రెండేళ్లలో 250 శాతం లాభం.. ఇప్పుడు 1 షేరుకు 1 షేరు ఉచితం

స్మాల్ క్యాప్ కేటగిరి, వేస్ట్ మ్యానేజ్మెంట్ సర్వీసెస్ సెక్టార్ కంపెనీ అర్బన్ ఎన్విరో వేస్ట్ మ్యానేజ్మెంట్ లిమిటెడ్  బంపర్ ఆఫర్ ప్రకటించింది. కంపెనీ బోర్డు ఆఫ్ డైరెక్టర్స్ ఇటీవలే సమావేశమై బోనస్ షేర్లు జారీ చేసేందుకు ఆమోదం తెలుపినట్లు వెల్లడించింది. రికార్డ్ తేదీ నాటికి ఈ కంపెనీకి చెందిన 1 షేరు కొంటే మరో షేరు ఉచితంగా అందనుంది. ఈ కంపెనీ షేరు గత రెండేళ్లనే 250 శాతానికిపైగా లాభాన్ని అందించి మల్టీబ్యాగర్ స్టాక్స్‌లో ఒకటిగా నిలిచింది.

బోనస్ షేర్లు..

కంపెనీ ఎక్స్చేంజ్ ఫైలింగ్ ప్రకారం.. 1:1 రేషియోలో బోనస్ షేర్లు అందించేందుకు కంపెనీ బోర్డు సిఫార్స్ చేసింది. అంటే రికార్డు తేదీ నాటికి రూ. 10 ఫేస్ వ్యాల్యూ గల 1 ఈక్విటీ షేరు తమ డీమ్యాట్ ఖాతాలో కలిగి ఉంటే వారికి అదనంగా రూ. 10 ఫేస్ వ్యాల్యూ గల 1 ఈక్విటీ షేరు బోనస్ రూపకంగా ఉచితంగా లభిస్తుంది. ఈ బోనస్ షేర్ల జారీకి సంబంధించి అర్హులను నిర్ణయించడానికి రికార్డు తేదీని ఫిబ్రవరి 7, 2025గా నిర్ణయించినట్లు కంపెనీ తెలిపింది. ఈ బోనస్ ఇష్యూ కోసం 43,30,000 షేర్లు కేటాయించినట్లు వెల్లడించింది.

ఈరోజు స్టాక్ మార్కెట్ ట్రేడింగ్ సెషన్‌లో అర్బన్ ఎన్విరో వేస్ట్ మ్యానేజ్మెంట్ కంపెనీ షేరు 5 శాతం నష్టపోయి లోయర్ సర్క్యూట్ తాకింది. రూ. 523 వద్ద స్థిరపడింది. ఈ షేరు 52 వారాల గరిష్ఠ ధర రూ. 695.15గా ఉండగా.. కనిష్ఠ ధర రూ. 265.45గా ఉంది. గత వారంలో ఈ షేరు సుమారు 3 శాతం నష్టపోయింది. గత నెల రోజుల్లో 23 శాతం నష్టపోయింది. అయితే గత ఆరు నెలల్లో 21 శాతం లాభాన్ని అందించింది. ఏడాది కాలంలో 47 శాతం లాభాన్ని ఇవ్వగా.. గత రెండేళ్లలో 253 శాతం లాభాన్ని తమ వాటాదారులకు అందించింది. రెండేళ్ల క్రితం లక్ష రూపాయలు పెట్టి షేర్లు కొనుగోలు చేసినట్లయితే ఇప్పుడు ఆ విలువ రూ.3.53 లక్షలకుపైగా ఉంటుంది. ప్రస్తుతం ఈ కంపెనీ మార్కెట్ విలువ రూ. 226 కోట్లుగా ఉంది.