మహాకుంభమేళా... 6.8 కిలోల బంగారంతో ప్రత్యేక ఆకర్షణగా ‘గోల్డెన్ బాబా’

ఉత్తర్‌ప్రదేశ్‌లోని ప్రయాగ్‌రాజ్‌లో మహాకుంభ మేళా అంగరంగ వైభవంగా కొనసాగుతోంది. ఇప్పటి వరకు దాదాపు 9 కోట్ల మంది భక్తులు పుణ్యస్నానాలు చేసినట్టు అధికారులు తెలిపారు. అయితే, ఈ ఆధ్యాత్మిక సంగమంలో పలువురు సాధువులు, సన్యాసులు ప్రత్యేక ఆకర్షణగా నిలుస్తున్నారు. తలపై బార్లీ పండిస్తూ ఒకరు.. చిత్రవిచిత్ర వేషధారణలతో ఒకరు ఇలా సోషల్ మీడియాలో వీరు ప్రస్తుతం ట్రెండింగ్‌లో ఉన్నారు. ఓ బాబా ఏకంగా ఆరున్న కిలోలకుపైగా బంగారు ఆభరణాలను ధరించి కుంభమేళాలో సందడి చేస్తున్నారు. కేరళకు చెందిన ఆ స్వామీజీని ఇప్పుడు ‘గోల్డెన్‌ బాబా’గా పిలుచుకుంటున్నారు.

నిరంజన్ అఖాడాకు చెందిన మహా మండలేశ్వర్‌ నారాయణానంద్‌ గిరి మహరాజ్‌ నిరంజనీ.. విలువైన రాళ్లు, వజ్రాలు పొదిగిన బంగారు ఆభరణాలను ధరించి కుంభమేళాకు విచ్చేశారు. వీటిని వివిధ దేవతలకు గుర్తుగా ధరించానని, దీని వల్ల తనకు పాజిటివ్ ఎనర్జీ వస్తుందని ఆయన తెలియజేశారు.

‘‘నా పేరు శ్రీశ్రీ 1008 శ్రీవిభూషిత్ స్వామి నారాయణ్ నంద్ గిరిజీ మహారాజ్.. మాది కేరళ.. ఈ స్వర్ణాభరణాలు వివిధ దేవతలకు గుర్తుగా ధరించాను... శివుడు, నరసింహ స్వామి, కుమారస్వామి, భద్రకాళి సహా ఇతర దేవతలు.. రుద్రాక్షలు, పగడాలు, రూబీలు, పచ్చలు, ఇంద్రనీలమణులు పొదిగిన ఈ ఆభరణాల నుంచి నాకు పాజిటివ్‌ ఎనర్జీ వస్తుంది. నా ఒంటిపై మొత్తం 6.8 కిలోల బంగారు ఆభరణాలు ఉన్నాయి.. గత 15 ఏళ్లుగా వీటిని ధరిస్తున్నా.. ఇందులో శ్రీ యంత్రం చిహ్నం కూడా ఉంది.. ఈ రుద్రాక్షలను మా నాన్న ఇచ్చారు.. పూజల్లోనూ వీటిని వినియోగిస్తాంటాను.. కేరళలో సనాతన ధర్మ ఫౌండేషన్ ఛైర్మన్‌గా నేను సేవలు అందిస్తున్నా’ అని నిరంజనీ బాబా తన గురించి చెప్పుకొచ్చారు.

మరోవైపు, జూనా అఖాడాకు చెందిన ఐఐటీ బాబా అలియాస్ అభయ్‌సింగ్ ఆశ్రమం నుంచి వెళ్లిపోయారంటూ జరగుతోన్న ప్రచారాన్ని ఆయన ఖండించారు. తన మానసిక స్థితి సరిగా లేదని, డ్రగ్స్‌ తీసుకొంటున్నారని ఆశ్రమ వర్గాలు ఆరోపించాయి. ఈ విషయం అందరికీ తెలియడంతో అభయ్‌గ్‌ ఆశ్రమం విడిచివెళ్లినట్లు పేర్కొన్నాయి. అయితే, ఈ ఆరోపణలను తోసిపుచ్చిన బాబా.. తనకు పేరు రావడంతోనే ఇలాంటి లేనిపోని నిందలు వేస్తున్నారని చెప్పారు. నేను ఫేమస్ కావడాన్ని వారు జీర్ణించుకోలేక రాత్రికి రాత్రి ఆశ్రమం నుంచి వెళ్లగొట్టారన్నారు. నా మానసిక స్థితి సరిగా లేదని సర్టిఫికెట్ ఇవ్వడానికి వారెవరు? అని ఈ ఐఐటీ బాబా ప్రశ్నించారు