‌, పాకిస్థాన్ మినహా.. మిగత దేశాలన్నీ తమ బృందాలను ప్రకటించాయి. అయితే భారత్‌ మాత్రం.. జట్టు ఎంపికను ఆలస్యం చేస్తోంది. వాస్తవానికి జనవరి 12 నాటికే ప్రాథమిక జట్టును ప్రకటించాల్సి ఉన్నా.. ఆటగాళ్ల ఫిట్‌నెస్‌పై క్లారిటీ లేకపోడంతో భారత్.. గడువు కోరింది. ఈ నేపథ్యంలో చాంపియన్స్‌ ట్రోఫీకి భారత జట్టు ప్రకటనకు బీసీసీఐ ముహూర్తం నిర్ణయించింది!

పాకిస్థాన్ వేదికగా జరిగే ఈ ట్రోఫీలో పాల్గొనబోయే జట్టును భారత సెలక్షన్ కమిటీ.. శనివారం ముంబై వేదికగా ప్రకటించనున్నట్లు తెలస్తోంది. గత సంప్రదాయాన్నే కొనసాగిస్తూ.. సెలక్షన్‌ కమిటీ చైర్మన్‌ అజిత్‌ అగార్కర్‌, టీమిండియా కెప్టెన్‌ రోహిత్‌ శర్మ కలిసి జట్టును ప్రకటిస్తారు! ఈ ట్రోఫీ కోసం ఇప్పటికే జట్టు ఎంపిక పూర్తయినట్లు తెలుస్తోంది. రేపటితో జట్టులో ఎవరు ఉన్నారు? ఎవరి రోల్ ఏంటి? అనేది తేలిపోనుంది.

ఛాంపియన్స్ ట్రోఫీ 2025తో పాటు, వచ్చే నెలలో ఇంగ్లాండ్‌తో జరిగే మూడు వన్డేల సిరీస్‌ కోసం కూడా భారత జట్టును ప్రకటించనున్నారు. రోహిత్ శర్మ, అజిత్ అగార్కర్‌లు విలేకరుల సమావేశంలో జట్టును ప్రకటిస్తారని సమాచారం. శనివారం మధ్యాహ్నం 12.30 గంటలకు మీడియా సమావేశం ఉండనుందని తెలుస్తోంది.

కాగా సిడ్నీ టెస్టులో వెన్ను నొప్పితో బాధపడ్డ బుమ్రా, శస్త్రచికిత్స అనంతరం కోలుకుంటున్న స్పిన్నర్ కుల్‌దీప్‌ యాదవ్‌ల ఫిట్‌నెస్‌పై స్పష్టత కోసమే బీసీసీఐ ఇన్ని రోజులు జట్టు ప్రకటనను ఆలస్యం చేసినట్లు తెలుస్తోంది. వాస్తవానికి ప్రాథమిక జట్టును ఎంపిక చేశాక.. అందులో మార్పులు చేసుకోవచ్చు. కానీ బీసీసీఐ మాత్రం ప్రాథమిక జట్టునే ఫైనల్ జట్టుగా భావిస్తోంది. అందుకే ఇన్ని రోజులు వెయిట్ చేసింది. ఇంగ్లాండ్‌తో టీ20 సిరీస్‌కు బుమ్రాకు విశ్రాంతి లభించింది. మరి ఇంగ్లాండ్‌తో వన్డే సిరీస్‌కు అతడిని ఎంపిక చేస్తారా? లేదా నేరుగా ఛాంపియన్స్ ట్రోఫీలోనే బరిలోకి దింపుతారా అనేది తేలాల్సి ఉంది. లెఫ్టార్మ్‌ స్పిన్నర్‌ కుల్‌దీప్‌ గాయం నుంచి కోలుకోగా.. జట్టులో చోటు లభిస్తుందా? లేదా అన్నది ఆసక్తికరంగా మారింది.