జన్మతః పౌరసత్వం రద్దు.. ఉషా చిలుకూరి అమెరికా పౌరసత్వం రద్దు అవుతుందా?

అమెరికా అధ్యక్షుడిగా రెండోసారి పగ్గాలు చేపట్టిన డొనాల్డ్ ట్రంప్.. అధికారంలోకి వస్తూనే కీలకమైన ఆదేశాలు జారీ చేశారు. విదేశీయులకు అమెరికా గడ్డ మీద జన్మించే పిల్లలకు పుట్టుకతో ఆటోమెటిగ్గా వచ్చే అమెరికా పౌరసత్వాన్ని రద్దు చేసే ఎగ్జిక్యూటివ్ ఆర్డర్‌పై ఆయన సంతకం చేశారు. తద్వారా అమెరికా నుంచి అక్రమ వలసదారుల్ని వెనక్కి పంపించాలనేది ట్రంప్ ఉద్దేశం. ఈ నేపథ్యంలో ట్రంప్ జారీ చేసిన ఎగ్జిక్యూటివ్ ఆర్డర్ గురించి సోషల్ మీడియాలో రకరకాలుగా ప్రచారం జరుగుతోంది.

క్లెయిమ్ ఏమిటి?

‘జన్మతః వచ్చే పౌరసత్వాన్ని రద్దు చేస్తూ ఎగ్జిక్యూటివ్ ఆర్డర్స్‌పై ట్రంప్ సంతకం చేస్తే జేడీ వాన్స్ భార్య ఉషా వాన్స్ తన పౌరసత్వాన్ని కోల్పోతారు. ఉష పుట్టే సమయానికి ఆమె తల్లిదండ్రులు అమెరికా పౌరులు కాదు’ అంటూ ప్రొటెక్ట్ కమలా హ్యారీస్ (X/DisavowTrump20) పేరిట ఉన్న ఎక్స్ హ్యాండిల్‌లో ఓ పోస్టు చేశారు.

వాస్తవమేంటి..?

డొనాల్డ్ అమెరికా అధ్యక్షుడి పగ్గాలు చేపట్టిన వెంటనే.. అమెరికా గడ్డ మీద జన్మించే పిల్లలకు ఆటోమెటిగ్గా లభించే అమెరికా పౌరసత్వాన్ని రద్దు చేస్తున్నట్లు రూపొందించిన ఎగ్జిక్యూటివ్ ఆర్డర్స్‌పై సంతకం చేశారు. ‘అమెరికా పౌరసత్వం అర్థాన్ని, విలువను రక్షించడం’ పేరిట రూపొందించిన ఎగ్జిక్యూటివ్ ఆర్డర్‌పై సంతకం చేశారు. దీన్ని వైట్‌హౌస్ అధికారిక వెబ్‌సైట్‌లో ఇక్కడ చూడొచ్చు.

ట్రంప్ సర్కారు జారీ చేసిన ఆదేశాల ప్రకారం.. చిన్నారులకు పుట్టుకతో అమెరికా పౌరసత్వం లభించాలంటే.. తల్లిదండ్రుల్లో ఒకరికి కచ్చితంగా అమెరికా పౌరసత్వం ఉండాలి. చిన్నారి జన్మించే సమయానికి తల్లి తాత్కాలిక వీసా మీద అమెరికాలో నివాసం ఉంటూ.. తండ్రి అమెరికా పౌరసత్వంలో లేదా ఇక్కడ శాశ్వత నివాస హక్కు లేకపోతే.. అలాంటి వారికి పుట్టిన పిల్లలకు జన్మతః అమెరికా పౌరసత్వం లభించదు.

ఈ ఎగ్జిక్యూటివ్ ఆర్డర్ ప్రకారం.. అమెరికా తాత్కాలికంగా లేదా అక్రమంగా నివాసం ఉంటున్న వారికి పుట్టిన పిల్లలకు అమెరికా పౌరసత్వం ఇవ్వడం కుదరదు. ఈ ఆదేశాలపై ట్రంప్ సంతకం చేసిన 30 రోజుల తర్వాతి నుంచి ఈ నిబంధనలు అమల్లోకి వస్తాయని ఎగ్జిక్యూటివ్ ఆర్డర్లో పేర్కొన్నారు. అంటే ఫిబ్రవరి 20 నుంచి అమెరికాలో అక్రమంగా, తాత్కాలికంగా నివాసం ఉంటున్న వారికి పిల్లలు జన్మిస్తే.. ఆ చిన్నారులకు జన్మతః అమెరికా పౌరసత్వం లభించదు. అంతేకానీ ఇప్పటికే అమెరికాలో జన్మించిన వారికి ఈ నిబంధన వర్తించదు.

ఇది అసలు వాస్తవం

జన్మతః లభించే పౌరసత్వాన్ని రద్దు చేసే ఎగ్జిక్యూటివ్ ఆర్డర్‌పై ట్రంప్ జనవరి 20న సంతకం చేశారు. అప్పటి నుంచి 30 రోజుల తర్వాతి నుంచి ఇవి అమల్లోకి వస్తాయి. అంతే కానీ.. ఇప్పటికే అమెరికాలో జన్మించిన వారికి ఈ నిబంధనలు వర్తించవు.