ఫిక్స్‌డ్ డిపాజిట్లు చేసిన వారికి అలర్ట్.. ఆర్బీఐ కీలక ఆదేశాలు

బ్యాంక్ సేవింగ్స్ అకౌంట్లు, డిపాజిట్లకు సంబంధించి కీలక నిర్ణయం తీసుకుంది రిజర్వ్ బ్యాంక్ ఆఫ్ ఇండియా. బ్యాంకులు, నాన్ బ్యాంకింగ్ ఫైనాన్షియల్ సంస్థలు ల్లోని పెద్ద సంఖ్యలో డిపాజిట్ ఖాతాలకు నామినేషన్ అందుబాటలో లేదని గుర్తించినట్లు తెలిపింది. ఈ మేరకు బ్యాంకులు, బ్యాంకింగేతర సంస్థలకు కీలక ఆదేశాలు జారీ చేస్తూ ఇటీవలే ఓ నోటిఫికేషన్ జారీ చేసింది. డిపాజిటర్లు మరణించిన సందర్భంలో అతడి కుటుంబ సభ్యులు, వారసులకు ఫండ్స్ బదిలీ చేయడంలో ఎదరవుతున్న సమస్యలను తొలగించేందుకు నామినేషన్ పూర్తి చేయాలని స్పష్టం చేసింది. ఇప్పటికే ఫిక్స్‌డ్ డిపాజిట్లు, సేవింగ్స్ అకౌంట్లు, లాకర్లు కలిగి ఉన్న వారితో పాటుగా కొత్తగా ఖాతా తెరిచే వారు సైతం నామినేషన్ విధిగా పూర్తి చేసేలా చూడాలని తెలిపింది.

నామినేషన్ పూర్తి చేయడం ద్వారా అనుకోని సందర్భంలో ఖాతాదారు మరణించినప్పుడు సేవింగ్స్ అకౌంట్, ఫిక్స్‌డ్ డిపాజిట్, సేఫ్ డిపాజిట్ లాకర్లలోని ఫండ్స్ అర్హులైన వ్యక్తులు (నామినీలకు) ఎలాంటి జాప్యం, చట్టపరమైన చిక్కులు లేకుండా బదిలీ చేయవచ్చని ఆర్‌బీఐ తెలిపింది. నామినేషన్ సదుపాయం సవాళ్లను తగ్గించడానికి డిపాజిటర్ మరణం తర్వాత కుటుంబ సభ్యుల క్లెయిమ్ పరిష్కారాన్ని వేగవంతం చేయాడనికి రూపొందించినదిగా స్పష్టం చేసింది. ఈ మేరకు జనవరి 17, 2025 రోజునే ఓ సర్క్యూలర్ జారీ చేసింది. ప్రాంతీయ గ్రామీణ బ్యాంకులతో పాటు షెడ్యూల్డ్ కమెర్షిల్ బ్యాంకులు, కోఆపరేటివ్ బ్యాంకులు, డిపాజిట్లు సేకరించే బ్యాంకింగేతర సంస్థలన్నింటికీ ఈ నిబంధనలు పాటిస్తాయని తెలిపింది.

నామినీ ఎలా అప్డేట్ చేయాలి?

హెచ్‌డీఎఫ్‌సీ బ్యాంక్ ఖాతాదారులు నెట్ బ్యాంకింగ్ ద్వారా ఎలా నామినీ వివరాలు అప్డేట్ చేయాలో తెలుసుకుందాం.

ముందుగా hdfc bank అధికారిక వెబ్‌సైట్లోకి వెళ్లి నెట్ బ్యాంకింగ్ ఐడీ, పాస్‌వర్డ్ ద్వారా లాగిన్ కావాలి.

అకౌంట్స్ ట్యాబ్‌లో రిక్వెస్ట్ సెక్షన్‌లోకి వెళ్లాలి.

అక్కడ కనిపించే ఆప్షన్లలో వ్యూ/అప్డేట్ నామినీ డీటెయిల్స్ ఆప్షన్ ఎంచుకోవాలి.

మీరు నామినీ ఇప్డేట్ చేయాలనుకుంటున్న అకౌంట్ సెలెక్ట్ చేయాలి. నామినీ వివరాలు అప్డేట్ చేసేందుకు మోడిఫై ఆప్షన్‌పై క్లిక్ చేయాలి. కొత్త నామినీ యాడ్ చేయాలి.

పూర్తి వివరాల అందించి కన్ఫామ్ చేయాలి. దీంతో ప్రాసెస్ పూర్తవుతుంది. అయితే, జాయింట్ ఖాతాకు ప్రాసెస్ వేరుగా ఉంటుందని ఖాతాదారులు గుర్తుంచుకోవాలి.