గాయపడిన తల్లి సింహాన్ని కాపాడిన రెస్క్యూయర్లు.. వైరల్ వీడియో వెనుక స్టోరీ ఇదే..!

సింహాన్ని దగ్గర నుంచి చూడాలంటేనే భయపడతాం. అలాంటిది కూనలతో ఉన్న సింహం దగ్గరకు వెళ్లి దాని గాయానికి కట్టు కట్టి వైద్యం చేయడమంటే దాదాపుగా అసాధ్యమనే చెప్పాలి. జంతు ప్రదర్శన శాలల్లో పెంచే సింహాలు.. కేర్ టేకర్లకు అలవాటుపడినప్పటికీ.. ఒక్కోసారి వారిపైనా దాడులు చేయడం చూస్తుంటాం. అలాంటిది అడవిలో తిరిగే సింహం దగ్గరకు వెళ్లి.. దాని గాయానికి చికిత్స చేయడం అంటే ఎంతో సాహసమని చెప్పాలి. వైరల్ అవుతోన్న ఈ వీడియో ఎక్కడిది..? అసలు ఇది నిజమేనా కాదా? అనేది చూద్దాం..

క్లెయిమ్ ఏమిటి?

‘ధైర్యవంతులైన రెస్క్యూయర్లు గాయపడిన ఆడ సింహాన్ని రక్షించారు ♥️. మరింత అందమైన వన్యప్రాణులు, మాంసాహార జంతువుల కంటెంట్ కోసం ఫాలో చేయండి’ అనే క్యాప్షన్‌తో రెండు పిల్లలతో ఉన్న గాయపడిన ఆడ సింహానికి రెస్క్యూ సిబ్బంది కట్టు కట్టిన వీడియోను ప్రిడేటర్ ప్లానెట్ (X/Predator_Planet) అనే ఎక్స్ పేజీలో జనవరి 18న పోస్టు చేశారు. 4.45 లక్షల మందికి రీచ్ అయిన ఈ వీడియోకు 9 వేలకుపైగా లైకులు వచ్చాయి.

వాస్తవమేంటి..?

వైరల్ అవుతోన్న ఈ వీడియోను జాగ్రత్తగా గమనిస్తే ఇది నిజంగా జరిగింది కాదు.. ఆర్టిఫిషియల్ ఇంటెలిజెన్స్ సాయంతో రూపొందించిన వీడియో అని చెప్పొచ్చు. 25 సెకన్ల నిడివి ఉన్న ఈ వీడియోను జాగ్రత్తగా గమనిస్తే.. గాయపడిన సింహానికి కట్టుకట్టే సమయంలో ముందుగా కనిపించే ప్రదేశంలో నేల మీద ఎండు గడ్డి లాంటిది కనిపిస్తే.. కాసేపటి తర్వాత చదునైన ఎర్ర నేల కనిపిస్తుంది. రెస్క్యూయర్లతోపాటు బ్యాక్‌గ్రౌండ్‌లో ఉండే వెహికల్ కూడా మారుతుంది.

కట్టు కట్టిన తర్వాత ఇసుక నేలపై సింహం లేచి నిలబడినప్పుడు ఉన్న కట్టు.. ఆ తర్వాత మళ్లీ ఎండు గడ్డిపై పడుకున్న సమయంలో దానికి కట్టిన కట్టు వేర్వేరుగా కనిపిస్తాయి. ఆ తర్వాత సింహం తన పిల్లలతో కలిసి వెళ్లేటప్పుడు కూడా కట్టు మారడాన్ని గమనించొచ్చు.

అంతే కాదు.. 19 సెకన్ల వరకు కనిపించిన సింహానికి, చివర్లో కనిపించిన సింహానికి మధ్య తేడాలు ఉండటం చూడొచ్చు. వీడియోలో చాలా సేపు కనిపించిన సింహం కాళ్లపై చిన్న చిన్న మచ్చలు కనిపించగా.. చివర్లో కనిపించిన సింహం కాళ్లపై అలాంటి మచ్చలేవీ లేవు. వీటన్నింటిని బట్టి ఇది ఏఐతో రూపొందించిన వీడియో అని చెప్పొచ్చు.

వైరల్ అవుతోన్న పోస్టు కింద ‘ఇది ఏఐతో రూపొందించిన వీడియో అని మీరెందుకు చెప్పడం లేదు?’ అని యూజర్ కామెంట్ చేయగా.. ఇది ఏఐతో రూపొందించిన వీడియోనే.. కానీ మంచి ఉద్దేశంతో’ అని వీడియో పోస్టు చేసిన ప్రిడేటర్ ప్లానెట్ నుంచి బదులిచ్చారు. దీన్ని బట్టి గాయపడిన సింహాన్ని కాపాడిన వీడియో ఒరిజినల్ కాదని స్పష్టమైంది.

ఇది అసలు వాస్తవం

గాయపడిన ఆడ సింహాన్ని కాపాడిన వీడియో ఒరిజినల్ కాదు. ఇది ఆర్టిఫిషియల్ ఇంటెలిజెన్స్ ద్వారా రూపొందించిన వీడియో.