డబ్ల్యూపీఎల్ 2025 షెడ్యూల్ విడుదల,,,,ఫిబ్రవరి 14 నుంచి మార్చి 15 వరకు లీగ్

మహిళల ప్రీమియర్ లీగ్ (డబ్ల్యూపీఎల్) మూడో సీజన్‌కు సంబంధించిన షెడ్యూల్‌ను బీసీసీఐ విడుదల చేసింది. ఈ మేరకు డబ్ల్యూపీఎల్ 2025 సీజన్ ఫిబ్రవరి 14 నుంచి మార్చి 15 వరకు జరగనున్నట్లు తెలిపింది. ఈ మేరకు భారత క్రికెట్‌ నియంత్రణ మండలి (బీసీసీఐ) డబ్ల్యూపీఎల్‌-3 షెడ్యూల్‌ను విడుదల చేసింది. ఫిబ్రవరి 14న జరిగే తొలి మ్యాచ్‌లో డిఫెండింగ్ ఛాంపియన్ రాయల్ ఛాలెంజర్స్ బెంగళూరు, గుజరాత్ జెయింట్స్ జట్లు తలపడనున్నాయి.

ఈ లీగ్‌లో మొత్తంగా 22 మ్యాచ్‌లు జరగనున్నాయి. అందులో 20 లీల్ మ్యాచ్‌లు ఉన్నాయి. 2 నాకౌట్ మ్యాచ్‌లు జరుగుతాయి. ఈసారి డబ్ల్యూపీఎల్ మ్యాచ్‌లు మొత్తంగా నాలుగు వేదికల్లో జరుగుతాయి. వడోదర, బెంగళూరు, లక్నో, ముంబై నగరాలలో ఈ మ్యాచ్‌లను నిర్వహించనున్నారు. బరోడాలో కొత్తగా నిర్మించిన బీసీఏ స్టేడియంలో 6 మ్యాచ్‌లు నిర్వహిస్తారు. 2024 సీజన్‌లో డబ్ల్యూపీఎల్ మ్యాచ్‌లు బెంగళూరు, న్యూఢిల్లీ వేదికగా జరిగాయి.

వడోదరలో 6 మ్యాచ్‌లు జరగనుండగా.. అత్యధికంగా బెంగళూరులో 8 మ్యాచ్‌లు జరుగుతాయి. ఫిబ్రవరి 14 నుంచి 19వ తేదీ వరకు వడోదరలో.. ఫిబ్రవరి 21 నుంచి మార్చి 1 వరకు బెంగళూరులో మ్యాచ్‌లు జరుగుతాయి. లక్నోలో మార్చి 3 నుంచి మార్చి 8 వరకు నాలుగు మ్యాచ్‌లు జరుగుతాయి. ఆ తర్వాత లీగ్ ముంబైకి షిఫ్ట్ అవుతుంది. అక్కడ రెండు లీగ్ మ్యాచ్‌లతో పాటు.. ఎలిమినేటర్, ఫైనల్ మ్యాచ్‌లు జరుగుతాయి. మార్చి 13న ఎలిమినేటర్, మార్చి 15న ఫైనల్ మ్యాచ్ జరుగుతుంది. భారత కాలమానం ప్రకారం.. ఈ మ్యాచ్‌లన్నీ రాత్రి 7:30 గంటల నుంచి ప్రారంభం అవుతాయి. ఈసారి డబుల్ హెడర్ మ్యాచ్‌లు లేవు.

ఇక లీగ్ దశ మ్యాచ్‌లు ముగిశాక పాయింట్ల పట్టికలో అగ్రస్థానంలో ఉన్న జట్టు నేరుగా ఫైనల్ చేరుతుంది. రెండు, మూడో స్థానాల్లో ఉన్న జట్ల మధ్య ఎలిమినేటర్ మ్యాచ్ జరుగుతుంది. కాగా డబ్ల్యూపీఎల్ తొలి సీజన్‌లో ముంబై ఇండియన్స్ విజేతగా నిలిచింది. రెండో సీజన్‌లో రాయల్ ఛాలెంజర్స్ బెంగళూరు ఛాంపియన్‌గా అవతరించింది. డబ్ల్యూపీఎల్ ముగిసిన వారం తర్వాత ఐపీఎల్ 2025కి తెరలేవనుంది. ఇండియన్ ప్రీమియర్ లీగ్ 2025కి సంబంధించిన షెడ్యూల్ త్వరలో విడుదల చేయనున్నట్లు బీసీసీఐ తెలిపింది.