గుండె ఆరోగ్యాన్ని కాపాడే చేపలు, అయితే ఏ చేపలు గుండెకి మంచివో తెలుసుకుని మరీ తినండి

మన శరీరంలో గుండె చాలా ముఖ్యమైన అవయవం. దీని ఆరోగ్యాన్ని కాపాడుకోవాల్సిన అవసరం ఎంతైనా ఉంది. అందుకే, మంచి ఆహారం తీసుకుని, సరైన లైఫ్‌స్టైల్ ఫాలో అవ్వాలి. గుండెకి మేలు చేసే ఆహారం తీసుకోవాలి. అందుకోసం చేపలు తినమంటారు నిపుణులు. అందులోనూ ఏ చేపలు మంచివో తెలుసుకుని తినడం ముఖ్యం.

చేపలే ఎందుకు తినాలంటే.. ఇందులోని గుణాలు గుండె ఆరోగ్యాన్ని కాపాడతాయి. ముఖ్యంగా ఇందులో ఒమేగా 3 ఫ్యాట్స్, ఇతర పోషకాలు ఉంటాయి. ఇవన్నీ కూడా గుండెని సమస్యల నుంచి కాపాడతాయని అనేక అధ్యయనాలు చెబుతున్నాయి. ఒమేగా 3 ఫ్యాటీ యాసిడ్స్ రక్తనాళాలను శుద్ధి చేస్తూ వాటిలో కొలెస్ట్రాల్ పేరుకుపోకుండా చూస్తాయి. అందుకే, వారంలో రెండు సార్లైనా సీ ఫుడ్ తినాలని చెబుతుంటారు నిపుణులు. ఈ సీ ఫుడ్‌లో కూడా రకాలు ఉంటాయి. మరి అందులో ఏ రకం తింటే గుండె ఆరోగ్యాన్ని కాపాడుకోవచ్చో తెలుసుకోండి.

గుండె ఆరోగ్యాన్ని కాపాడుకోవడానికి ఒమేగా 3 ఫ్యాటీ యాసిడ్స్ ఎక్కువగా ఉండే ఆంకోవీస్, మాకేరెల్, బ్లాక్ కాడ్, సాల్మన్, బ్లూ‌ఫిన్ ట్యూనా వంటి చేపలు తినాలి. ఓ రకంగా చెప్పాలంటే పెద్ద వాటి కంటే చిన్న చేపలే గుండె ఆరోగ్యానికి మరింత మంచిదని చెబుతారు నిపుణులు. కారణం, చిన్న చేపల్లో ప్రోటీన్ ఎక్కువగా ఉంటుంది. అంతేకాకుండా, ఐరన్, జింక్, విటమిన్ బి12 వంటి సూక్ష్మ పోషకాలు ఎక్కువగా ఉంటాయి. వీటిని ఎముకలతో సహా తింటారు. కాబట్టి, కాల్షియం, విటమిన్ డి కూడా పుష్కలంగా అందుతుంది. విటమిన్ డి గుండె ఆరోగ్యానికి చాలా మంచిది.

ఎలాంటి చేపలు మంచివి

గుండె ఆరోగ్యానికి మంచి చేపలు ఎలా ఎంచుకోవాలంటే పర్యావరణ కలుషితాలను కూడా పరిగణనలోకి తీసుకోవాలి. కొన్ని రకాల చేపల్లో ఎక్కువగా మెర్క్యూరీ, ఇతర హానికరమైన రసాయనాలు ఉంటాయి. వీటి వల్ల గుండె ఆరోగ్యం సంగతి పక్కన పెడితే క్యాన్సర్ వంటి ప్రమాదకర సమస్యలొస్తాయి. ముఖ్యంగా పెద్ద జాతుల చేపల్లో చిన్న చేపల్లో కంటే పాదరసం వంటి కలుషితాలు ఎక్కువగా ఉంటాయి. వీటిని తినడం కాస్తా ప్రమాదమే. అందుకే, చిన్న చేపలు తినాలి.

ఏవి ప్రమాదకరం

కొన్ని అధ్యయనాల ప్రకారం, కొన్ని చేపలు కాస్తా ప్రమాదకరం. ముఖ్యంగా, పిల్లలు, గర్భిణీలు, పాలిచ్చే మహిళలు, పిల్లలు కనే వయసున్న మహిళలు ఎక్కువగా మెర్క్యూరీ ఉండే చేపలు అంటే కింగ్ మాకేరెల్, మార్లిన్, ఆరెంజ్ రఫ్ఫీ, షార్క్, స్వోర్డ్ ఫిష్, టైల్ ఫిష్, ట్యూనా వంటి చేపల్ని తినొద్దు. ఎందుకంటే ఇందులో మిథైల్మెర్క్యూరీ అనే రసాయనం ఉంటుంది. ఇది వాయు కాలుష్యం నుండి వాయువుగా గాలిలోకి విడుదలవుతుంది. గాలి నుండి, పాదరసం మహాసముద్రాలు, ప్రవాహాల్లోకి పడిపోతుంది. అక్క అడి మిథైల్మెర్క్యూరీ అనే హానికరమైన రూపంలో మారి చేపల్లోకి చేరుతుంది. ఇలాంటి చేపల్ని తినడం చిన్నపిల్లలు, గర్భిణీలు, పాలిచ్చే తల్లులు, పిల్లల్ని కనే మహిళలకి మంచిది కాదు.

ఎన్నిరోజులకి ఓ సారి తినాలి

చేపల్ని వారానికి కనీసం రెండు సార్లైనా తినాలి. ఆయిల్ ఫిష్ తినడం మంచిది. దీంతో ఇతర ఆహారాల నుండి లభించని ఒమేగా 3 ఫ్యాట్స్ అందుతాయి. ఇవి మీ గుండెని ఆరోగ్యంగా ఉంచుతాయి. ఈ ఆయిలీ ఫిష్ సహజ రంగు, ముదురు మాంసాన్ని కలిగి ఉంటాయి. ఇవి సాల్మన్, ట్రౌట్, పిల్ చార్డ్స్, సార్డిన్స్ అని చెప్పొచ్చు.

ఎక్కువగా చేపలు తింటే

చేపలు తినడం వల్ల గుండెకి ఎందుకు మంచిదంటే, మీరు రెడ్ మీట్, ప్రాసెస్డ్ మీట్‌ని తగ్గించి తింటారు. దీంతో గుండె, ప్రసరణ వ్యాధుల ప్రమాదం తగ్గుతుంది. కాబట్టి, రెగ్యులర్‌గా చేపల్ని తినండి. మీ గుండె ఆరోగ్యాన్ని కాపాడుకోండి.