ఛాంపియన్స్ ట్రోఫీలో జెర్సీ వివాదం..! బీసీసీఐ vs పీసీబీ.. మధ్యలో ఐసీసీ..!

ఫిబ్రవరి 19 నుంచి ఛాంపియన్స్ ట్రోఫీ ప్రారంభం కానున్న విషయం తెలిసిందే. ఇందులో భాగంగా ఏర్పాట్లు చకచకా జరుగుతున్నాయి. భారత్‌.. పాక్‌కు రాబోమని తేల్చి చెప్పడంతో హైబ్రిడ్ మోడల్‌లో ఈ టోర్నీ నిర్వహిస్తున్నారు. భారత్ ఆడే మ్యాచ్‌లు దుబాయ్‌ వేదికగా జరగనున్నాయి. భారత్-పాకిస్థాన్ విషయంలో ఇప్పటికే వివాదాస్పందగా మారిన ఈ టోర్నీలో.. తాజాగా మరో తెరమీదకు వచ్చింది.

సాధారణంగా ఏదైనా ఐసీసీ టోర్నీ జరిగితే.. ఆతిథ్య దేశం పేరు.. టోర్నీలో పాల్గొనే ఆటగాళ్ల జెర్సీలపై ఉంటుంది. పాకిస్థాన్ క్రికెట్ బోర్డు కూడా.. అన్ని దేశాల జెర్సీలపై ‘ఛాంపియన్స్ ట్రోఫీ 2025 పాకిస్థాన్’ అనే పేరు ముద్రించేందుకు సిద్ధమైంది. అయితే దీనిపై బీసీసీఐ అభ్యంతరం వ్యక్తం చేస్తోంది. తామ జెర్సీలపై పాకిస్థాన్ పేరు ఉండకూడదని.. ఐసీసీకి ఫిర్యాదు చేసింది. ఈ నేపథ్యంలో ఈ అంశంపై ఐసీసీ స్పందించింది.

“ఐసీసీ టోర్నీకి సంబంధించిన లోగోను ప్రతి జట్టూ కూడా తమ జెర్సీకి యాడ్‌ చేసుకోవాల్సి ఉంటుంది. టోర్నీలో పాల్గొనే అన్ని జట్లూ ఈ నిబంధనను పాటించాల్సిన అవసరం ఉంది” అని ఐసీసీ అధికారిక వర్గాలు వెల్లడించినట్లు వార్తలు వస్తున్నాయి. ఇక ఇదే విషయంపై పాకిస్థాన్ క్రికెట్ బోర్డు కూడా స్పందించింది. బీసీసీఐ క్రికెట్‌లోకి రాజకీయాలను తెస్తోందని ఆరోపించింది.

“బీసీసీఐ తీరు వల్ల ఆటకు నష్టం జరుగుతోంది. తొలుత వారు ఛాంపియన్స్ ట్రోఫీలో పాల్గొనేందుకు జట్టును పంపించబోమని చెప్పారు. ఓపెనింగ్ సెర్మనీకి కెప్టెన్‌ను కూడా పంపించట్లేదు. ఇప్పుడేమో. భారత ఆటగాళ్లు ధరించే జెర్సీలపై ఆతిథ్యం దేశ పేరు కూడా వద్దంటున్నారు” అని పాకిస్థాన్ క్రికెట్ బోర్డు అధికారి ఒకరు అన్నారు.

ప్రస్తుత పరిస్థితుల్లో ఛాంపియన్స్ ట్రోఫీ 2025 జెర్సీలపై పాకిస్థాన్‌ పేరు కచ్చితంగా ఉంటుందని తెలుస్తోంది. మరి భారత ఆటగాళ్ల జెర్సీలపై కూడా ఇదే ఉంటుందా? లేదా? అన్నది తేలాల్సి ఉంది. దీనిపై మరికొన్ని రోజుల్లో స్పష్టత వచ్చే అవకాశం ఉంది. ఫిబ్రవరి 19 నుంచి మార్చి 9 వరకు ఛాంపియన్స్ ట్రోఫీ జరగనుంది. భారత్ ఆడే మ్యాచ్‌లు మినహా.. మిగతా మ్యాచ్‌లన్నీ.. పాకిస్థాన్ వేదికగా జరగనున్నాయి.