వరుసగా రెండో నెలా పైపైకి.. రూ. 2312 పెరిగిన బంగారం ధర

 అంతర్జాతీయంగా అనిశ్చితి.. రాజకీయ భౌగోళిక ఉద్రిక్త పరిస్థితులు.. డొనాల్డ్ ట్రంప్ సుంకాల ప్రకటనలు.. ఆర్థిక వ్యవస్థల్లో మందగమనం.. పెరుగుతున్న ద్రవ్యోల్బణం.. ఇలా అన్నీ ఒకదానితో ఒకటి లింక్ అయి ఉంటాయి. ఈ కారణాలతోనే కొంతకాలంగా బంగారం ధరలు భారీగా పెరిగి ఆకాశమే హద్దుగా దూసుకెళ్లాయి. గత నెలలోనే ఆల్ టైమ్ గరిష్ట స్థాయిల్ని కూడా తాకాయి. ఇది ఇన్వెస్టర్లకు జేబులు నింపేలా చేసినప్పటికీ ఇదే సమయంలో.. భౌతికంగా కొనుగోలు చేయాలనుకున్న వారికి మాత్రం పీడకలనే మిగిల్చిందని చెప్పొచ్చు. అంతకంతకూ పెరుగుతూ పోయి.. బంగారం ధరలు చుక్కలు చూపించాయి. ఊహించని రీతిలో పెరుగుకుంటూ వెళ్లాయి.

ఇక గత నాలుగు రోజులు మాత్రం బంగారం రేట్లు దేశీయంగా, అంతర్జాతీయంగా పడిపోయాయి. యూఎస్ డాలర్ పుంజుకున్న నేపథ్యంలో గోల్డ్ డిమాండ్ తగ్గడంతో రేట్లు పడిపోయాయి. ఇంటర్నేషనల్ మార్కెట్లో ఆల్ టైమ్ గరిష్ట స్థాయిల నుంచి దాదాపు 100 డాలర్లకుపైగా పతనమైంది. దేశీయంగా కూడా గరిష్ట స్థాయిల నుంచి రూ. 1000 కిపైనే పడిపోయాయి.

అయితే 4 రోజులుగా పడిపోయినప్పటికీ.. ఫిబ్రవరి నెల మొత్తంలో చూసుకుంటే బంగారం రేట్లు పెరిగాయి. గరిష్ట స్థాయిల్లో ప్రాఫిట్ బుకింగ్ జరిగి రేట్లు పతనం అయినా.. నెల మొత్తంలో ఓవరాల్‌గా చూస్తే ధరలు పెరిగాయి. ఫిబ్రవరిలో స్పాట్ గోల్డ్ రేటు 2.15 శాతం పుంజుకుంది. ఇది ఔన్సుపై 2801 డాలర్ల స్థాయి నుంచి 2858 డాలర్లకు పెరిగింది. దేశీయంగా చూసినట్లయితే ఎంసీఎక్స్ (మల్టీ కమొడిటీ ఎక్స్చేంజి) మార్కెట్లో 10 గ్రాములపై రూ. 81,907 నుంచి రూ. 84,219 కి ఎగబాకింది. ఈ క్రమంలో ఒక్క నెలలో రూ. 2312 పెరిగిందని చెప్పొచ్చు.

గత వారం మాత్రం నవంబర్ తర్వాత తొలిసారిగా బంగారం ధరలు భారీగా పడిపోయాయి. వారం వ్యవధిలో 2.63 శాతం దిగొచ్చాయి. దీనికి ముందు మాత్రం వరుసగా 8 వారాల పాటు ప్రతి వారం కూడా బంగారం ధరలు పెరుగుతూనే వచ్చాయి. కొవిడ్ మహమ్మారి తర్వాత ఇలా జరగడం ఇదే తొలిసారి. గత నెలలో .. ఇంకా 10 సార్లు బంగారం ధర ఆల్ టైమ్ గరిష్టాల్ని నమోదు చేయడం విశేషం. ఇక ఇప్పుడు మళ్లీ ట్రంప్ తాజా సుంకాల ప్రకటనల నేపథ్యంలో గోల్డ్ రేట్లు కిందటి రోజుతో పోలిస్తే పెరిగాయి. స్పాట్ గోల్డ్ రేటు 2858 డాలర్ల నుంచి ఔన్సుకు ఇప్పుడు (మార్చి 3 సాయంత్రం 6 గంటలకు) 2876 డాలర్లకు పెరిగింది.