ఇలాంటి ప్రదేశాల్లో 'పెద్ద' ట్రాన్సాక్షన్స్ చేస్తున్నారా? బీ అలర్ట్.. ఐటీ నోటీసులొస్తాయ్!

భారతదేశంలో కొన్నేళ్లుగా డిజిటల్ హవా నడుస్తోంది. ఎక్కువగా లావాదేవీలు ఆన్‌లైన్‌లోనే జరుగుతున్నాయి. ముఖ్యంగా యూపీఐ (యూనిఫైడ్ పేమెంట్స్ ఇంటర్‌ఫేస్) వచ్చిన తర్వాత గూగుల్ పే, ఫోన్ పే, పేటీఎం సహా ఇతర బ్యాంక్ యాప్స్ నుంచి ట్రాన్సాక్షన్స్ ఎక్కువగా జరుగుతుంటాయి. అయితే.. డిజిటల్ హవా నడుస్తున్నప్పటికీ.. ఇప్పటికీ కొన్ని చోట్ల క్యాష్ ట్రాన్సాక్షన్స్ జరుగుతుండటం మనం గమనిస్తూనే ఉంటాం. ఇవి పరిమితి మేరకు ఉంటే ఇబ్బందేం లేదు. అదే లిమిట్ దాటితే మాత్రం ఇబ్బందులు ఎదుర్కోవచ్చు. ఎందుకంటే ఇలా క్యాష్ ట్రాన్సాక్షన్స్‌కు కూడా పరిమితులు ఉంటాయి. వీటి గురించి తెలుసుకోవాలి. పెద్ద మొత్తంలో చేసే లావాదేవీలపై ఆదాయపు పన్ను శాఖ కన్నేసి ఉంచుతుంది. ఇక్కడ ఐటీ నోటీసులు పొందడం సహా పెనాల్టీ కూడా పడుతుందని చెప్పొచ్చు.

>> పెద్ద మొత్తంలో ఇలా క్యాష్ ట్రాన్సాక్షన్స్‌పై ఆంక్షలు ఉన్నప్పటికీ.. నిఘా కొరవడిన నేపథ్యంలో యథేచ్ఛగా జరుగుతున్నాయి. ఈ క్రమంలోనే కొద్ది రోజుల కిందట కేంద్ర ప్రత్యక్ష పన్నుల బోర్డు.. ఐటీ శాఖకు కీలక ఆదేశాలు ఇచ్చింది. ముఖ్యంగా హాస్పిటల్స్, హోటల్స్ (రెస్టారెంట్స్), లగ్జరీ బ్రాండ్ విక్రయాల్లో ఉండగా.. ఇటీవల ఇలాంటి నగదు లావాదేవీలు ఐవీఎఫ్ క్లినిక్స్ వద్ద కూడా జరుగుున్నట్లు.. వాటిపై ఐటీ శాఖ దృష్టి సారించాల్సి ఉంటుందని సూచించింది.

సాధారణంగానే రూ. 2 లక్షలకు మించిన క్యాష్ ట్రాన్సాక్షన్స్ జరిగినట్లయితే.. సదరు వివరాల్ని ఆర్థిక సంస్థలకు రిపోర్ట్ చేయాల్సి ఉంటుంది. అయినప్పటికీ ఇలా చేయకుండా నిబంధనల్ని అతిక్రమించి.. హై వాల్యూ క్యాష్ ట్రాన్సాక్షన్స్ జరుపుతున్నట్లు తెలిసింది. ఇంకా కొన్ని క్యాష్ ట్రాన్సాక్షన్స్‌కు అయితే పాన్ కార్డు వివరాల్ని సేకరించాల్సి ఉన్నా.. అలా కూడా జరగట్లేదని.. వీటిని వెరిఫై చేసేందుకు సరైన మెకానిజం కూడా లేదని తెలిపింది. అందుకే.. ఇలాంటివి ఐటీఆర్ ఫైలింగ్ సమయంలో వెల్లడించే టాక్స్ ‌పేయర్ల సమాచారంతో.. ఇలాంటి లావాదేవీల్ని ధ్రువీకరించుకోవాల్సి ఉంటుందని తెలిపింది. ఇక్కడ నిబంధనలు అతిక్రమించినట్లు తేలితే ఐటీ శాఖ నుంచి నోటీసులు పొందుతారు. దీనికి సరైన సమాధానాలు ఇవ్వాలి. కొన్ని సార్లు మీ ట్రాన్సాక్షన్‌కు సమానమైన పెనాల్టీ కూడా పడే ఛాన్స్ ఉంటుంది.

ఇలాంటి ప్రదేశాల్లో పెద్ద మొత్తంలో నగదు లావాదేవీలు నిర్వహించడం వల్ల.. చాలా మంది పన్ను ఎగవేతకు పాల్పడుతున్నట్లు తెలుస్తోంది. ఇలాంటి వాటికోసమే.. నగదు లావాదేవీలు ఎక్కువగా జరుగుతున్నట్లు గుర్తించారు. వీటితో పాటుగా ఇంకా పెద్ద మొత్తంలో ఆస్తి కొనుగోలు చేసిన సమయంలో నగదుతో చెల్లించడం.. ఫిక్స్‌డ్ డిపాజిట్లలో ఎక్కువ క్యాష్ ఇచ్చినప్పుడు.. క్రెడిట్ కార్డు బిల్లు పేమెంట్స్ సమయంలో (రూ. లక్షకు మించినప్పుడు).. బ్యాంక్ అకౌంట్లో ఒక ఆర్థిక సంవత్సరంలో రూ. 10 లక్షలకు మించి క్యాష్ డిపాజిట్ చేసిన సమయాల్లో కూడా మీ దగ్గర ఉన్న నగదుకు సరైన వివరాలు ఉండాలి. అప్పుడు మాత్రమే ఎలాంటి ఇబ్బందులు ఉండవు.